Read wanga OBUCHACHILO 49 Bible Online

OBUCHACHILO 49 - wanga bible

OBUCHACHILO 49

¹Mana Yakobo nalanga abaanabe nababoolela ari, “Mwikhung'asie halala nasi ndalamuboolela akalikholekha khwinywe mutsinyanga tsitsanga.

²“Mwikhung'asie halala mwitse, murecheresie inywe baana banje.

³“Rubeni, niwe omwana wanje omukhulundu, niwe amaani kanje, khandi niwe omwana wanje wolusiani lwanje lwambeli, niwe oweisunga muno khandi owamaani amanji mubasiani banje boosi.

⁴Oli shinga amarunda kamaatsi komuyembo. Nebutswa shiolibakhwo neifuma ta, shichila wakona nomukhasi wanje omubiikha, mana nofwabia eshitali shia papawo.

⁵“Simeoni nende Lawi nabasiani bomunda ndala, beeranga abandu netsinganga tsiabwe.

⁶Isie shindalasanjilana ninabo mumikhung'ano chiabwe chiomumasilisi ta, kata khandi shindalasanga mumakhuwa kabwe aka baboola tawe. Shichila muburima bwabwe, beeranga abandu, ne khandi mubuchiyikhani bwabwe baremakanga emisi chiebilenje bietsing'ombe.

⁷Oburima bwabwe buli mushilaamo shiobubi, shichila nobululu. Khandi liruma liabwe lili mushilaamo shiobubi, shichila nelilulu. Ndalabasalaasia mushialo shia Isiraeli shiosi. Ndalabasalaasia mubandu beshielo shia Isiraeli.

⁸“Iwe Yuda, abasiani benywe balikhwitsoomia, omukhonokwo kulimikanga amakosi kabasukubo. Abasiani benywe okhuula balikhwinamila.

⁹Iwe Yuda mwana wanje, oli shinga italanyi eyihoola, eyinyoolanga eshioluyitsi shiayo mana yiniina ikulu khumusaala. Oli shinga italanyi eyinyiilanga niyikalakala hasi, shinga italanyi yamaani, niwiina ounyala okhuchibuusia?

¹⁰Indabushi yoburuchi shiyilirula mumukhono kwa Yuda ta, khandi abolwibulolwe bakhatsiililile okhuruka. Amahanga koosi kakhamuhulilenje nikamuhelesia oluyali.

¹¹Abohanga isishiliye khumitsabibuchie, khandi abohanga eshimoosi shieisishiliye khumitsabibu chianera, afuuyanga tsingubotsie mudivai, khandi ebifwalobie mudivai inzakhanyu.

¹²Tsimonitsie tsiakhanye khulwa okhunywa idivai inyinji, khandi amenoke kalabile tswe khulwa okhunywa amabeele.

¹³“Zebuluni alamenyanga khulukuku lweinyanza, alaba eshimenyo shietsimeeli okhuhulushila, olwakho lwelihangalie lulalaandaala okhuula Sidoni.

¹⁴Isakari ali shinga isishili yamaani, eyikonile mumakondi hakari.

¹⁵Yalola mbu, habundu hokhuhuluushila ni hahalayi, khandi mbu, eshialo eshio shiali eshilayi shiokhuchamisia. Khulweshio yenamia amabekake ne niyekhola omusumba khumilimo.

¹⁶“Dani alakhalachila abandube eshiina. Shinga mulala khubetsimbia tsia Isiraeli.

¹⁷Dani aliba shinga inzokha yelini khumuhanda, khandi shinga inzokha yeshiilikoma khunjila, eyilumanga ebilenje bieifarasi, naye owilushilangakhwo khufarasi tsana nakwa hasi makalama.

¹⁸“Iwe OMWAMI Nyasaye, enindililanga obuhoniabwo,

¹⁹Gadi aliseerwa nabanuuli, nebutswa naye yakhabaloondachile nabaseera.

²⁰Omukunda kwa Asheri kwakhacheswemwo ebiokhulia ebinji, naye Asheri yakhahelesie omuruchi ebiokhulia ebimukhoyeele.

²¹Nafutali ali shinga eshitsusu eshilali eshibohe ta, eshiibulanga abaana abalayi.

²²Yosefu ali shinga lisaka liomusaala okwamanga ebiamo, ali shinga omusaala eliamanga, oluli hasebele. Amasakake kalaandaala khwisiisi.

²³Abalasani bobuyingo bamuseera obutinyu, nibamulasa nobuyingo khandi nibamunyasia muno.

²⁴Nebutswa obuyingobwe bwatong'a niburaliile, nako amakhonoke kanyoolile amaani, khulwa obunyali obwa OMWAMI Nyasaye wa Yakobo, (muliira elia Omwaayi, khandi Olwanda lwa Isiraeli).

²⁵Nyasaye wa papawo niye oukhukhoonyanga. Nyasaye Owobunyali Bwosi niye oukhuhelesinjia tsikhabi, niye oukhuhelesinjia tsikhabi tsieifula okhurula ikulu mwikulu, khandi niye oukhuhelesinjia amaatsi okhurula mulusiba hasi, niye oukhuhelesinjia tsikhabi tsiemiruko nende abaana.

²⁶Tsikhabi tsia papawo akhuhelesiye, tsishila etsiebikulu biali bia khale bieinziayo, tsikhoya tsiaba khumurwe kwa Yosefu, tsikhoya tsiaba khumabeka akoyo owahulwa okhurula khubasiani babwe.

²⁷Benjamini ali shinga libwe lihalaba, mumabwibwi liliitsanga eshioluyitsi shialio, ne khubwile liliitsanga eshia liyimile.”

²⁸Abo nibo abetsimbia ekhimi natsibili tsia Isiraeli. Nako ako niko aka sabwe yababoolela olwa yali nabalaamilanga tsikhabi, naboolela buli mundu okhulondana shinga olwa kamukwanila.

²⁹Mana Yakobo nalachilisia abasianibe naboola ari, “Endi ahambi okhufwa. Muyabile halala nende abakuuka banje mumbinga yili mumukunda kwa Efuroni Omuhiti,

³⁰muyabile mumbinga yili mumukunda kwa Makipela, ebukwe wemiruba chia Mamure mushialo shia Kanani, eya Aburahamu yakula halala nende omukunda okhurula khu Efuroni Omuhiti mbu, yibe eya Aburahamu khulwa okhuyabilangamwo abandube abafwile.

³¹Ebweneyo newabayabila Aburahamu nende Sara omukhasiwe. Ebweneo newabayabila Isaka nende Rebeka omukhasiwe. Khandi newandayabila Lea.

³²Omukunda okwo halala nende imbinga yalimwo eyo biakulwa okhurula khu Abahiti.”

³³Olwa Yakobo yali namalile okhuhaana amebaalo khubasianibe, yakalusia ebilenjebie khushitali, ne nakwisia omwoyo nafwa, nayabuilwa kalala nende abakuukabe.