Read wanga OBUCHACHILO 43 Bible Online

OBUCHACHILO 43 - wanga bible

OBUCHACHILO 43

¹Bulano inzala eyo yatsiililila okhuba indulu mushialo shia Kanani.

²Ne olwa abeinzu ya Yakobo bali nibamalile okhulia imele yabakula okhurula Misiri, sabwe yababoolela ari, “Kalusheyo khandi mukhukulilekhwo eshiokhulia shituutu.”

³Nebutswa Yuda yamuboolela ari, “Omusaatsa oyo yakhulaka obutinyu naboola ari, ‘Shimulandoleshelakhwo mumoni mwanje, omusiani wenywe nalali ninenywe tawe.’

⁴Noba nokhuruma nende omusiani wefwe khulakholomokha Misiri mana khukhukulile eshiokhulia.

⁵Nebutswa noba nolakhuruma ninaye ta, shikhukholomokhayo tawe, shichila omusaatsa tsana yakhuboolela ari, ‘Shimulandoleshelakhwo mumoni mwanje, omusiani wenywe nalali ninenywe tawe.’ ”

⁶Yakobo nabareeba ari, “Mbushiina nimukholela amabi kano, nimuboolela omusaatsa oyo mbu, muli nomusiani wenywe undi?”

⁷Nibamukalusia bari, “Omusaatsa oyo yakhurebelesia okhwenya okhukhumanya ifwe nende abolwibulo lwefwe, nakhureeba ari, ‘Senywe ashili mwoyo? Mulikhwo nomusiani wenywe undi?’ Akakhwamuboolela kali amakalusio khumareebo ako. Khwakhamanyile khurie mbu, alakhuboolela ifwe ari, ‘Reere omusiani wenywe oyo?’ ”

⁸Mana Yuda naboolela Yakobo ari, “Ruma isie nende omuraka uno ne khularula khutsie kho mbu, ifwe nende iwe kata nende ababuukha bano khubeho mwoyo, khuleshe okhufwa khulwa inzala.

⁹Ndalasinjila mushilenjeshie, ne olimwenya okhurula mumakhono kanje. Nimba nindalamukalusia khwiwe nende okhumura imbeli wo ta, nisie oulaba nendi neshikha emiyika chiosi.

¹⁰Nikhuba nikhulashindile ta, khane bulano khuba khutsiile khandi khuba khwakhakalukha akhandi khabili.”

¹¹Mana Yakobo samwana nababoolela ari, “Nikaba mbu, okhuula kabe kario, kho khole muri: Bukulekhwo ebiamo ebilayi ebiomushialo shienywe ne muchinje muyilile omusaatsa oyo shinga eshihaanwa, indesi yeshiuya, obuushi butuutu, obubane, manemane, tsinjuku nende tsilusi.

¹²Mubukule amapesa eshikhabili, mukalusheyo nende amapesa akakalusibwa mumakunia kenywe ako, haundi khwali butswa okhwibilila.

¹³Bukule nende omusiani wenywe, mana murule mutsie khumusaatsa oyo khandi.

¹⁴Nyasaye Owobunyali Bwosi amukholele akeshisa imbeli womusaatsa oyo, amukalusilie omusiani wenywe undi oyo nende Benjamini. Ne khulwanje nikaba mbu, okhuula engosie abaana banje boosi, kho ndalabakosia boosi.”

¹⁵Kho abasiani babwe Yosefu nibabukula ebihaanwa, khandi nibabukula amapesa eshikhabili, nende Benjamini, ne nibarula nibakholomokha okhutsia Misiri, nibasinjila imbeli wa Yosefu.

¹⁶Olwa Yosefu yalola Benjamini nali ninabo, yaboolela omusinjilili wokhuteekha munzuye ari, “Yinjisia abandu abo munzu mana osinze eshiayo oshikaasie obulayi, shichila abandu abo balalia ninasi eshiokhulia shimushiteere.”

¹⁷Omusinjilili wokhuteekha oyo nakhola shinga olwa Yosefu yali namulachililsiye, mana niyenjisia abandu abo munzu mwa Yosefu.

¹⁸Mana nibahenda omwoyo, okhuba benjisibwa munzu mwa Yosefu. Ne nibaboola bari, “Ni khulwa amapesa kakalusibwa mumakunia kefwe, olwa khwetsa olwambeli niko akachila nikhwinjisibwa muno kho mbu, anyoole obwiyangu bwokhukhuraakhwo eshikha, akhunuule tsisishili tsiefwe mana akhukhole abasumbabe.”

¹⁹Kho nibatikulukha nibatsia hekulu khumusinjilili wokhuteekha womunzu mwa Yosefu oyo, nibaboola ninaye nibali hamuliango

²⁰bari, “Iwe Omwami wefwe, ifwe, khwetsa olwambeli okhukula eshiokhulia,

²¹ne olwa khwola habundu hokhwiyalisia, khwaboholola amakunia kefwe, ne amapesa kabuli mundu kali hamunwa welikunialie. Amapesa kefwe koosi shinga olwa kachelwa, kho khukaluushe ninako khandi.

²²Mana khwitsile namapesa kandi mumakhono kefwe, akokhukula eshiokhulia, shikhumanyile owara amapesa kefwe ako mumakunia kefwe tawe.”

²³Omusinjilili wokhuteekha nabakalusia ari, “Shimulahenda omwoyo ta, khandi shimularie tawe. Nyasaye wenywe khandi Nyasaye wa senywe okhuula abe niyamureera inganga mumakunia kenywe, isie ndanyoola amapesa kenywe.” Mana nareera Simeoni ewa bali.

²⁴Ne lwomundu oyo yali niyenjisiye abandu abo munzu ya Yosefu, khandi nabahelesiye amaatsi kokhwosia ebilenje mana khandi nibahelesiye tsisishili tsiabwe eshiokhulia,

²⁵barechekha okhuhesia Yosefu ebihaanwa, shichila bali nibahuliile mbu, yetsanga mushiteere hakari okhulia omukaate ninabo.

²⁶Olwa Yosefu yachelela, bareera ebihaanwa bia bali nibetsile ninabio munzu okhumuhelesia, nibenamia obweni bwabwe okhuula hasi.

²⁷Yosefu nabareeba khukobulamu bwabwe ari, “Omukofu wamwaboola mbu ni senywe nomulamu? Ashili mwoyo?”

²⁸Nibamukalusia bari, “Omusumbawo papa wefwe nomulamu, ashili mwoyo” nibenamia emirwe chiabwe okhumwinamila.

²⁹Ne Yosefu nachinguula tsimonitsie, nalola Benjamini omusiani wabwe ne nabareeba ari, “Uno niye omusiani wenywe omushe, owamwamboolela? Mwana wanje, Nyasaye akhuhelesie tsikhabi!”

³⁰Mana Yosefu narula bwangu, natsia mushisikashie nalililamwo amasika, khulwa amahofu khumusiani wabwe.

³¹Olunyuma lwokhwiyosia mumonimwe, yakalukha ewa bali, naboolela omusinjilili wokhuteekha ari, “Eshiokhulia shireerwe.”

³²Nibamureerera eshishie yenyene, khandi abasiani babwe eshiabwe bonyene, ne Abamisiri bokhulia ninaye khandi nibahebwa eshiabwe bonyene, shichila kwali omusilo khu Abamisiri okhulia omukaate nende Abayahudi halala.

³³Kho nibekhala imbeliwe shinga olwa balondana mukhwibulwa, okhurula khuwambeli okhuula khumushe. Ne olwa abasiani abo balola mbu, bali nibekhaale okhulondana shinga olwa bebulwa, bachenya.

³⁴Ebichelo biebiokhulia biabwe biareerwa okhurula khumesa ya Yosefu, nebutswa eshichelo shia Benjamini shiali eshinji okhushila ebiabasiani babwe akhandi kharano. Kho nibanywa khandi nibekhoya halala ninaye.