Read wanga OBUCHACHILO 35 Bible Online

OBUCHACHILO 35 - wanga bible

OBUCHACHILO 35

¹Mana Nyasaye naboolela Yakobo ari, “Rula otsie Betseli, omenyeyo, ne unyumbashileyo eshimalilo shiemisango. Nisie Nyasaye owakhuloleshela, olwa wali niwilukhanga okhwibisa okhurula khumusiani wenywe Esau.”

²Kho Yakobo naboolela abeinzuye nende boosi aba yali ninabo ari, “Murusie abanyasaye bakaasibwa nabandu, abamuli ninabo abo musukune, mwisiiye nimwifwala ebifwalo ebiyiakha.

³Mana khurule khutsie Betseli kho mbu, ndumbashile Nyasaye eshimalilo shiemisango, Nyasaye wanunula isie mutsinyanga tsiomatinyu kanje, khandi niyaniinda buli habundu aha ndatsitsanga.”

⁴Kho nibahelesia Yakobo abanyasaye abakaasibwa nabandu aba bali ninabo, khandi nibamuhelesia emikasa chiali mubirwi biabwe, mana Yakobo nabibisa biosi hasi womusaala kwomuruba, okwali hambi Shekemu.

⁵Ne olwa bali nibarulanga, oburi obunji bwatiila abandu abali mumatookho akali ahambi ninabo, mana abandu bamatookho ako nibakhaywa okhulondachila khubasiani ba Yakobo.

⁶Yakobo nende abandu boosi aba yali ninabo nibeetsa Luzi (niyo Betseli), litookho lili mushialo shia Kanani.

⁷Yakobo niyombakhaho eshimalilo shiemisango, ne nakulikhaho mbu, Eli-Betseli;[16] shichila Nyasaye omwene yelolesia khu Yakobo olwa yali niyeluushe okhurula khu Esau omusiani wabwe.

⁸Naye Debora omulesi wa Rebeka nafwa ne nayabilwa mushisina shiomusaala kwomuruba, emwalo wa Betseli. Mana habundu nihalangwa mbu, Aloni-bakutsi.

⁹Nyasaye khandi naloleshela Yakobo, olwa Yakobo yali narulanga Mesopotamia ne namulaamila ikhabi.

¹⁰Mana Nyasaye naboolela Yakobo ari, “Niwe Yakobo, nebutswa okhurula bulano shiolalangungwa mbu Yakobo tawe, habula olalangwa mbu, Isiraeli.”

¹¹Namuboolela ari, “Nisie Nyasaye Owobunyali Bwosi, emulaka mbu, mwibulane nimwinjiha, lihangalio lirulemwo amahanga kandi amanji khandi abaruchi barule mwiwe.

¹²Ne eshialo shia ndahelesia Aburahamu nende Isaka ndalakhuhelesia iwe nende abolwibulolwo.”

¹³Mana Nyasaye narulaho, naye Yakobo natong'a habundu yaho.

¹⁴Mana Yakobo nasinjisiaho isiilo yelichina okhuba eshitsulilo, ne nakholela khusiilo okhwo omusango khulwa okhutsushililakhwo idivai nende amafura.

¹⁵Kho Yakobo nakulikha habundu aha yali naboolanenje nende Nyasaye yaho mbu, Betseli.

¹⁶Mana nibarula Betseli nibatsia Efuratsi, ne olwa bali nibashili okhuula Efuratsi, Raeli yachaaka okhulumwa inzibula, nanyakhana muno.

¹⁷Ne olwa Raeli yali nalumungwa nanyakhananga obutinyu, abakhasi abebusinjia bamuboolela bari, “Shiolaria ta, okhuba bulano oleebula omusiani undi.”

¹⁸Ne olwa Raeli yali nakwisinjia mwoyo nali hambi okhufwa, yakulikha omusianiwe oyo mbu, Benoni[17], nebutswa samwana yamukulikha mbu, Benjamini[18].

¹⁹Kho Raeli nafwa nayabilwa elubeka lweinjila eyitsia Efuratsi (nilio Betselehemu),

²⁰naye Yakobo nasinjisia isiilo khushilindwa shia Raeli eshio. Niyo isiilo yili khushilindwa shia Raeli okhuula olwa leelo.

²¹Yakobo natsiililila okhuchenda ne nakhoma liheemalie imbeli womunaara okwa Ederi.

²²Olwa Yakobo yali nashimenyile Ederi, mushialo eshio, Rubeni yakona nende Biliha owali omukhasi omubiikha wa Yakobo, naye Yakobo namanya. Ne abasiani ba Yakobo bali ekhumi nababili.

²³Abasiani ba Lea bali, Ruben, omusiani wambeli wa Yakobo, Simoni, Lawi, Yuda, Isakhari nende Zebuluni.

²⁴Abasiani ba Raeli bali, Yosefu nende Benjamini.

²⁵Abasiani ba Biliha omukholi wa Raeli bali, Dani nende Nafutali.

²⁶Abasiani ba Zilipa omukholi wa Lea bali, Gadi nende Asheri. Abo nibo abasiani ba Yakobo yebula olwa yali Mesopotamia.

²⁷Mana Yakobo niyetsa Mamure hambi Heburoni niyo ewa Isaka samwana nende Aburahamu kuukanyene bamenyanga khale.

²⁸Isaka namenya emiyika eshikhumi shilala nende amakhumi munane.

²⁹Isaka nafwa, nalonda khubekhobe abafwa khale, nali omukofu muno, nabo abasianibe Esau nende Yakobo nibamuyabila.