Read wanga OBUCHACHILO 38 Bible Online

OBUCHACHILO 38 - wanga bible

OBUCHACHILO 38

¹Mutsinyanga etsio, Yuda yalekha abasiani babwe, ne natsia okhumenya nende omusaatsa undi Omuadulami oulangwa mbu, Hira.

²Ne Yuda nali ebweneyo, yalola omukhaana undi Omukanani, owa samwana yalangwa mbu, Shua, ne namuteeshia.

³Mana omukhaana oyo nahela inda, ne niyebula omwana omusiani, ne Yuda namukulikha mbu, Eri.

⁴Khandi Shua nahela inda niyebula omwana omusiani ne namukulikha mbu, Onani.

⁵Khandi nameeta niyebula omwana undi omusiani ne namukukulikha mbu, Shela. Olwa Shela yebulwa, Yuda yali nali Keziba.

⁶Olunyumakhwo, Yuda yabashila omusianiwe omwikulanda oulangwa mbu Eri, omukhasi owalangwa mbu, Tamari.

⁷Nebutswa Eri yali omumayanu imbeli wa OMWAMI Nyasaye, ne OMWAMI Nyasaye namwiira.

⁸Mana Yuda naboolela Onani ari, “Tsia khumukhasi womusiani wenywe Eri, omukalusie shichila iwe oli mulamunyene omukhasi oyo, obuusilie omusiani wenywe olwibulo.”

⁹Nebutswa Onani yamanya mbu, abaana shibalaba abeebe ta, kho buli olwa yakonanga nende omukhasi womusiani wabwe oyo, Onani yatsukhanga butswa elwanyi hasi kho mbu, aleshe okhubuusilia omusiani wabwe olwibulo.

¹⁰Aka Onani yakhola kasinyisia OMWAMI Nyasaye, mana Nyasaye namwiira.

¹¹Mana Yuda naboolela Tamari omukhasi womusianiwe ari, “Tong'a butswa noli omukhasi omulekhwa munzu yapapawo, omenye okhuula lwomusiani wanje Shela aliba nakhulile,” shichila yali noburi mbu, Shela yesi yakhafwa shinga abasiani babwe. Kho Tamari nakalukha ingo wabwe namenyayo.

¹²Olunyumakhwo omukhasi wa Yuda, owali omukhaana wa Shua nafwa. Ne olwa Yuda yali namalile amasika, yatsia Timuna nende omwitsawe Hira Omuadulami, ewa amakondike katetulungwa obwoya.

¹³Ne olwa Tamari yaboolelwa ari, “Nyakhufialayo atikulukhanga natsia Timuna okhuteta obwoya bwamakondike,”

¹⁴Tamari yefwalula ebifwalobie ebiobulekhwa, niyeboha olububi niyefuunikha obwenibwe, niyekhala hashiliibwa eshihenjile Enaimu, litookho eliali khunjila yitsia Timuna. Tamari yali namanyile mbu, Shela omusiani omushe wa Yuda yali namalile okhukhula. Naye Shela shiyali niyaboolelwa mbu, akalusie Tamari tawe.

¹⁵Olwa Yuda yalola Tamari, yapaara mbu nomutamba, shichila Tamari yali niyefuuniishe obwenibwe.

¹⁶Yuda natsia aha Tamari yali, handulo womwanda ne namuboolela ari, “Yitsa khukone ninawe,” shichila shiyali namanyile mbu, ni nyakhufialanyene tawe. Tamari namureeba ari, “Nengona ninawe olambelesia shiina?”

¹⁷Yuda nakalusia Tamari ari, “Ndalakhurumila eshimeeme shieimbusi okhurula mubiayo bianje,” naye Tamari nareeba ari, “Olambelesia omusingo bulano okhuula lwolareera eshimeeme eshio noho?”

¹⁸Yuda namukalusia naboola ari, “Omusingo shiina okwa wenya mbu, ekhuhelesie? Tamari namukalusia ari, Ingaka yeshibalikho nende olutsaha lwayo neindabushi yili mumukhonokwo eyo.” Kho Yuda nahelesia Tamari ebindu ebio, ne nakona ninaye, ne Tamari nahela inda.

¹⁹Mana Tamari nabuukha natsia niyefwalula olububi olwo, nafwala ebifwalo biomukhasi omulekhwa.

²⁰Olwa Yuda yaruma omwitsawe Omuadulami okhuyilila Tamari eshimeeme shieimbusi, mbu abukule ebiomusingo, akalusilie Yuda,

²¹Hira shiyanyoola Tamari naliyo tawe. Hira nareeba abandu bali nibaliho, ari, “Omutamba owali Enamu khulubeka womwanda ali heena?” Nabo nibamukalusia bari, “Omutamba yesi yesi shiabetsangakwo hano tawe.”

²²Kho Hira nakalukha ewa Yuda, ne namuboolela ari, “Shiemunyoolileyo tawe. Kata khandi abandu bamenyayo bambooleele bari, ‘Omutamba yesi yesi shiabetsangakhwo hano tawe.’ ”

²³Yuda namukalusia ari, “Lekha omutamba oyo atoonye nende ebindu ebio, bibe ebibie, abandu bakhetsukhana bakhutsekha. Isie embeele nekhurumile mbu, omurunje, nebutswa shiomunyoolileyo tawe.”

²⁴Olunyuma lwemiesi chitaru, Yuda yaboolelwa ari, “Nyakhufialayo Tamari, yekholile omutamba mana ahelile inda yomwana wobutamba.” Naye Yuda naboola ari, “Muyinie elwanyi mana asambwe afwe.”

²⁵Shinga olwa Tamari yali nayilungwa elwanyi, yarumila nyakhufialanyene likhuwa naboola ari, “Ndahela inda eyomusaatsa mwene ebindu bino, emusaaya mbu, muhenje obulayi mwene ebindu bino, ingaka yeshibalikho, olutsaha lwayo nende indabushi.”

²⁶Mana Yuda namanyilisia mbu, ebindu ebio nebibie, ne naboola ari, “Tamari nomulunjishi okhushila isie. Ni toto, okhuba shindamuhaana khumusiani wanje Shela okhumukalusia tawe.” Okhuchaaka inyanga eyo Yuda shiyakonakhwo nende Tamari khandi tawe.

²⁷Olwa ebise biola ebiokhwibula khwa Tamari, kanyoolekha mbu, yali neinda yamakhwana.

²⁸Ne olwa Tamari yali nalumungwa, omwana mulala yarusia omukhonokwe elwanyi mana omukhasi owamwibusia natiila omukhonokhwo naboyakhwo oluusi olwakhanyu ne naboola ari, “Uno niye ouranjiliile okhwibulwa.”

²⁹Nebutswa lwomwana oyo yakalusia omukhonokwe munda, omusiani wabwe naranjilila okhwibulwa. Omukhasi webusinjia oyo naboola ari, “Kho nolwa orula elwanyi orio!” Omwana omusiani oyo nakulikhwa mbu, Perezi[19].

³⁰Mana olunyumakhwo, omusiani wabwe niyebulwa nali noluusi olwakhanyu khumukhohokwe, ne nakulikhwa mbu, Zera.