Read wanga OBUCHACHILO 46 Bible Online

OBUCHACHILO 46 - wanga bible

OBUCHACHILO 46

¹Kho Yakobo nabukula ebindubie biosi nachaaka oluchendo, mana niyoola Beerisheba nakhola omusango khu Nyasaye wa papawe Isaka.

²Naye Nyasaye nalanga Yakobo mumalolelo keshilo ari, “Yakobo, Yakobo,” naye Yakobo nakalusia ari, “Endiho.”

³Mana Nyasaye namuboolela ari, “Nisie Nyasaye, Nyasaye wa papawo, Shiolaria okhukholomokha okhuula Misiri ta, shichila ebweneyo ndalakhukhola lihanga likhongo.

⁴Ndalakholomokha ninawe okhuula Misiri khandi isie mwene ndakhachelesie abolwibulolwo, ne olwa olifwa, Yosefu alikhufumba.”

⁵Kho Yakobo narula Beerisheba. Nabo abasianibe nibara sabwe nende abaana babwe abatuutu nende abakhaye babwe khumakari ketsing'ombe, aka omuruchi yali nahaanile mbu, bachinjilwemwo.

⁶Babukula tsing'ombe tsiabwe nende emiandu chiabwe, echia bali nibanyoola mushialo shia Kanani ne nibeetsa ninabio Misiri. Yakobo nabukula abolwibulolwe boosi,

⁷abasianibe nabaana babasianibe, abakhaanabe nabaana babakhanabe, ne nibeetsa ninaye Misiri.

⁸Abolwibulo lwa Yakobo, abatsia ninaye Misiri bali Rubeni omusianiwe wambeli,

⁹nende abasianibe mbu, Hanoki, Palu, Hezironi, nende Karimi.

¹⁰Simeoni nende abasianibe mbu, Yemueli, Yamini Ohadi, Yakini, Zohari, nende Shauli omusiani womukhasi omukanani.

¹¹Lewi nende abasianibe mbu, Gerishoni, Kohatsi, Morari.

¹²Yuda nende abasianibe mbu, Eri, Onani, Shela, Perezi nende Zera (Yuda nende abasianibe bandi mbu, Eri nende Onani bali nibafwila mushialo shia Kanani.) Naye Perezi nende abasianibe mbu, Hezironi nende Hamuli.

¹³Isakari nende abasianibe mbu, Tola, Puwa, Iyobu nende Shimuroni.

¹⁴Zebuluni nende abasianibe mbu, Seredi, Eloni nende Yaleeli.

¹⁵Abo nibo abasiani ba Lea yebulila Yakobo mushialo shia Mesopotamia, omukhaanawe oulangwa mbu Dina nabulakhwo. Abolwibulo lwa Yakobo, aba yebula nende Lea boosi halala abakhaana nabasiani nende abetsukhulube bali amakhumi kataru nabataru.

¹⁶Gadi nende abasianibe mbu, Sifioni, Hagi, Shuni, Eziboni, Eri, Arodi nende Areli.

¹⁷Asheri nende abasianibe mbu, Imuna, Ishiwa, Ishiwi, Beria nende Sera omukhaana wabwe. Beria nende abasianibe mbu, Heberi nende Malakieli.

¹⁸Ekhumi nabasasaba abo nibo abolwibulo lwa Yakobo, aba yebula nende Zilipa, owa Labani yahelesia Lea omukhaanawe.

¹⁹Abasiani ba Raeli omukhaye wa Yakobo bali Yosefu nende Benjamini.

²⁰Ne aba Asenatsi omukhaana wa Potifera omwisaaliisi wa Oni yebula nende Yosefu mushialo shia Misiri bali Manase nende Efuraimu.

²¹Ne abasiani ba Benjamini bali Bela, Bekeri, Eshibeli, Gera, Namani, nende Aridi.

²²Boosi halala aba Raeli yebula nende Yakobo bali abandu ekhumi nabane.

²³Omusiani wa Dani yali Hushimu.

²⁴Abasiani ba Nafutali bali Yahazeli, Guni, Yezeri, nende Shilemu.

²⁵Abasiani musaafu abo nibo aba Biliha, owa Labani yahelesia Raeli omukhaanawe yebula nende Yakobo.

²⁶Abolwibulo lwa Yakobo, abetsa Misiri, abakhaye babasianibe nibabulakhwo, bali abandu amakhumi kasasaba nabasasaba boosi halala.

²⁷Ne abasiani aba Yosefu yebula nali mushialo shia Misiri bali babili. Kho abandu boosi aboluyia lwa Yakobo, abetsa Misiri bali amakhumi musaafu.

²⁸Yakobo yaruma Yuda mbu aranjilile okhutsia okhureeba Yosefu mbu, yakaanile Yakobo samwana mushalo shia Gosheni. Mana Yakobo nende abolwibulolwe niboola mushialo shia Gosheni.

²⁹Yosefu narechekha likaarilie lietsifarasi natikulukha natsia Gosheni okhwakaanila Yakobo samwana. Olwa Yosefu yamulola, yamukwakhwo ne nalila, namulililakhwo khulwoluhono.

³⁰Yakobo naboolela Yosefu ari, “Bulano lekha efwe, shichila emalile okhukhulola khandi emanyile mbu oshiliho mwoyo.”

³¹Yosefu naboolela abasiani babwe nende abomunzu ya samwana ari, “Ndalatsia emboolele omuruchi endi, abasiani befwe nende abomunzu ya papa, abali nibamenya mushialo shia Kanani betsile ewanje okhundola.

³²Ndalamuboolela mbu, inywe muli abaayi, okhuba mwali abaruchi betsing'ombe khandi mwetsa nende ebiayo bienywe nende tsing'ombe tsienywe nende biosi ebia mwali ninabio.

³³Olwa omuruchi amulanga namureeba ari, ‘Mukholanga milimo shiina?’

³⁴Mumukalusie muri, ‘Ifwe abakhalabanibo nende abakuuka befwe khubetsanga abaruchi betsing'ombe okhurula muburaaka bwefwe okhuula bulano.’ Muboole murio Kho mbu, amufuchilile mumenye mushialo shia Gosheni. Yosefu yaboola ario shichila abaayi bali eshisinyo khubandu ba Misiri.”