Read wanga OBUCHACHILO 33 Bible Online

OBUCHACHILO 33 - wanga bible

OBUCHACHILO 33

¹Mana Yakobo nachinguula tsimoni nahenga, ne nalola Esau niyetsanga nende abasaatsa ebikhumi bine (400). Kho nakabula abaana nakabila Lea, abandi nahelesia Raeli ne abandi nahelesia abakhasi abakholi abo, buli mulala abeebe.

²Nara abakhasi abakholi abo nende abaana babwe imbeli. Naloosiakhwo Lea nende abaanabe. Ne namalilisia inyuma Raeli nende Yosefu.

³Mana Yakobo mwene nabira natsia imbeli wabwe boosi niyenama akhandi musaafu okhuula olwa yoola ahambi imbeli womusiani wabwe.

⁴Nebutswa Esau yelukha tsimbilo natsia okhwakaanila omusiani wabwe namufumbeelela khandi namutsunzuuna. Ne nibalila boosi amasika kobusaangaafu.

⁵Ne olwa Esau yachinguula tsimoni nalola abakhasi nabaana, yareeba ari, “Nibeena aboli ninabo bano?” Naye Yakobo namukalusia ari, Nabaana ba Nyasaye yambelesiye isie omusumbawo mubukoosia.

⁶Mana abakholi beshikhasi abo nibeetsa nabaana babwe abo nibasita ahambi, nibeenama hasi okhumuhelesia oluyali.

⁷Lea nende abaanabe boosi nibasita ahambi boosi nibeenama hasi okhuhaana oluyali. Mana mukhumalilisia Raeli nende Yosefu bosi nibeetsa nibeenama bario.

⁸Kho Esau nareeba ari, “Ne, nachio emikanda chienzakaanilenje ninachio chilia nechiashiina?” Yakobo naye nakalusia ari, “Ekhureereere emiruko echio kho mbu, ufuchilile, iwe omwami wanje.”

⁹Naye Esau namukalusie ari, “Mwana wefwe, endi nende echindi echimbelile. Chama obiishe echio nechichio?”

¹⁰Yakobo naye namukalusia ari, “Tawe ekhusaayile mbu, noba niunyinjisiye, chama obukulekhwo eshihaanwa shirula mumikhono chianje. Shichila toto mwene, okhukhulola iwe khuli shinga okhulola obweni bwa Nyasaye, okhuba iwe unzinjisiye nolukoosi muno.

¹¹Ekhusaayile mbu, chama obukule ebihaanwa ebia ekhureereere shichila Nyasaye wayakholeele aketsimbabasi, ne khandi endi nemiandu chindi eminji.” Yakobo yaasaaya Esau munjila eyo, mana Esau nafuchilila nabukula ebihaanwa ebio.

¹²Mana Esau naboolela Yakobo ari, “Lekha khuchende nikhurondokhaane nemwimiliile injila.”

¹³Nebutswa Yakobo yamukalusia naboola ari, “OMWAMI Nyasaye wanje, omanyile mbu, abaana banje bali nende amaani matiiti, khandi endi nende ebimeeme ebienya okhunuuna. Ebindu bino biosi nibiba nibichesibwa oluchendo olurambi inyanga ndala, ebiayo ebitoro binyala okhufwa biosi.

¹⁴Omwami wanje, Chama unzimilile imbeli ne nasi ndalakhulondakhwo munyuma kahala nabaana, ne nakhubukaanile Edomu.”

¹⁵Mana Esau naboolela Yakobo ari, “Lekha ekhuleshele abakholi banje bandi. Nebutswa Yakobo yareeba Esau ari, ‘Eshila okhole orio nishiina?’ Iwe omwami wanje, okhunyinjisia okhwa unyinjisiye okhwo khwonyene khuyelile.”

¹⁶Mana inyanga yeneyo Esau nakalukha Edomu.

¹⁷Nebutswa Yakobo yamala atsie Esukotsi, ewa yamala yombashe inzuye, khandi niyombakhayo ikhonje yemirukochie. Mana nakulikha habundu tsana mbu, Sukotsi.

¹⁸Yakobo nachelela obulayi mumulembe okhurula Mesopotamia niyoola mwitookho lia Shekemu, eliali mushialo shia Kanani, ne nakhupamwo ikambiye namenyamwo.

¹⁹Yakobo yakula aha yombakha liheemalie yaho okhurula khubasiani ba Hamori, samwana Shekemu, ebitonye bieifetsa ebihela eshikhumi shilala.

²⁰Mana niyombakhaho eshimalilo shiemisango shia Nyasaye ne nakulikhaho mbu, Eli-Elohe eshisina mbu, Nyasaye wa Isiraeli.