Read wanga OBUCHACHILO 39 Bible Online

OBUCHACHILO 39 - wanga bible

OBUCHACHILO 39

¹Yosefu yayilwa Misiri, ne Potifa, mulala khubemilisi bomuruchi, nakula Yosefu okhurula khu Abaishimaeli abali nibamureerireyo.

²OMWAMI Nyasaye yali halala nende Yosefu ne namukhoonya okhukhola buli shindu obulayi, kho Yosefu namenya munzu ya Potifa.

³Mana omwamiwe nalola mbu, OMWAMI Nyasaye yali halala nende Yosefu, khandi mbu, OMWAMI Nyasaye niye ouchilanga amakhuwa ka Yosefu koosi nikaba amalayi.

⁴Kho Yosefu nakhalabanila Potifa khandi namuchamisia muno, naye omwamiwe oyo nakhola Yosefu okhuba omusinjilili weinzuye khandi owebindu bia yali ninabio biosi.

⁵Okhurula khubise bia Potifa yakhola Yosefu okhuba omusinjilili weinzuye nende webindubie biosi ebia yali ninabio, OMWAMI Nyasaye yahelesia inzu ya Potifa ikhabi khulwa Yosefu. OMWAMI Nyasaye yara ikhabi mubindu biosi ebia Potifa yali ninabio munzuwe nende mumukundakwe.

⁶Kho Potifa nalekha ebindu bia yali ninabio biosi mumakhono ka Yosefu, khadi Potifa nalateebakhwo eshindu shiosi shiosi ta, habula eshiokhulia eshia yalitsanga shionyene. Yosefu yali owelikondo lilayi khandi nomubili omulayi.

⁷Ne olunyuma lweshise shitiiti, omukhasi wa Potifa yachaaka okhwikomba Yosefu, ne namuboolela ari, “Chenda khukone ninawe.”

⁸Nebutswa Yosefu yaloba ne naboolela omukhasi wa Potifa oyo ari, “Lola, omwami wanje shiatebangakhwo eshindu shiosi shiosi munzu muno ta, okhuba isie endi hano, yalekha ebindu biosi ebia ali ninabio mubunyali bwanje.

⁹Isie endi nende obunyali munzu muno obuhela shinga obwa ali ninabwo. Ne shiyayanzikalilakhwo okhutiila khushindu shiosi shiosi munzu muno ta, okhuyiniakhwo iwe wenyene, shichila oli omukhasiwe. Ndakhakhola endie obumayanu obukhongo shinga buno nikhola obwonooni imbeli wa Nyasaye?”

¹⁰Kata buli lwosi lwomukhasi oyo yareeba Yosefu, Yosefu shiyafuchilila amakhuwake kokhukona ninaye noho kata okhuba ninaye tawe.

¹¹Nebutswa inyanga yindi, olwa Yosefu yenjila munzu okhukhola emilimochie, omundu yesi yesi owomunzu omwo nalalimwo ta,

¹²omukhasi oyo yakwa khunguboye naboola ari, “Khukone ninawe.” Nebutswa Yosefu yelukha narula munzu omwo, nalekha inguboye mumakhono komukhasi oyo.

¹³Ne lwomukhasi oyo yalola mbu, Yosefu yeluushe arulile munzu omwo ne aleshile inguboye mumakhonoke,

¹⁴yalanga abandu bomuzumwe nababoolela ari, “Lolekhwo amakhuwa kano, omusaatsa wanje yakhureereere Omuheburania okhukhufwola ifwe. Yetsile munzu muno niyenya mbu khukone ninaye, nasi nikhupa tsimbungu.

¹⁵Ne olwa ahuliile nikhupa tsimbungu, yeluushe narula elwanyi, ne niyandeshela inguboye.”

¹⁶Mana nabiikha ingubo eyo aha yali, okhuula lwomwamiwe yachelela hango,

¹⁷ne namuboolela amakhuwa katsana ako ari, “Omukhalabani Omuheburania, owa wakhureerera yetsile mushisika shianje niyafwola,

¹⁸nebutswa olwekhupile tsimbungu, yeluushe narula elwanyi ne niyandeshela inguboye.”

¹⁹Olwa omwamiwe yahulila omukhasiwe namuboolela ari, “Nolwa omukhalabaniwo yakholile ario,” yatiilwa noburima.

²⁰Mana omwamiwe nabukula Yosefu ne namura mumbohe, ewa ababohe bomuruchi bekalilungwa.

²¹Nebutswa OMWAMI Nyasaye yali halala nende Yosefu, namuhelesia ikhabi, mana omulindi womumbohe nachamisibwa ninaye.

²²Mana omulindi womumbohe niyemekha Yosefu okhuba omukhongo wababohe bashie, khandi namukhola oukhusinjilila amakhuwa koosi akekholekhanga mumbohe omwo.

²³Omulindi oyo shiyasinjililakhwo eshindu shiosi shiosi eshiali mubunyali bwa Yosefu ta, shichila OMWAMI Nyasaye yali halala nende Yosefu, ne liosi liosi elia Yosefu yakholanga, OMWAMI Nyasaye yalikholanga okhuba lilayi.