Read wanga OBUCHACHILO 42 Bible Online

OBUCHACHILO 42 - wanga bible

OBUCHACHILO 42

¹Olwa Yakobo yamanya mbu, imele yili mushialo shia Misiri, yaboolela abasianibe ari, “Muhengananga khulwa shiina?

²Lole, embuliile mbu, imele yili mushialo shia Misiri, tsieyo mukhukulilekhwoyo imele kho mbu, khubeho mwoyo, khuleshe okhufwa.”

³Mana abasiani babwe Yosefu ekhumi nibatsia Misiri okhukula imele.

⁴Nebutswa Yakobo shiyaruma Benjamini omusiani wabwe Yosefu okhutsia halala nabasiani babwe ta, okhuba yaria mbu, amasila kakhamukwila.

⁵Kho abasiani ba Yakobo nibetsela halala nende abandu bandi abali nibetsile okhukula imele, okhuba inzala yali mushialo shia Kanani.

⁶Ebise ebio Yosefu yali nali omukafuna weshialo eshio, niye owakusinjia eshiokhulia khubandu boosi bomushialo eshio. Mana abasiani babwe Yosefu nibeetsa nibamwinamila nobweni bwabwe okhuula hasi.

⁷Yosefu yalola abasiani babwe, ne nabamanya. Nebutswa yekhola shinga oulabamanyile ta, ne nabareeba mubululu ari, “Murulanga hena?” Nibamukalusia bari, “Khurulanga Kanani, ne khwitsile okhukula eshiokhulia.”

⁸Kata Yosefu niyamanyilisia abasiani babwe, bo shimumanyilisia tawe.

⁹Mana Yosefu niyetsulila amalooro ka yali niyaloora khubo, ne nababoolela ari, “Muli abanoonelesi, mwitsile okhunoonelesia nende okhumanya obuteshele bweshialo shiefwe.”

¹⁰Nabo nibamukalusia bari, “Tawe omwami wefwe, ifwe abakhalabanibo khwitsile butswa okhukula eshiokhulia.

¹¹Fwesi khuli abasiani bomundu mulala, khuli abandu bobwatoto, ifwe abakholibo shikhuli abaluri tawe”

¹²Yosefu nababoolela ari, “Tawe, mwitsile okhulola obuteshele bweshialo.”

¹³Nabo nibamukalusia nibaboola bari, “Ifwe abakholibo khuli abasiani ekhumi na babili abomundu mulala mushialo shia Kanani, ne lola omushe inyanga yino ali nende papa wefwe ne oundi yafwa.”

¹⁴Nebutswa Yosefu yakalushila okhubaboolela ari, “Kali butswa shinga olwa emuboolele. Muli abaluri.

¹⁵Nikaba mbu akamuboolanga nakahabwene, mulatemwa muri: Nditsuba muliira liomuruchi mbu, shimulalekhulwa okhurula hano, omusiani wenywe omushe nashili okhwitsa hano tawe.

¹⁶Rume mulala khwinywe atsie arere omusiani wenywe omushe oyo, nenyu abandi musikala mumbohe, okhuula olwa amakhuwa kenywe kamanyikha, nikaba nikali akobwatieri noho khulwa obulamu bwa omuruchi, toto mwene muli abaluri.”

¹⁷Mana Yosefu nabara boosi halala mumbohe khulwe tsinyanga tsitaru.

¹⁸Khunyanga yakhataru Yosefu nababoolela ari; “Okhuba isie ehelesinjia Nyasaye oluyali, khole lino kho mbu mubeho mwoyo.

¹⁹Kho nimuba nimuli abandu abobwatoto leshe mulala khwinywe asikale mumbohe, ne abandi batsie bachinje imele khulwa inzala khubomunzu mwenyu.

²⁰Ne munderere omusiani wenywe omushe kho amakhuwa kenywe kamanyishe okhuba akobwatoto, ne shimufwa tawe.” Nabo nibakhola bario.

²¹Mana nibaboolelanila bari, “Toto mwene khuli neshikha khulwa omusiani wefwe, shichila khwalola okhunyakhana khwe olwa yakhusaayanga nefu nikhukahulila tawe, niko akachila amanyakhano kano niketsa khwifwe.”

²²Mana Rubeni nabetsusia ari, “Shindamuboolelakhwo muleshe okhwonoona khumuraka oyo? Nenyu nimulambulilisia ta, kho bulano khurungwa khulwa okhufwakhwe.”

²³Shibanya mbu Yosefu ahuliile akababoolile ta okhuba bali nende omukaluli hakari wabwe nende Yosefu.

²⁴Mana Yosefu niyekwenya elubeka okhurula khubo nalila amasika. Ne nakalukha wa bali naboola ninabo. Mana nabukula Simeoni okhurula khubo namuboha nibalolanga.

²⁵Kho Yosefu nalaka mbu, betsusie mumisiko chiabwe imele, ne bakalusie amapesa kabuli mundu mwikunialie. Khandi mbu, babahelesie ebiabekhoonyela khuluchendo lwabwe. Mana nikaba kario.

²⁶Mana nibatuukha tsisishili tsiabwe imele ne nibasumukha.

²⁷Ne mushilo, olwa mulala khubo yaboholola likunialie okhuhelesia isishiliye eshiokhulia nali aha yali natsiile okhwiyalisia, yanyoola amapesake nikali hekulu welikunialie.

²⁸Mana naboolela abasiani babwe ari, “Amapesa kanje kakalusiibwe, ngakano kali hekulu hano, hamunwa welikunia lianje!” Olwa bahulilakhwo amakhuwa ako, bafwa emioyo chiabwe. Nibachaaka okhuhengana abeene khu beene nibaboola bari, “Nishiina eshia Nyasaye akhukholeele shino?”

²⁹Olwa betsa khu Yakobo sabwe mushialo shia Kanani, bamuboolela koosi akali nikabanyoolile, nibamuboolela bari,

³⁰“Omusaatsa tsana omwami weshialo shia Misiri aboolile ninefwe nobululu, nakhubukula ifwe shinga abanoonelesi beshialoshie.

³¹Nebutswa khumubooleele khuri, ‘Ifwe shikhuli abanoonelesi ta, khuli abandu bobwatoto.

³²Khwali abasiani ekhumi nababili, abomunzu ndala, ne mulala yafwa, ne omushe ali nende papa wefwe mushialo eshia Kanani.’

³³Mana Omwami weshialo eshio nakhuboolela ari, ‘Muleshe mulala khwinywe atoonye ninasi, mana mubukule imele khulweinzala khubeinzu benywe, ne mutsie munjila yenywe. Nolwa ndalamanya mbu, muli abandu abesiikwa.

³⁴Mundeerere omusiani wenywe omushe oyo kho emanye mbu, muli abandu bobwatieri, ne mbu, shimuli abanoonelesi tawe. Mana ndalamulekhuulila omusiani wenywe ne mulakhola obukhala mushialo shino.’ ”

³⁵Olwa batsukhulula amakunia kabwe, lola, amapesa kabuli mundu kali mwikunialie. Mana olwa abasiani tsana abo nende sabwe balola amapesa ako, batiilwa noburi.

³⁶Mana Yakobo sabwe nababoolela ari, “Mwarusiakhwo abaana banje: Yosefu shiashiliho ta, khandi Simeoni yesi shialiho tawe. Khandi bulano mwenyanga okhubukula Benjamini, kano koosi kanzuninjia.”

³⁷Mana Rubeni nasuubisia samwana ari, “Olekhuule Benjamini mumakhono kanje, ndalamukalusia khwiwe, ne nemba nindalamukalusia khwiwe ta, wiire abasiani banje babili.”

³⁸Nebutswa Yakobo yamuboolela ari, “Omusiani wanje shialatsia ninawe ta, shichila omusiani wabwe wafwa, ne niye owatoong'a yenyene. Eshindu eshibi shiosi nishiakhetsukhana shiamwikholekhakhwo khuluchendo lwa mwenyanga okhutsia olwo, muba mundeereere eshibeela shiokhunzira mana muyabile.”