Read wanga OBUCHACHILO 40 Bible Online

OBUCHACHILO 40 - wanga bible

OBUCHACHILO 40

¹Olunyuma olweshise shitiiti, omukholi womunzu womuruchi wa Misiri nende omufuchi omukhongo womuruchi, bonoonela omuruchi wabwe.

²Mana omuruchi nasinyishila abakholi babili abo.

³Omuruchi nabayila mumbohe eyali munzu yomusinjilili wa balindi bomuruchi, eya Yosefu yali niyabohwamwo.

⁴Bamenya mumbohe khulwa oluhoono olurambi ne omusinjilili wabalindi bomumbohe oyo nakhola Yosefu okhuba omukhongo wabwe.

⁵Inyanga yindi mushilo nibali mumbohe, omukholi womunzu oyo nende omufuchi omukhongo oyo, baloora amalooro akahukhaane khandi buli lilooro liali neshisina shialio.

⁶Olwa Yosefu yetsa khubo nibushiele, yalola nibalali nomulembe ta,

⁷ne Yosefu nareeba abakholi bomuruchi abayali niyabowa ninabo munzu yomwami wabwe abo ari, “Mbushiina mukhuuniye obweni bwenywe inyanga yino?”

⁸Nabo nibamukalusia bari, “Khuloorire amalooro ne abulaho ounyala okhukhuboolela eshisina shiako tawe.” Mana Yosefu nababoolela, “Nyasaye niye ouhaananga obunyali bwokhubuula eshisina eshia amalooro.” Khandi Yosefu naboolela ari, “Nimuchama mboolelekhwo amalooro kenywe tsana.”

⁹Kho omukholi womunzu oyo niyenoosilia Yosefu lilooroolie, naboola ari, “Mwilooro lianje, enduutsi omusaala kwomutsabibu,

¹⁰ne khumusaala okwo amasaka kabelekhwo kataru. Olwa amasaafu kachaachile okhumelakhwo butswa, nabio ebimuli nibimulikhakhwo, nolwa emitsabibu chienjilekhwo butswa chirio.

¹¹Nasi embeele nendiilile eshikombe shiomuruchi mumakhono kanje. Kho nembukula emitsabibu emiengu echio nechitiinyila mushikombe shiomuruchi eshio ne nera eshikombe eshio mumakhono komuruchi.”

¹²Mana Yosefu namuboolela ari, “Eshisina shieliloorolio njieshino. Amasaka kataru ako ni tsinyanga tsitaru.

¹³Mutsinyanga tsitaru, omuruchi alakhulekhuula okhurula mumbohe muno, ne alakhubeela nende okhukhukalusia khumilimochio, ne olahelesinjia omuruchi eshikombeshie shinga olwa wakholanga khale, noli omukholi womunzuwe.

¹⁴Nebutswa olwa nobe noli obulayi, unzitsulile, mana ukholelekhwo eliekhusaaya. Nochama oboolekhwo amakhuwa kanje imbeli womuruchi ukhoonye siesi erule mumbohe muno.

¹⁵Okhuba toto mwene ndebwa okhurula mushialo shia Abaheburania, ne kata mumbohe omwa endi muno, shibulaho eshiandakhola eshichila nembohwa tawe.”

¹⁶Olwa omufuchi womuruchi oyo yalola mbu, eshisina shielilooro elo neshiokhuchamisia, yaboolela Yosefu ari, “Siesi embeele nelilooro. Embeele nenjelekhasiye ebimwelo biemikaate bitaru khumurwe kwanje.

¹⁷Ne eshieikulu shiene shibeelemwo ebiokhulia ebiahukhaane ebiteesheelwe omuruchi. Nebutswa amanyonyi kabibotsilenje okhurula mushimwelo shibeele khumurwe kwanje.”

¹⁸Mana Yosefu namukalusia ari; “Eshisina shieliloorolio njieshino mbu, ebimwelo bitaru ebio ni tsinyanga tsitaru.

¹⁹Mutsinyanga tsitaru, omuruchi wa Misiri alakhulekhuula, ne alakhukhalaka omurwekwo akhurusiekhwo! Khandi alakhubamba khumusaala, ne amanyonyi kalabootsa inyama yomubilikwo.”

²⁰Khunyanga yakhataru, inyanga eyali yokhwitsulila okhwibulwa khwomuruchi, omuruchi yakaasilia abakholibe boosi lisabo, ne nalekhuula omukholiwe wmunzu oyo nende omufuchiwe oyo okhurula mumbohe, ne nabareera imbeli wabakhongobe.

²¹Omuruchi oyo nakalusia omukholiwe womunzu oyo khumilimochie chiomunzu,

²²ne nabamba omufuchi womunzuwe oyo shinga olwa Yosefu yali nabafumululiile amalooro kabwe.

²³Nebutswa omukholi womunzu womuruchi oyo shiyayetsulilakhwo Yosefu ta, yamwibilila butswa.