Read wanga OBUCHACHILO 45 Bible Online

OBUCHACHILO 45 - wanga bible

OBUCHACHILO 45

¹Mana Yosefu nalanyalilwa okhwisimilisia imbeli wabandu bali ninaye boosi, abali nibasinjiile aha yali tawe. Ne naboola nomwoyo omukhongo ari, “Abandu bandi boosi barule batsie elwanyi.” Kho abulaho omundu yesi yesi khubandu ba Misiri owali ninaye olwa yebuula omwene khubasiani babwe tawe.

²Mana nalila obutinyu, Abamisiri nende abomunzu yomuruchi nibahulila.

³Mana Yosefu naboolela abasiani babwe ari, “Nisie Yosefu, papa wanje ashili mwoyo noho?” Nebutswa abasiani babwe shibanyala okhumukalusia likhuwa ta, shichila bali nibaliilwe ling'ang'a imbeliwe.

⁴Kho Yosefu naboolela abasiani babwe ari, “Emusaaya mbu, musitekhwo hambi ninasi,” mana abasiani babwe nibasita ahambi. Mana Yosefu nababoolela ari, “Isie nisie omusiani wenywe Yosefu, owa mwakusia Misiri.

⁵Ne bulano shimulebeelelela abeene mbu shiochila mwangusia yino tawe. Okhuba Nyasaye niye owandeera yino kho mbu, eranjilile okhwitsa mana ehonokosie obulamu bwabandu.

⁶Okhuba inzala yabeele mushialo emiyika chibili chino, ne khulwa miyika chindi chirano chilondakhwo, okhulima noho kata okhuchesa shikhulabaho tawe.

⁷Kho Nyasaye yanzimisia isie imbeli wenywe kho mbu, emuhonokosilie inywe omusikalo khushialo, khandi mbu, emuhonokosilie abandu abanji abokhulwibulo lwenywe.

⁸Kho shimuli inywe abanzimisia yino ta, nebutswa ni Nyasaye. Ne Nyasaye wayakhola okhuba omukhalabani omukhongo womuruchi, khandi omwami khubomunzuye, khandi omulondi womuruchi weshialo shia Misiri shiosi.

⁹“Rulilemwo butswa mutikulushe mukalushe khu papa, ne mumuboolele mbu, omusianiwo Yosefu aboola ari, ‘Nyasaye wayakhola isie okhuba omwami weshialo shia Misiri shiosi, kholomokha witse wendi, ne shiolashinda tawe.

¹⁰Olamenya hambi ninasi mushialo shia Gosheni, iwe, abaanabo, abetsukhulubo, ebiayobio nende emianduchio chiosi.

¹¹Olwa olaba noli Gosheni, ndalakhulinda nekhuhelesia ebia wenya, iwe nende abandubo boosi halala nende emirukochio kho mbu, muleshe okhufwa khulwa inzala, okhuba emiyika chindi chieinzala chishiliyo chirano.’ ”

¹²Mana Yosefu natsiililila okhuboola ari, “Inywe abeene muluutsi netsimoni tsienywe, kandi omusiani wenywe Benjamini yesi alutsi netsimonitsie mbu, nisie Yosefu mwene ouboolanga ninenywe.

¹³Okhula muboolele papa wanje khukoluyali lwanje mushialo shia Misiri, nende koosi akamulutsi. Khulweshio, khole bwangu, mureere papa wanje hano.”

¹⁴Mana Yosefu nakwa mwikosi liomusiani wabwe Benjamini ne nalila khandi Benjamini yesi nakwa Yosefu mwikosi ne nalila.

¹⁵Yosefu nafumbeelela abasiani babwe boosi nende okhubalililakhwo. Mana abasiani babwe nibakhupa ninaye imbakha.

¹⁶Olwa amakhuwa kahulilikha litookho womuruchi mbu, abasiani babwe Yosefu betsile, omuruchi nende abakhalabanibe bachamisibwa.

¹⁷Mana omuruchi naboolela Yosefu ari, “Boolela abasiani benywe batuushe tsisishili tsiabwe emisiko mana bakalushe mushialo shia Kanani.

¹⁸Obaboolele babukule papa wenywe nende abomunzu yenywe mana mwitse hano, nasi ndalamuhelesia omukunda omulayi mumikunda chia Misiri chiosi, ne mulalia khubunulu bweshialo shino.

¹⁹Obalache khandi babukule amakaari ketsing'ombe okhurula mushialo shia Misiri khulwa okhuchinjilakhwo abaana benywe abatuutu nende abakhaye benywe, ne mwitse nimureera papa wenywe.

²⁰Shimulahendelakhwo emiandu chienywe ta, shichila omukunda omulayi okhushila chiosi mushialo shia Misiri nokwenywe.”

²¹Kho abasiani ba Yakobo nibakhola bario, mana Yosefu nabahelesia amakaari ketsing'ombe shinga omuruchi yali nalachile. Khandi yamuhelesia ebiokhwikhoonyela muluchendo lwabwe.

²²Khandi yahelesia buli mulala khubasiani abo tsingubo tsimbia, nebutswa Benjamini omusiani wabwe yamuhelesia tsishekeli tsieifetsa ebikhumi bitaru nende tsingubo tsirano tsimbia.

²³Ne yabahelesia tsisishili ekhumi nitsituushilwe ebindu bia Misiri ebilayi, nende tsisishili tsindi tsikhasi ekhumi nitsituushilwe imele, emikaate nende ebindu bia Samwana yekhoonyela muluchendo ebiokhuyilila samwana.

²⁴Mana Yosefu naseebula abasiani babwe, ne olwa bali nibarulanga, yabalachilisia ari, “Shimulasoolanakhwo khunjila tawe.”

²⁵Kho nibatikulukha okhurula Misiri niboola mushialo shia Kanani, ewa Yakobo sabwe yali.

²⁶Ne nibamuboolela bari, “Yosefu ashili mwoyo, khandi niye omuruchi weshialo shia Misiri shiosi.” Naye niyesundukha omwoyo, shichila shiyasuubila amakhuwa kabwe tawe.

²⁷Nebutswa olwa bamuboolela amakhuwa ka Yosefu yali nababooleele koosi, khandi olwa yalola amakaari ketsing'ombe, aka Yosefu yali nahaanile mbu, kamuchinje, omwoyo kwa Yakobo sabwe kwakalukha.

²⁸Mana Yakobo naboola ari, “Kahelile, Yosefu omusiani wanje naba nashili mwoyo ndalatsia emulolekhwo neshili okhufwa.”