Read wanga OBUCHACHILO 47 Bible Online

OBUCHACHILO 47 - wanga bible

OBUCHACHILO 47

¹Kho Yosefu niyenjila munzu yomuruchi namuboolela ari, “Papa wanje nende abasiani befwe, betsile okhurula mushialo shia Kanani nende tsing'ombe tsiabwe, ebiayo biabwe nende biosi ebia bali ninabio, bali bulano mushialo shia Gosheni.”

²Mana nabukula abandu barano okhurula mubasiani babwe nabalolesia khumuruchi.

³Omuruchi nareeba abasiani babwe abo ari, “Milimo shiina echia mukholanga?” Nabo nibamukalusia bari, “Ifwe khuli abaayi shinga olwa abakuuka befwe bosi balinji.

⁴Khwitsile okhumenyakhwo mushialo shino shichila inzala yili mushialo shia Kanani yinyinji muno kata olwayilo lwemiruko chiefwe shiluliyo tawe. Khukhusaaya mbu, nochama okhufuchilile khumenye mushialo shia Gosheni.”

⁵Mana omuruchi naboolela Yosefu ari, “Bulano okhuba papawo nende abasiani benywe bamalile okhuula,

⁶eshialo shia Misiri neshiabwe. Oleshe bamenye mulukongo lwa Gosheni, niyo ewomukunda kuli omulayi mushialo shino. Ne nibaba nibalikhomwo abandu abanyala, obaahule babe abasinjilili bemiruko chianje.”

⁷Mana Yosefu niyenjisia Yakobo samwana, namusinjisia imbeli womuruchi, naye Yakobo nalaamila omuruchi ikhabi.

⁸Kho omuruchi nareeba Yakobo ari, “Oli nemiyika chinga?”

⁹Naye Yakobo nakalusia ari, “Ndakhamala emiyika eshikhumi shilala nende amakhumi kataru (130) nenjendachendanga mushialo. Emiyika echio chiali mituutu mana emitinyu muno okhushila emiyika eminji chiabakuuka banje bamala nibachendachendanga mushialo.”

¹⁰Mana Yakobo nalaamila omuruchi ikhabi ne narula imbeliwe niyenyokha.

¹¹Kho Yosefu nahelesia samwana nende abasiani babwe ahokhumenya, nabahelesia omukunda kwa Remesesi, okwali omukunda omulayi mumikunda chia Misiri chiosi mbu, kube okwabwe shinga lwomuruchi yali nalachile.

¹²Mana Yosefu nahelesia samwana, abasiani babwe, nende abomunzu ya samwana eshiokhulia okhuula khubatuutu beene.

¹³Eshiokhulia nishiabulaho mushialo shiosi, shichila inzala yali indulu muno. Mana abandu beshialo shia Kanani nende abeshialo shia Misiri nibang'aha khulwa inzala.

¹⁴Kho Yosefu nakhung'asia amapesa koosi aka yanyoola mushialo shia Misiri nende eshia Kanani, khulwa imele eyabali nibakulile. Mana Yosefu nakareera munzu yomuruchi.

¹⁵Ne olwa Abamisiri nende Abakanani bali nibekhoonyeele amapesa kabwe koosi, Abamisiri boosi betsa khu Yosefu nibamuhabila nibaboola bari, “Khuhelesiekhwo eshiokhulia okhuba amapesa kefwe kahwele. Mbushiina khufwe inzala nawe nolola?”

¹⁶Naye Yosefu nabakalusia ari, “Amapesa kenywe nikaba nikahwele, muhaane tsing'ombe tsienywe, muhaane tsing'ombe nasi ndalamuhelesia eshiokhulia.”

¹⁷Kho nibareerera Yosefu tsing'ombe tsiabwe, naye Yosefu nabahelesia eshiokhulia nakulaasilia tsifarasi, tsing'ombe, amakondi nende tsisishili. Ne nabahelesia eshiokhulia mukhukulaasia nemiruko chiabwe mumuyika okwo.

¹⁸Ne omuyika okwo nikuhwele, bamwitsakhwo omuyika kwalondakhwo nibamuhabila nibaboola bari, “Shikhukhubisa iwe omwami wefwe ta, obwatoto buli mbu, amapesa kefwe koosi kahwa, emiruko chiefwe chimalile okhuba echichio. Bulano, omwami, ifwe abakhalabanibo shikhulikhwo nende shiosi shiosi eshia khunyala okhukhuhelesia ta, habula ifwe abeene okhwihaana nende okhuhaana emikunda chiefwe.

¹⁹Mbushiina khufwe inzala nololanga mana emikunda chiefwe chisasishe? Okhukule ifwe nende emikunda chiefwe khulweshiokhulia, mana ifwe khulaba abasumbabo iwe omuruchi nachio emikunda chiefwe chilaba echichio. Okhuhelesie imwo kho mbu, khuleshe okhufwa khandi emikunda chiefwe chileshe okhukwa likunda.”

²⁰Kho Yosefu nakulila omuruchi omukunda mushialo shia Misiri. Abamisiri bakusia emikunda chiabwe chiosi shichila inzala yali indulu muno khubo. Omukunda nikuba okwomuruchi.

²¹Mana Yosefu nakhola abandu okhuba abasumbabe, okhurula ebuleka lulala weshialo shia Misiri okhuula khulubeka lundi.

²²Halali Yosefu shiyakula emikunda chiabesaaliisi ta, okhuba abesaaliisi bali omukabo kwabwe okwomuruchi yali yaraho, ne bekhoonyelanga omukabo okwo okhurula khumuruchi. Khulweshio shibakusia emikunda chiabwe tawe.

²³Mana Yosefu naboolela abandu ari, “Inyanga yino emukulile inywe nende emikunda chienywe chiosi okhuba echiomuruchi. Bulano imwo njieyino murache emikunda chienywe.

²⁴Ne mukhuchesa mwakhahelesinjie omuruchi eshitonye shiakharano, ne ebitonye bine khu birano biakhabetsenje ebienywe abeene, khulwa imwo yokhuraaka mumikunda, nende khulweshiokhulia shienywe nende abomutsinzu tsienywe, nende abaana benywe abatuutu.”

²⁵Nabo nibamuboolela bari, “Ohoniye obulamu bwefwe, kakhoya kakhuchamisia iwe omwami wefwe, khulaba abasumbabo iwe omuruchi.”

²⁶Kho Yosefu nalikhola lilako mushialo shia Misiri shiosi mbu, omuruchi anyoolenje eshitonye shia kharano. Lilako elo lishiliho okhuula bulano. Habula emikunda chiabesaaliisi chionyene nichio echilaakholwa okhuba echiomuruchi tawe.

²⁷Mana abandu ba Isiraeli nibamenya mushialo shia Misiri, mumukunda kwa Gosheni, ne nibanyoolelamwo emiandu, nibebulana nibaba abanji muno.

²⁸Naye Yakobo namenya mushialo shia Misiri khulwemiyika ekhumi namusaafu, okhuula olwa yoosia emiyika eshikhumila nende amakhumi kane namusaafu.

²⁹Ne olwa Yakobo yali nali hambi okhufwa, yalanga omusianiwe Yosefu ne namuboolela ari, “Noba mbu, toto waheela isie, chama orekhwo omukhonokwo mumarango kanje, mana witsube mbu, olaakholela akeshisa nende akatoto. Shiolayabilakhwo mushialo shia Misiri tawe!

³⁰Ndenya mbu, eyabilwe habundu ahabakuuka banje bayabilwa. Munjinje murusie mushialo shia Misiri mana muyabile habundu ahabakuuka bayabilungwa.” Naye Yosefu namukalusia ari, “Ndalakhola shinga lwoboolile.”

³¹Yakobo nameeta okhuboola ari, “Unzitsubile.” Naye Yosefu namwitsubila. Mana Yakobo niyenama hamurwe weshitalishie nakhupila Nyasaye orio.