Read wanga OBUCHACHILO 34 Bible Online

OBUCHACHILO 34 - wanga bible

OBUCHACHILO 34

¹Inyanga yindi Dina, omukhaana wa Yakobo yebula nende Lea, yatsia okhucheniha balala khubakhaana Abakanani.

²Olwa Shekemu, omwana wa Hamori Omuhiti, owali omuruchi weshialo eshio yalola Dina, yamukwakhwo namaani ne namurabasia.

³Mana Shekemu nachamisibwa nende obulayi bwa Dina, omukhaana wa Yakobo, namuheela, naboola ninaye amakhuwa amalayi kobuheeli.

⁴Kho Shekemu naboolela samwana ari, “Ukhwele Omukhaana uno, abe omukhasi wanje.”

⁵Mana Yakobo namanya mbu, Shekemu yonooniye Dina omukhaanawe. Ne abasiani ba Yakobo bali elwanyi nibatsiile okhwaya emiruko. Yakobo naholeela okhuula olwa abasianibe bali nibacheleele.

⁶Naye Hamori, samwana Shekemu narula natsia wa Yakobo okhuboola ninaye.

⁷Ne olwa abasiani ba Yakobo bachelela okhurula mushiayo, ne nibahulila akali nikekholeeshe, besundukha khandi nibatiilwa neliruma, shichila Shekemu yali nakholile akeshifwabwi mu Isiraeli, khulwa okhurabasia omukhaana wa Yakobo. Eshikhole shinga eshio shishiafuchililwa okhukholwa mu Abaisiraeli tawe.

⁸Hamori naboolela Yakobo ari, “Omusiani wanje Shekemu aheelile omukhaanawo, nochama lekha omusiani wanje amuteeshie.

⁹Chama khukhole indakano hakari wanje ninawe mbu, abandu banje nende aboobo bateeshianinjie.

¹⁰Nawe omenye hano ninefwe mushialo shiefwe shino, khandi obe omulekhuule okhumenya nokhola obukhala mushialo shiefwe shino shinga olwa wenya, nonyoola ingangayo okhurula mushio.”

¹¹Shekemu naasaaya Yakobo samwana Dina nende abasianibe naboola khandi ari, “Chame mufuchiilile emuhelesia shiosi shiosi eshia mwenya.

¹²Mumboolele ikhwe yamwenya, ne mukhole ikhwe eyo okhuba hekulu muno shinga olwa mwenya. Ndalamuhelesia shiosi shiosi eshia mulenya, habula mbu, mufuchiilile omusiani wanje ateeshie omukhaana wenywe.”

¹³Mana abasiani ba Yakobo nibakaatia Hamori hala nende omusianiwe Shekemu okhuba Shekemu yali niyonooniye Dina omukhaana wabwe.

¹⁴Abasiani abo nibakalusia nibaboola bari, “Shikhunyala okhubakha omukhaana wefwe khumusaatsa oulaashebwa ta, kalaba aketsisoni khwifwe.

¹⁵Habula khulafuchilisania ninawe khwilako elala lino mbu, ashebwe shinga olwa ifwe khwashebwa, khandi buli omwanawo omusiani yesi ashebwe.

¹⁶Mana khulababashila abakhaana befwe, nefu khulateeshia abakhaana benywe, nikhumenya halala ninenywe, nikhwikhola abandu balala.

¹⁷Nebutswa nimukhaya okhuhulila akakhuboola, nimuloba okhushebwa, kho khulabukula omukhaana wefwe nikhukalukha ninaye inango wefwe.”

¹⁸Amakhuwa kabwe ako kachamisia Hamori nende omusianiwe Shekemu.

¹⁹Mana omusiani omuraaka oyo Shekemu shiyamala ashiinde okhushebwa ta, shichila yali nachamile muno omukhana wa Yakobo oyo. Ne yali niyahebwa oluyali olukhongo muno, mubomunzu yabwe.

²⁰Kho Hamori nomusianiwe Shekemu nibeetsa niboola mwitookho, ahabakofu bakhung'anilanga, nibaboolela abasaatsa bamwo abamenyaho bari,

²¹“Abasaatsa bano nabeetsa befwe. Leshe bamenye mushialo shino khandi bakholelemwo obukhala, okhuba lole, omukunda okwo nomukhongo kubahela. Leshe khubukule abakhaana babwe nikhuteeshia, nefu khubabashile abakhaana befwe bateeshie.

²²Habula abandu abo khulabafuchilila okhumenya ninefwe, mana babe eshindu shilala ninefwe, nikhuba nikhufuchilila lilako elala lino mbu, buli oweshisaatsa mwifwe okhuula ashebwe shinga bo bosi bashebungwa.

²³Emiruko chiabwe nende ebindu biabwe bindi biosi bilaba ebiefwe. Khulweshio chende khufuchilisanie ninabo, bamenya ninefwe.”

²⁴Ne boosi abali nibeetsile mumukhung'ano kwabakofu mwitookho omwo nibafuchilila amakhuwa ka Hamori nomusianiwe Shekemu baboola. Mana buli oweshisaatsa, owetsa mumukhung'ano kwabakofu nashebwa.

²⁵Khunyanga yakhataru olwa bali nibashebilwe nibashilwalanga, abasiani ba Yakobo babili, Simoni nende Lawi abasiani babwe Dina, babukula tsinganga tsiabwe nibaseera litookho mumaasilisi ne nibeera abandu abasaatsa boosi.

²⁶Nibeera Hamori nomusianiwe Shekemu ne nibabukula Dina okhurula munzu mwa Shekemu nibatsia ninaye.

²⁷Mana abasiani ba Yakobo nibakalukha mwitookho elo, ne nibaliyaaya liosi shichila liali lionooniye omukhaana wabwe.

²⁸Babukula emiruko, ebiayo, tsisishili, nende buli shindu eshiali mwitookho omwo nende mumikunda.

²⁹Bayaaya emiandu chiabwe chiosi, abaana babwe, abakhasi babwe, nende biosi ebiali mutsinzu, nibabibukula nibatsia ninabio.

³⁰Mana Yakobo naboolela Simoni nende Lawi ari, “Mundeereere amasila khulwa okhukhola isie okhuba omusuku khubeene eshialo, Abakanani nende Abaperisi, abeinzu yanje nibatuutu, ne abeene eshialo nibetsukhana bekhuung'asia halala mana babuusie lihe okhukhuseera ifwe, kho baba balaamumulula isie halala nende abeinzu yanje boosi.”

³¹Nebutswa nabo bakalusia Yakobo nibareeba bari, “Shikhunyala okhulekha Shekemu akhole omukhaana wefwe shinga ouli omutamba butswa tawe.”