Read wanga OBUCHACHILO 37 Bible Online

OBUCHACHILO 37 - wanga bible

OBUCHACHILO 37

¹Yakobo natsiililila okhumenya mushialo shia Kanani.

²Akalondakhwo kano niko amakhuwa kobulamu bwabeinzu ya Yakobo. Yosefu nali omuraaka wemiyika ekhumi namusaafu, yali niyayanga amakondi nende abasiani babwe, abaana ba Biliha nende Zilifa, abakhasi ba Samwana. Inyanga yindi, Yosefu yetsa naboolela samwana amakhuwa amabi, akabasiani babwe abo bali nibakholanga.

³Ne Yakobo yali niyaheela Yosefu muno okhushila shinga olwa yali niyaheela abaanabe bandi, shichila yebula Yosefu nali omukofu. Mana Yakobo nanabila Yosefu ikaanzu irambi.

⁴Ne olwa abasiani babwe Yosefu bandi balola mbu, sabwe yaheela Yosefu okhubashila boosi, basila Yosefu khandi shibaboolanga ninaye mumulembe tawe.

⁵Inyanga yindi mushilo Yosefu yaloora lilooro. Ne olwa yaboolelakhwo abasiani babwe abo, bameeta okhumusila muno.

⁶Yosefu nababoolela ari, “Recheresie emuboolelekhwo lilooro elia eloorile.

⁷Khubeele nikhubohanga ebinywa bieyingano mumukunda, ne eshinywa shianje shisinjiile shilunji, nabio ebinywa bienywe biikhung'asiye khushianje, nibishiinamila.”

⁸Abasiani babwe abo nibareeba Yosefu bari, “Kho toto mwene olakhuruka ifwe? Noho olaba nobunyali khwifwe?” Mana abasiani babwe abo nibameeta okhusila Yosefu khulwa amalooroke nende amakhuwake ako.

⁹Khandi Yosefu naloora lilooro lindi, ne naboolela abasiani babwe ari, “Eloorile lilooro lindi, eliuba, omwesi nende tsing'ining'ini ekhumi nandala tsibeele nitsinzinamilanga.”

¹⁰Ne olwa Yosefu yaboolela samwana nende abasiani babwe, papawe yamuhalabila namureeba ari, “Nililooro shiina elioloorile elo? Opaara mbu, toto isie, mamawo nende abasiani benywe khulakhwinamila?”

¹¹Ne abasiani babwe Yosefu nibamukhalishila omukongo, naye samwana nayililisia khumakhuwa ako.

¹²Inyanga yindi abasiani babwe Yosefu batsia okhwaya ebiayo bia samwana, ahambi nende Shekemu.

¹³Ne Yakobo nareeba Yosefu ari, “Abasiani benywe shibatsiile okhwaya ebiayo Shekemu? Kho yitsa ekhurume otsie khubo.” Yosefu naboolela samwana ari, “Enjamile okhutsia.”

¹⁴Kho samwana namuboolela ari, “Tsia olole abasiani benywe nibaba nibaliyo obulayi nende ebiayo, mana witse umboolele.” Kho naruma Yosefu okhurula mwibanda lia Heburoni natsia niyoola Shekemu.

¹⁵Olwa Yosefu yali nali hambi okhuula Shekemu, omusaatsa undi yamunyoola nachenda chendanga mumukunda, ne omusaatsa oyo namureeba ari, “Okhaabanga shiina?”

¹⁶Naye Yosefu namukalusia ari, “Ekhaabanga abasiani befwe, ekhusaaya mbu, umboolelekhwo aha bali.”

¹⁷Mana omusaatsa oyo nakalusia Yosefu ari, “Bamalile okhutsia shichila embuliile nibaboolanga mbu, ‘Chende khutsie Dotsani.’ ” Kho Yosefu nalonda khubasiani babwe, nabanyoola nibali Dotsani.

¹⁸Abasiani babwe nibalola Yosefu nashili ehalekhwo, ne olwa yali nashili okhuula, baboolelana nibarechelesiania okhumwira.

¹⁹Nibaboola abeene khu beene bari, “Owamalooro ngwoyo yetsanga.

²⁰Yitse, khumwire mana khumusukune mwiyabo eliamaatsi kakhamamwo, mana khuboole mbu, isolo nabulimo yimuliile, mana khulolekhwo mbu, amalooroke ako kalaba karie.”

²¹Nebutswa olwa Rubeni yahulila, yahonokosia Yosefu okhurula mumakhono kabwe nababoolela ari, “Khulamwire tawe.”

²²Khandi Rubeni nababoolela ari, “Mushilenje shiokhumwira, mumusukune mwiyabo lino elili mushitsiimi.” Rubeni yaboola ario kho mbu, anyalilwe okhuhonokosia Yosefu okhurula khubasiani babwe kho mbu, Yosefu akalushile samwana.

²³Kho olwa Yosefu yoola aha bali, bamutiila nibamufwalula ikanzuye irambi, eya yali niyefwalile.

²⁴Nibamutiila nibamusukuna mwiyabo, eliamaatsi kali nikakhamamwo.

²⁵Mana nibekhala hasi okhulia, ne nibachinguula tsimoni, nibalola omukanda kwabandu ba Ishimaeli nikurulanga Giliadi, nikuli netsingamia nitsichinjile obubane, amafura keshing'ari eshilayi nende manemane, nikuchendanga nikukholomokha nikutsia Misiri.

²⁶Mana Yuda nareeba abasiani babwe ari, “Niyinganga shiina eya khulanyoola nikhwira omusiani wefwe, mana okhufwakhwe khuleshe okhumanyikha?

²⁷Chende khumukusie khubandu ba Ishimaeli abali aba Midiani ne shikhulamusaalisia ta, shichila nomusiani wefwe, amatsaayi kefwe keene.” Mana abasiani babwe nibafuchilila.

²⁸Mana olwa abakholi beinganga ba Midiani boolaho, abasiani babwe Yosefu nibakhwesa Yosefu okhurula mwiyabo omwo, mana nibamukusia khu Abaishimaeli abo ebitonye bieifetsa amakhumi kabili, nabo Abaishimaeli abo nibamuyila Misiri.

²⁹Ne olwa Rubeni yakalukha khwiyabo nanyoola mbu Yosefu abulamwo, yarandula ebifwalobie niyelukha.

³⁰Mana nakalukha khubasiani babwe, nababoolela ari, “Omuraaka oyo shialimwo ta, nasi, kho nenzie heena?”

³¹Mana nibasinza imbusi nibabukula ikaanzu ya Yosefu nibeenikha mumalasile.

³²Kho nibayilila samwana ikaanzu eyo, nibamuboolela bari, “Khuchitoolile, henjelesia olole niyiba niyili ikaanzu yomusianiwo noho ta.”

³³Samwana nachimanyilisia naboola ari, “Niyikaanzu yomusiani wanje. Isolo nabulimo yiliile omwana wanje, yiranduemwo ebitonye ebitonye.”

³⁴Mana Yakobo narandula ebifwalobie, niyeboha amakunia mushishienjeshie mushibeela niyekhuula omusianiwe khulwa tsinyanga tsinyinji.

³⁵Abasianibe nabakhaanabe boosi halala nibeetsa okhumulemia omwoyo. Naye Yakobo nakhaya nababoolela ari, “Tawe, isie ndalafwa neshikhuulanga omwana wanje.” Mana Yakobo natsiililila okhwikhuula omusianiwe.

³⁶Ebise bienebio, Abamidiani nabo bali nibakusiye Yosefu Misiri khu Potifa, omwimilisi wabelihe liomuruchi wa Misiri.