Read wanga OBUCHACHILO 50 Bible Online

OBUCHACHILO 50 - wanga bible

OBUCHACHILO 50

¹Mana Yosefu nakwa khu samwana namufumbeelela, niyekhuula khandi namutsunzuuna.

²Mana Yosefu nalachilisia abasilishibe mbu, basilishe omubili kwa Yakobo kho mbu, kuleshe okhubola. Mana abasilishi abo nibakusilikha.

³Babukula tsinyanga amakhumi kane okhusilikha omubili okwo, okhuba etsio nitsio tsinyanga etsiekhoonyelungwa khulwa okhusilikha omubili kwomundu oufwile. Abamisiri bekhuula Yakobo khulwa tsinyanga amakhumi musaafu.

⁴Ne olwa tsinyanga etsio tsiali nitsihwele, Yosefu yaboolela abeinzu yomuruchi ari, “Bulano noba niwaheela, ekhusaaya mbu, otsie oboolele omuruchi mbu,

⁵Papa wanje yakhola isie okhwitsuba naboola ari, ‘Isie endi ahambi okhufwa, okhuula uyabile mushilindwa eshia isie omwene ndayaba mushialo shia Kanani.’ Khulweshio emusaaya mbu, nachama yandeshe enzie eyabile papa wanje, mana nemalile ndalachelela.”

⁶Mana omuruchi namukalusia ari, “Tsia oyabile papawo shinga olwa yakhukhola okwitsuba.”

⁷Kho Yosefu natikulukha natsia okhuyabila samwana, halala nende abakhalabani bomuruchi boosi, abakhulundu, nabakhulundu bomushiina shiomuruchi, nende abakhulundu beshialo shia Misiri.

⁸Abeinzu yabwe Yosefu halala nende abasiani babwe Yosefu nende abeinzu ya Yakobo, boosi batsia okhuyabila Yakobo. Habula abaana bonyene nende emiruko chiabwe nibio ebiatong'a inyuma mu Gosheni.

⁹Ne abandu abatsia nende Yosefu khumakari nende abetsifarasi bali abanji muno.

¹⁰Ne olwa boola mulwanyi lwabahuulilangakhwo imele, oluli Atadi injelekha womwalo kwa Yorodani, bekhuulila habwene yaho okhwikhuula khweshibeela eshikhongo muno. Mana Yosefu nakhola amasika ka samwana khulwa tsinyanga musaafu.

¹¹Ne olwa Abakanani balola okhwikhuula khwali mulwanyi lwabahuulilangamwo imele, oluli Atadi, baboola bari, “Okhwikhuula khuno nokhweshibeela muno khu Abamisiri.” Khulweshio, habundu yaho hakulikhwa mbu, Abeli-Miziraimu[20] ahali injelekha womwalo kwa Yorodani.

¹²Abasiani ba Yakobo, bamukholela shinga olwa yali niyabalachilisia okhukhola.

¹³Bamuchinga okhurula mushialo shia Kanani ne nibamuyabila mumbinga eyili mumukunda kwa Makipela, ebukwe wa Mamure, okwa Aburahamu yakula okhurula khu Efuroni Omuhiti mbu, kube okwokhuyabilangamwo abandube abafwile.

¹⁴Olwa Yosefu yali namalile okhuyabila samwana, yakalukha Misiri nende abasiani babwe nende boosi aba yali natsiile ninabo okhuyabila samwana.

¹⁵Olwa abasiani babwe Yosefu balola mbu, sabwe afwile, abandi khubo baboola bari, “Kanyala okhuba mbu, Yosefu atsia okhukhusila nende okhukhurunga amabi koosi akakhwamukholela?”

¹⁶Kho nibarumana likhuwa khu Yosefu nibaboola bari, “Papawo yalachilisia nashili okhufwa ari,

¹⁷‘Boolela Yosefu mbu, emusaayile mbu, aleshele abasiani babwe koosi akabamukholela, abaleshele obwonooni bwabwe, shichila bakhukholela amabi!’ Ne bulaano khukhusaaya mbu, okhubeele obwonooni bwabasumba ba Nyasaye wa papawo bakhukholela iwe.” Olwa yahulila amakhuwa ako, Yosefu yalila.

¹⁸Abasiani babwe khandi boosi nibetsa nibakwa mumakuluke ne nibaboola bari, “Khuli abasumbabo.”

¹⁹Nebutswa Yosefu yababoolela ari, “Shimularie ta, nasi ekhali Nyasaye?

²⁰Khulwenywe, mwaparanga mbu, mukholelanga amabi, nebutswa Nyasaye yakakhola okhuba amalayi, yakakhola kho mbu, abandu abanji babeho mwoyo shinga olwa baliho bulano.

²¹Kho shimularie ta, ndalamuhelesia ebia mwenya, inywe, halala nende abaana benywe.” Kho nabahotselesia khandi nabalemia emioyo.

²²Kho Yosefu namenya Misiri, ye nende abeinzu ya samwana boosi. Naye namenya emiyika eshikhumi shilala nende ekhumi.

²³Yosefu yamenya okhuula nalolakhwo abaana ba Efuraimu nende etsukhulube. Khandi yamenya okhuula olwa yalolakhwo nende okhwinjisia abaana ba Makiri, omwana wa Manase mubomunzuye.

²⁴Mana Yosefu naboolela abaana babwe ari, “Endi ahambi okhufwa, nebutswa Nyasaye alamulinda inywe, mana amwimilile okhurula mushialo shino, namuyila mushialo shia yetsuba khuhelesia Aburahamu, Isaka nende Yakobo.”

²⁵Mana Yosefu niyetsubila abaana babwe naboola ari, “Olwa Nyasaye yakhamwimilile okhutsia mushialo eshio, okhuula mulichinga amakumba kanje mwatsia ninako.”

²⁶Mana Yosefu nafwa nali nemiyika eshikhumi shilala nende ekhumi. Nibasilikha omubilikwe, nibakubiikha mwisanduku mushialo shia Misiri, khulwokhukuyabila.