Read wanga OBUCHACHILO 4 Bible Online

OBUCHACHILO 4 - wanga bible

OBUCHACHILO 4

¹Mana Adamu naba nende Hawa omukhasiwe ne Hawa nahela inda niyebula Kaini. Ne naboola ari, “Enyoolile omwana omusiani okhubirira mubunyali obwa OMWAMI Nyasaye.”

²Mana khandi niyebula Abeli, omusiani wabwe Kaini, omutiitii. Abeli yali omuruchi wamakondi naye Kaini yali omulimi weliloba.

³Olunyuma lwetsinyanga tsindiiti, Kaini yareerera OMWAMI Nyasaye eshihaanwa okhurula khubiamo biomumukunda,

⁴naye Abeli nareera inyama yamasinya okhurula khu ebiayobie ebikulanda. Mana OMWAMI Nyasaye nafuchilila eshihaanwa shia Abeli.

⁵Nebutswa shiyafuchilila eshihaanwa shia Kaini tawe. Kho Kaini nasinyikha muno, ne nakhuunia obwenibwe.

⁶Kho OMWAMI Nyasaye nareeba Kaini ari, “Mbushiina nosinyikha? Ne mbushiina nokhuunia obwenibwo?

⁷Noba nokhola amalayi, shiofuchililwa? Ne noba nolakhola amalayi ta, obwonooni bukhukonesheele hamuliango, bukhwikombanga iwe, nebutswa okhuula obuhule.”

⁸Kho Kaini nabooleela Abeli omusiani wabwe ari, “Chenda kutsie mumukunda.” Ne olwa bali nibali mumukunda, Kaini yakalukhana khumusiani wabwe ne namwira.

⁹Mana OMWAMI Nyasaye nareeba Kaini ari, “Omusiani wenywe Abeli ali heena?” Kaini namukalusia ari, “Isie shiemanyile ta. Nasi endi omulindi womusiani wefwe?”

¹⁰OMWAMI Nyasaye namureeba ari, “Nishiina eshiokholile shino? Omwoyo kwamabanga komusiani wenywe kuhaabanga okhurula mwiloba.

¹¹Ne bulaano onyoolile eshilaamo shiobubi okhurula khwiloba, eliasame omunwa kwalio okhunywa amabanga komusiani wenywe, aka oraatsiye.

¹²Olwa oba nolima khwiloba shililakhwamilia ebiamo bialio ta, olaba omusuusuumi butswa khandi omuchendachendi khushialo.”

¹³Kaini naboolela OMWAMI Nyasaye ari, “Eshinyasio shianje neshikhongo muno, eshiandalanyala okhwifwila tawe.

¹⁴Lola inyanga yino unondile okhurula mumukunda kuno. Khandi unondile okhurula ewa oli. Nditsa okhuba omusuusuumi khandi omuchendachendi khushialo, ne omundu yesi yesi ounyoola alanzira.”

¹⁵Mana OMWAMI Nyasaye namubooleela ari, “Shikali kario ta, omundu yesi yesi naba nakhwira, alamalilwakhwo eshikwoli khulwa okhwirwa khwabandi musaafu.” Mana OMWAMI Nyasaye nara eshimanyisio khu bweni bwa Kaini kho mbu, omundu yesi yesi oumunyoola aleshe okhumwira ta.

¹⁶Kho Kaini narula aha OMWAMI Nyasaye yali, ne natsia okhumenya mushialo eshilangwa mbu, “Obuchendichendi,” eshili ebukwe wa Edeni.

¹⁷Kaini naba nende omukhasiwe ne omukhasiwe oyo nahela inda, niyebula Enoka. Khandi niyombakha litookho ne nakulikha mbu, Enoka, eliali eliira liomusianiwe.

¹⁸Enoka yebula Iradi, naye Iradi niyebula Mehujaeli, Mehujaeli niyebula Metsushaeli, Metsushaeli niyebula Lameki.

¹⁹Naye Lameki nateeshia abakhasi babili. Eliira liomukhasi mulala liali mbu, Ada, ne elioundi liali mbu, Zila.

²⁰Ada yebula Yabali, owali samwana abamenyanga mumaheema nibaruka tsing'ombe.

²¹Eliira liomusiani wabwe Yabali liali Yubali, naye niye owali samwana abakhupanga litungu nende eshitsiliba.

²²Zila naye niyebula Tubali-Kaini, owali omwiranyi webimili nende ebibia. Omukhaana wabwe Tubali-Kaini yali Nahama.

²³Mana Lameki naboolela abakhasibe ari, “Ada nende Zila, hulile amakhuwa kanje, inywe abakhasi banje murecheresie aka emboola. Isie ndeera omundu okhuba yali niyasaalisiye, ndeera omundu omuraaka, okhuba yali niyasaalisiye.

²⁴Nikaba mbu, Kaini alirungwa eshikwoli akhandi musaafu, mubwatoo, Lameki naye yakharungwe eshikwoli akhandi amakhumi musaafu namusaafu.”

²⁵Mana Adamu naba nende Hawa omukhasiwe ne niyebula omwana omusiani, namukulikha eliira mbu, Setsi okhuba yaboola ari, “Nyasaye yambelesiye omwana undi omusiani mushilenje shia Abeli, owa Kaini yeera.”

²⁶Naye Setsi yesi niyebula omwana, ne namukulikha eliira mbu, Enoshi. Ne ebise ebio abandu nibachaaka okhuhabila OMWAMI Nyasaye muliiralie litakatifu.