Read wanga OBUCHACHILO 41 Bible Online

OBUCHACHILO 41 - wanga bible

OBUCHACHILO 41

¹Emiyika chibili nichihwele, omuruchi wa Misiri yaloora mbu, abeele nasinjiile ahambi khumwalo kwa Naili,

²ne nalola tsing'ombe musaafu etsianera khandi etsianula nitsitikulukhanga okhurula mumwalo kwa Naili, nitsiaya obunyasi bweliise.

³Khandi nalola tsing'ombe tsindi musaafu, etsiang'aha khandi tsiasaamuukha nitsitikulukhanga okhurula mumwalo kwa Naili, nitsiloondakhwo. Mana nitsisinjila ahambi nende etsindi etsio khulukuku lwomwalo kwa Naili.

⁴Mana tsing'ombe musaafu etsiang'aha etsio nitsilia tsing'ombe musaafu, etsinula khandi etsianera etsio. Mana omuruchi oyo nabuukha mutsindoolo.

⁵Mana nakona tsindoolo khandi, ne olwa tsindoolo tsiamuyila, yaloora olwa khabili, nalola emirwe musaafu echieimele, eminefu khandi emilayi echiali nichimelanga okhurula khushisina shilala.

⁶Mana olunyuma, nalola emirwe chindi musaafu echieimele eminyelele khandi echiafululukha khulwa omuyeka kweshimiyu.

⁷Mana emirwe musaafu echieimele eminyelele echio nichimila emirwe musaafu echietsulakhwo imele echio. Omuruchi yasisimukha okhurula mundoolo ne namanya mbu, abeele nalooranga.

⁸Kho olwa bwashia yahenda omwoyo ne narumasia mbu, abafumu ba Misiri boosi nende abandu bobusitsa mushialo shia Misiri boosi bareerwe. Omuruchi nababoolela amalooroke, nebutswa abulaho owanyala okhwinoosia eshisina shiako khuye tawe.

⁹Mana omukholi womunzu womuruchi naboolela omuruchi ari, “Omuruchi, nditsuliile obumayanu bwanje inyanga yino.

¹⁰Olwa iwe omuruchi wali nokhusinyishiile, wakhuyila mumbohe, eyali munzu mwomusinjilili wabalindi bomuruchi, isie nende omufuchiwo omukhongo.

¹¹Inyanga yindi mushilo, buli mulala khwifwe yaloora lilooro, ne amalooro tsana ako kali ende ebisina ebiahukhaane.

¹²Omuraaka omuyahudi yali naliho ninefwe, owali omusumba womusinjilili wabaliindi. Ne olwa khwamwinoosia amalooro kefwe yakhuboolela eshisina shiamalooro kefwe ako, ne naboolela buli mundu eshisina shieliloorolie.

¹³Ne shinga olwa yakhwinoosilia eshisina shiako, nolwa kamala nikekholekha kario. Isie ndakalusibwa khumilimo chianje ne omuteshi wemikaate nabambwa.”

¹⁴Mana omuruchi narumasia mbu balanje Yosefu, nibamureera lwangu lwangu okhurula mumbohe, ne olwa yali niyebechile liswi nende okhwikalukhasia tsingubotsie, yetsa imbeli womuruchi.

¹⁵Mana omuruchi naboolela Yosefu ari, “Endoorire lilooro, ne abulaho ounyala okhunzinoosilia eshisina shialio tawe. Ne embulile nibaboola khwiwe mbu, nohulila lilooro onyala okhubuula eshisina shialio.”

¹⁶Yosefu nakalusia namuboolela ari, “Omwami shiendi isie tawe, ni Nyasaye oulakhuhelesia eshisina shieliloorolio.”

¹⁷Kho omuruchi naboolela Yosefu ari, “Mwilooro lianje, embeele nesinjiile khulukuku lwomwalo kwa Naili.

¹⁸Ne nindola tsing'ombe musaafu etsianera, khandi etsinula nitsitikulukhanga okhurula mumwalo kwa Naili, nitsiayanga obunyasi bweliise.

¹⁹Natsio etsindi musaafu nitsikulukha nitsitsilondakhwo. Etsio tsiali tsimbi, nitsiarula amakumba khandi nitsiang'aha, etsiashili kata okhulolakhwo mushialo shia Misiri tawe.

²⁰Mana tsing'ombe musaafu, etsiarula amakumba khandi etsiang'aha etsio nitsimila musaafu tsinefu tsiaranjilila etsio.

²¹Nebutswa olwa tsiamila tsing'ombe tsinefu etsio, shiyaliho owamanya mbu, tsimilile ta, okhuba tsiali nitsishing'ang'uushile butswa shinga olwambeli! Mana nesimukukha okhurula mundoolo.

²²Khandi ningona ne nindola mwilooro emirwe echieimele musaafu eminefu khandi emilayi nichimelanga khushisina shilala.

²³Olunyuma nindola emirwe musaafu echieimele eminyelele khandi echiafululukha khulwa omuyeka kweshimiyu kwomushiangalamwe.

²⁴Mana emirwe musaafu eminyelele echio nichimila eminefu musaafu echio. Ndabooleelekhwo abafumu, nebutswa abulaho kata mulala owayanzinoosiye eshisina shiako tawe.”

²⁵Mana Yosefu naboolela omuruchi ari, “Omwami, eshisina shiamalooroko ni shilala butswa, Nyasaye akhubisuliile aka ali ahambi okhukhola.

²⁶Tsing'ombe musaafu tsindayi etsianera etsio nemiyika musaafu, ne emirwe musaafu eminefu echio nemiyika musaafu, ne lilooro elo nelala.

²⁷Tsing'ombe musaafu etsiang'aha muno, etsiitsile nitsiloondakhwo etsio, nemiyika musaafu, ne emirwe emikhaya musaafu echiafululukha khulwa omuyeka kweshimiyu okhurula ebukwe echio, nemiyika musaafu echieinzala.

²⁸Omwami kali shinga olwa ekhubooleele. Nyasaye akhumanyiye aka ali ahambi okhukhola.

²⁹Emiyika chitsiokhubaho musaafu, echieshiokhulia shilabaho eshinji muno mushialo shia Misiri.

³⁰Nebutswa olunyuma lwemiyika musaafu, chililondakhwo emiyika chieinzala, ne inzikura yoosi yakhebililwe mushialo shia Misiri, inzaala eyo yakhamulule eshialo shino.

³¹Khulwokhuba inzala eyo yakhabe indulu, eshiokhulia shishiakhabekhwoho mushialo tawe.

³²Okhukalushilwa khweliloorolio akhandi khabili khumanyisia mbu, Nyasaye amalile okhutinyisia likhuwa elo ne okhuula alaliusia olunyuma lwebise bitiiti.

³³“Khulweshio bulano, okhoyile okhulobola omundu omurecherefu khandi omuchesi omwemeshe asinjilile eshialo shia Misiri.

³⁴Khandi olobole abandi basinjililile eshialo mana obukule eshitonye shiakharano shiokhubichese biomushialo shia Misiri khulwa oluhoono lwemiyika musaafu chieinzikura.

³⁵Mana obaboolele babunjelesie ebiokhulia biosi ebiemiyika echiitsanga chieinzikura echio, babiishe imele eyo mubiachi hasi wobunyalibwo.

³⁶Eshiokhulia eshio shiakhabe shiokhuhonia eshialo mumiyika musaafu chieinzala eyitsanga mushialo shia Misiri, kho mbu abandu baleshe okhusikha okhubirila munzala.”

³⁷Tsinganakani tsia Yosefu etsio tsiachamisia omuruchi nende abakhulundu bomushinashie boosi.

³⁸Kho omuruchi nareeba abakhulundu bomushiinashie ari, “Omundu alikhwoho toto owetsulamwo Roho wa Nyasaye shinga uno?”

³⁹Mana omuruchi naboolela Yosefu ari, “Okhuba Nyasaye akhubisuliile kano koosi, bulano oundi omurecherefu khandi owobusitsa shinga iwe abulaho tawe.

⁴⁰Niwe oulaba omusinjilili weshialo shianje, ne abandu banje boosi balakhola shinga lwobalaka. Habula nisie oulaba omukhongowo sienyene, okhuba nisie omuruchi.”

⁴¹Mana omuruchi naboolela Yosefu ari, “Ekhwahuule okhuba omukhongo khubandu beshialo shia Misiri shiosi.”

⁴²Mana omuruchi oyo nabukula ingakaye yomukasa nafwala khumukhono kwa Yosefu, nende okhumusiaha nende ebifwalo bietsingubo tsiobukusi tsieikitani, ne nara olunyolo lweitsahabu mwikosi mwa Yosefu.

⁴³Mana namufuchilila okhuchendela mwikaari liakhabili lioburuchi. Mana abelihe nibemila imbeliwe nibayiba nomwoyo omukhongo bari, “Sikame hasi!” Nolwa omuruchi oyo yemekha Yosefu okhusinjililila eshialo shia Misiri ario.

⁴⁴Okhumeeta khwako, omuruchi wa Misiri yaboolela Yosefu ari, “Isie nisie omuruchi, ne omundu yesi yesi shialachinguulakhwo omukhonokwe noho kata eshilenjeshie mushialo shia Misiri shiosi iwe nolamufuchiliile tawe.”

⁴⁵Kho omuruchi oyo nakulikha Yosefu mbu, Zefenatsi-Paneha. Khandi namuhelesia Asenatsi omukhaana wa Potifera, omwisaaliisi welitookho lia Oni, okhuba omukhasiwe. Mana Yosefu nachenda mushialo shia Misiri shiosi.

⁴⁶Olwa Yosefu yachaaka okhukhalabanila omuruchi weshialo shia Misiri, yali nali nemiyika amakhumi kataru. Mana Yosefu narula mulwanyi lwomuruchi, ne nachenda mushialo shia Misiri shiosi.

⁴⁷Eshialo shia Misiri shiarusia eshiokhulia mubunji khulwemiyika musaafu chieinzikura.

⁴⁸Mana olwa eshiokhulia shialiho mubunji mushialo shia Misiri khulwemiyika musaafu echio, Yosefu yabunjelesia eshiokhulia shiosi, nashibiikha mubiachi mumatookho. Yabiikha eshiokhulia buli mwitookho, eshia yachesa okhurula mumikunda chili ahambi ninalio.

⁴⁹Mana Yosefu nabiikha imele inyinji muno, niyitsula shinga omuyeshe kwomunyanza, kata nalekha okhuyichela, okhuba shiyakhanyaliilwe okhuyichela yoosi tawe.

⁵⁰Emiyika chieinzala nichishili okhuula, Yosefu yali nanyoolile abaana abasiani babili, abebulwa nende Asenatsi omukhaana wa Potifera omwisaaliisi welitookho lia Oni.

⁵¹Yosefu nakulikha owambeli mbu, Manase, eshisina mbu, okhwibilila, okhuba yaboola ari, “Nyasaye yakholile okhwibilila omatinyu kanje nende aka abeinzu ya papa wanje koosi.”

⁵²Yakulikha owakhabili mbu, Efuraimu, eshisina mbu, okhwibula, okhuba yaboola ari, “Nyasaye yambelesiye omwana mushialo shiamanyakhano kanje.”

⁵³Emiyika musaafu echia inzikura yaliho mushialo shia Misiri chiola khushiakamo.

⁵⁴Mana emiyika musaafu echieinzala nichichaaka okhwitsa shinga olwa Yosefu yali niyaboola. Inzala yaliho mubialo bindi biosi. Nebutswa mushialo shia Misiri, eshiokhulia shialimwo.

⁵⁵Olwa inzala yenjila mushialo shia Misiri shiosi, abandu bahaabila omuruchi nibenya eshiokhulia. Omuruchi naboolela Abamisiri boosi ari, “Mutsie khu Yosefu, ne eshialamuboolela mukhole.”

⁵⁶Kho olwa inzala yali niyitswanile eshialo shiosi, Yosefu niyekula ebiachibie biosi, ne nakusilia Abamisiri ebiokhulia, okhuba inzala eyo yali indulu muno.

⁵⁷Abebialo bindi betsa mushialo shia Misiri okhukula ebiokhula khu Yosefu okhuba inzala eyo yali indulu muno mushialo shiosi.