Read wanga OBUCHACHILO 30 Bible Online

OBUCHACHILO 30 - wanga bible

OBUCHACHILO 30

¹Olwa Raeli yalola mbu, shiyebulilangakhwo Yakobo omwana ta, yatiilila omukhaana wabwe imbalikha. Mana naboolela Yakobo ari, “Umbelesie abaana, nikalali kario ta, isie ndalafwa!”

²Mana Yakobo nasinyishila Raeli, ne namureeba ari “Nasi ekhali Nyasaye, owakhwikalila okhunyoola abaana?”

³Raeli naboolela Yakobo ari, “Bukula omukholi wanje uno Biliha, okone ninaye, yanzibulile abaana, siesi embekhwo nabaana okhubirira muye.”

⁴Kho Raeli nahelesia Yakobo omukholiwe Biliha mbu, abe omukhasi wa Yakobo. Mana Yakobo nakona ninaye.

⁵Biliha nahela inda ne niyebulila Yakobo omwana omusiani.

⁶Kho Raeli naboola ari, “Nyasaye yakhalachiile eshiina khandi ahuliile okhuhaaba khwanje, ne niyambelesia omwana omusiani.” Khulweshio, yamala akulishe omwana tsana eliira mbu, Dani.

⁷Omukholi wa Raeli nahela inda khandi, ne niyebulila Yakobo, omwana wakhabili omusiani.

⁸Kho Raeli naboola ari, “Ekhupaane nende omukhaana wefwe lihe liamaani mana nemuhula.” Kho Raeli nakulikha omwana oyo mbu, Nafutali.

⁹Olwa Lea yalola mbu, bulano aleshile okhwibula abaana, yabukula omukholiwe Zilipa, nahelesia Yakobo mbu, abe omukhasiwe.

¹⁰Mana Zilipa, omukholi wa Lea, niyebulila Yakobo omwana omusiani.

¹¹Naye Lea naboola ari, “Endi neikhabi!” Kho nakulikha omwana oyo mbu, Gadi.

¹²Zilipa, omukholi wa Lea niyebulila Yakobo omwana omusiani wakhabili.

¹³Mana Lea naboola ari, “Esaangaalile muno! Shichila abakhasi balananganga mbu, omusaangaafu.” Kho Lea nakulikha omwana oyo mbu, Asheri.

¹⁴Mutsinyanga tsiokhuchesa ingano, Rubeni yatsia mumukunda nanyoolamwo tsinduli, etsilangwa mbu, Mandireki. Natsinoka ne nareerera Lea nyinamwana. Mana Raeli naboolela Lea ari, “Nochama, ekhusaaya mbu, umbelesiekhwo tsinduli tsiomusianiwo etsio.”

¹⁵Nebutswa Lea yamuyibila naboola ari, “Opaara mbu, okhuunuula omusaatsa ni likhuwa litiiti, khandi bulano wenyanga okhubukula tsinduli tsiomwana wanje omusiani?” Raeli namukalusia ari, “Noba niumbelesiakhwo tsinduli tsiomwanawo omusiani etsio, Yakobo alakona ninawe eshilo shieinyanga yino.”

¹⁶Olwa Yakobo yachelela okhurula mumukunda, Lea yatsia okhumwakaanila ne namuboolela ari, “Inyanga yino olakona ninasi, shichila ekhukulile tsinduli tsiomwana wanje omusiani.” Mana Yakobo nakona nende Lea eshilo eshio.

¹⁷Mana Nyasaye nahulila okhuhaaba khwa Lea, kho Lea nahela inda ne niyebulila Yakobo omwana owakharano omusiani.

¹⁸Lea naboola ari, “Nyasaye yambelesiye eshihaanwa eshilayi, shichila ndahelesia omusaatsa wanje omukholi wanje. Kho nakulikha omwana oyo mbu, Isakari.”

¹⁹Mana Lea nahela inda khandi ne niyebula omwana wakhasasaba omusiani.

²⁰Ne Lea naboola ari, “Nyasaye yamanusiye eshihaanwa eshilayi, bulaano omusaatsa wanje alambelesia oluyali, shichila emwibuliile abaana abasiani basasaba.” Kho nakulikha omwana oyo mbu, Zebuluni.

²¹Olunyuma niyebula omwana omukhaana, ne namukulikha mbu, Dina.

²²Mana Nyasaye niyetsulila Raeli, nafuchilila amasaayoke ne namwikula olubeleshelo okhwibula abaana.

²³Raeli nahela inda ne niyebula omwana omusiani, kho naboola ari “Nyasaye yarusiyekhwo tsisoni.”

²⁴Mana namukulikha mbu, Yosefu, naboola ari, “OMWAMI Nyasaye akhoya yameetakhwo omwana undi omusiani!”

²⁵Olwa Raeli yali niyebuule Yosefu, Yakobo yaboolela Labani ari, “Undekhuule engalushe ingo mushialo shiefwe.

²⁶Umbelesie abakhasi banje nende abaana banje, abandanyoola shinga omurungo khulwa okhukhukholela iwe emilimo, enzie ninabo shichila omanyile mbu, ndakhukholela emilimo obulayi.”

²⁷Nebutswa Labani yaboolela Yakobo ari, “Lekha siesi emboolekhwo. Ndamanyilisiye okhubirira mubulakusi bwanje mbu, OMWAMI Nyasaye yambelesiye tsikhabi okhulwa iwe.

²⁸Boola omurungo kwosi kwosi okwa wenya, nasi ndalakhuhelesia.”

²⁹Yakobo nakalusia naboola ari, “Iwe omanyile emilimo chiandakhukholela, khandi shinga olwa emirukochio chiayemeetile nendi omwayi wachio.

³⁰Wali nende emiruko mitiiti ne okhurula ninditsa, chiameetekha muno. OMWAMI Nyasaye yakhumeeta tsikhabi tsinyinji hosi hosi aha ndatsitsanga. Nebutswa bulaano ebise biakhoola, ebia siesi ndenya mbu, nasi ekhaabekhwo ebianje omwene.”

³¹Kho Labani nareeba Yakobo ari, “Bulaano nekhakhurunje shiina?” Naye Labani namukalusia naboola ari, “Shiolaarungakhwo eshindu tawe. Noba nofuchilila elia ndenya okhuboola lino, ndaleyama okhwaya nende okhuliinda emirukochio.

³²Lekha enjende mubiayobio nindaahulamwo ebimeeme biamakondi, ebukondo obumali nende amakondi kamapalapala halala nende tsimbusi tsiamapalapala, bibe omurungo kwanje.

³³Kho obwisikwa bwanje bwakhaloleshe habulafu, lwolichelela okhulola omurungo kwanje. Noba nolinyoolakhwo tsimbusi tsiosi tsiosi etsilali namapalapala noho amakondokondo, noho amakondi akalali akobukondo obumali ta, ebienebio bilibalwa mbu, biebwa.”

³⁴Naye Labani nakalusia naboola ari, “Nobulayi, lekha kabe shinga lwoboolile.”

³⁵Habula inyanga yeneyo, Labani yarusia tsimbusi tsikhole nende tsikhasi tsiosi, etsiali etsia amapalapala halala nende tsiamakondo kondo namakondi kebipala ebimali koosi nahelesia abasianibe.

³⁶Mana narula nemiruko echio, nalekhana nende Yakobo natsia ehale oluchendo oluhela tsinyanga tsitaru. Naye Yakobo natsiililila okhwaya ebiayo bia Labani, ebiali nibitoonyile.

³⁷Mana Yakobo nabukula tsisaala tsiemibinu nende etsiomuluusi nende etsiomusaala omuaramoni, natsikhobola mana emikhoosi emilafu nichilolekhakhwo.

³⁸Yamala narechekha tsisaala tsia yali nakhoboole etsio imbeli webitoboonje biebiayo bianywelangamwo amaatsi. Ne okhuba mbu, tsimbusi tsikhole nende amakondi amamiiku bielusinjia ebiayo nibiakhetsa okhunywa amaatsi,

³⁹ebiayo ebio bielusilibungwa embeli wetsisaala tsiali nitsirecheekhwe etsio, mana tsichila ebimeeme biebulungwa biba ebia osanga, ebiamapalapala nende ebiamakondo kondo.

⁴⁰Mana Yakobo niyahukhasia ebimeeme biamakondi okhurula mu ebietsimbusi ne nahenjia ebiamakondi ebio elubeka wetsimbusi tsiosanga nende elubeka wamakondi akobukondo obumali ka Labani kali, nalakatsokasiakhwo nende aka Labani tawe.

⁴¹Olwa ebise biolanga ebia ebiayo ebinefu okhwilukha, Yakobo yarechekhanga tsisaala etsio embeli webitoboonje biamaatsi, ebia ebiayo ebio bianywelangamwo, mana ebiayo ebio bielukhanga nibili hakarikari wetsisaala etsio.

⁴²Olwa ebiayo ebilali ebinefu ta bielushikhanga, Yakobo shiyarechekhanga tsisaala etsio tawe. Kachila Labani naba nende ebiayo, ebilali ebinefu ta naye Yakobo naba nende ebiayo ebianera.

⁴³Yakobo yakholanga ario kho naba omuyinda muno. Kho naba nende ebiayo ebinji, abakholi abanji, tsingamia tsinyinji, nende tsisishili tsinyinji.