Read wanga OBUCHACHILO 5 Bible Online

OBUCHACHILO 5 - wanga bible

OBUCHACHILO 5

¹Kano niko ameera kabolwibulo lwa Adamu shinga olwa kahandikwa. Olwa Nyasaye yalonga omundu, yamulonga khwikondolie omwene.

²Yabalonga, omusaatsa nende omukhasi, ne olwa yabalonga, yabahelesia ikhabi ne nabakulikha mbu, Omundu.

³Olwa Adamu yali namenyile emiyika eshikhumi shilala namakhomi kataru (130), yebula omwana omusiani owali shinga ye omwene, ne namukulikha eliira mbu, Setsi.

⁴Olunyuma lwokhwibula Setsi, Adamu yamenya emiyika chindi ebikhumi munane, ne naba nabaana bandi abasiani nende abakhaana.

⁵Khulweshio, Adamu yamenya emiyika ebikhumi shienda namakhumi kataru (930), ne nafwa.

⁶Setsi yebula Enoshi nali nemiyika eshikhumi shilala nachirano.

⁷Setsi yamenya emiyika chindi ebikhumi munane namusaafu olunyuma lwokhwibula Enoshi, ne niyebula abaana bandi abasiani nende abakhaana.

⁸Khulweshio, Setsi yafwa nali nemiyika chiosi halala ebikhumi shienda nende ekhumi nachibili (912).

⁹Enoshi yebula Kenani nali nemiyika amakhumi shienda.

¹⁰Olunyuma lwokhwibulwa khwa Kenani, Enoshi yamenya emiyika ebikhumi munane nende ekhumi nachirano, ne niyebula abaana bandi, abasiani nabakhaana.

¹¹Khulweshio, Enoshi yafwa nali nemiyika chiosi halala, ebikhumi musaafu nachirano.

¹²Kenani yebula omwanawe omusiani Mahalaleli, nali nemiyika amakhumi musaafu.

¹³Olunyuma lwokhwibula Mahalaleli, Kenani yamenya emiyika ebikhumi munane namakhumi kane, ne namala niyebula abaana bandi abasiani nabakhaana.

¹⁴Kenani yafwa nali nemiyika ebikhumi shienda nende ekhumi.

¹⁵Mahalaleli yebula Jaredi nali nemiyika amakhumi kasasaba nachirano.

¹⁶Olunyuma lwokhwibula Jaredi, Mahalaleli yamenya emiyika chindi ebikhumi munane nende amakhumi kataru, kho niyebula abaana bandi abasiani nabakhaana.

¹⁷Khulweshio, Mahalaleli yemenya emiyika chiosi halala ebikhumi munane namakhumi shienda nachirano, ne nafwa.

¹⁸Jaredi yebula Enoka nali nemiyika eshikhumi shilala namakhumi kasasaba nachibili.

¹⁹Olunyuma lwokhwibulwa khwa Enoka, Yaredi yamenya emiyika chindi ebikhumi munane, kho niyebula abaana bandi abasiani nende abakhaana.

²⁰Khulweshio Yaredi yafwa nali nemiyika chiosi halala ebikhumi shienda namakhumi kasasaba nachibili.

²¹Enoka yebula Metsusela nali nemiyika amakhumi kasasaba nachirano.

²²Olunyuma lwokhwibulwa khwa Metsusela, Enoka yamenya emiyika chindi ebikhumi bitaru, nakholanga amakhuwa amalayi akachamisia OMWAMI Nyasaye, ne niyebula abaana bandi abasiani nende abakhaana.

²³Khulweshio Enoka yamenya emiyika chiosi halala ebikhumi bitaru nende amakhumi kasasaba nachirano.

²⁴Yamenya obulamubwe bwosi nali omulunjishi imbeli wa Nyasaye, ne nakhamiukha butswa, okhuba Nyasaye yamubukula.

²⁵Metsusela yebula omwanawe omusiani oulangwa mbu, Lameki, nali nemiyika eshikhumi shilala nende amakhumi munane namusaafu.

²⁶Ne olunyuma lwokhwibulwa khwa Lameki, Metsusela yamenya emiyika chindi ebikhumi musaafu namakhumi munane nachibili, ne nyebula abaana bandi abasiani nabakhaana.

²⁷Khulweshio Metsusela yamenya emiyika chiosi halala, ebikhumi shienda namakhumi kasasaba nende shienda, ne nafwa.

²⁸Lameki yebula omwana omusiani nali nemiyika eshikhumi shilala namakhumi munane nachibili,

²⁹ne namukulikha eliira mbu, Noa, naboola ari, “Okhurula khwiloba elia OMWAMI Nyasaye yalaama eshilaamo shiobubi, omwana uno alikhulemia ifwe omwoyo okhurula khumilimo chiefwe nende okhurula khukhunyakhana khwefwe?”

³⁰Olunyuma lwokhwibulwa khwa Noa, Lameki yamenya emiyika chindi ebikhumi birano nende amakhumi shienda nachirano, ne niyebula abaana bandi abasiani nabakhaana.

³¹Khulweshio, Lameki yamenya emiyika chiosi halala ebikhumi musaafu nende amakhumi musaafu namusaafu, ne nafwa.

³²Noa yebula Shemu, Hamu nende Yafetsi, olunyuma lwokhuusia emiyika ebikhumi birano.