Read wanga OBUCHACHILO 6 Bible Online

OBUCHACHILO 6 - wanga bible

OBUCHACHILO 6

¹Olwa abandu bachaaka okhuba abanji khushialo, ne nibebula abaana abakhaana,

²Abamalaika bahenga hasi khushialo nibalola mbu, abakhaana babandu bali abelikondo lilayi. Kho abamalaika abo nibeyahulila abakhaana abo okhuba abakhasi babwe.

³Mana OMWAMI Nyasaye naboola ari, “Shindiitsa okhufuchilila omundu okhubaho mwoyo inziayo ta, okhuba ye nomundu namundu. Nebutswa alamenyanga khulwemiyika eshikhumi shilala nende amakhumi kabili chionyene.”

⁴Mutsinanga etsio, kata nende mutsinyanga tsiolunyuma, emindu emikhongo chialiho khushialo, echiarulana khulwibulo lwabaana ba Nyasaye nende omundu. Emindu tsana echio, nichio echiali echiamaani khandi echieifuma ikhongo muno mutsyanga tsiakhale etsio.

⁵Olwa OMWAMI Nyasaye yalola shinga olwa buli mundu yali omumayanu, khandi shinga olwa amapaaro komundu kali buli lwosi akobwonooni,

⁶yabeelela muno khulwa okhulonga omundu khushialo, ne nasinyikha mumwoyokwe muno,

⁷Mana naboola ari, “Ndalamulula buli mundu owandalonga. Ndalamulula abandu bano nende tsisolo nende ebindu ebimoolanga, nende amanyonyi, okhuba esinyiishe muno, emanyanga shindakhabilonjilekhwo ata shilala tawe.”

⁸Nebutswa OMWAMI Nyasaye yachamisibwa nende Noa.

⁹Kano namakhuwa ka Noa. Noa yali omundu omulunjishi imbeli ewa Nyasaye. Mubulamubwe bwosi, shiyalikhwo neshika tawe. Noa yakhola amakhuwa amalayi kokhuchamisia Nyasaye.

¹⁰Ne Noa yali nende abasiani bataru bano, Shemu, Hamu nende Yafetsi.

¹¹Nebutswa abandu boosi bonoonela Nyasaye, khandi eshialo shiali nishietsulamwo induli.

¹²Mana Nyasaye nahenga khushialo ne nalola mbu, neshimayanu muno, okhuba abandu boosi bali nibamenya obulamu obumayanu.

¹³Mana Nyasaye naboolela Noa ari, “Enduutsi mbu, nobulayi okhumulula abandu boosi okhurula khushialo, okhuba eshialo shitsuulemwo ebikhole bieindului. Lola, ndalabamulula boosi pe halala nende eshialo shiosi.

¹⁴Khulweshio wikaasilie eliaro likhongo okhurula khutsimbao tsiomusaala omukomari, okhalachemwo ebisika, mana obashekhwo ihula mukari nende elwanyi walio.

¹⁵Olikaasie ori, oburambi bwalio bube tsifuti ebukhumi bine namakhumi karaano, obuchiikha bwalio bube tsifuti amakhumi musaafu natsirano, nabwo obwiyinikhu bwalio bube tsifuti amakhumi kane natsirano.

¹⁶Okaasie eshilama ore khuliaro elo, ne oleshekhwo obwiyangu bwelitirisha, obuhela ifuti ndala neinusu okhurula khushilama eshio, mana ore omuliango mumbafu mwalio. Umbashe libe lietsigorofa tsitaru okhutsia ikulu.

¹⁷Okhuba ndalareera omuyembo kweyifula okhumulula ebilonje ebili mwoyo biosi khushialo. Buli shindu eshili khushialo shilafwa.

¹⁸Nebutswa ndalakhola indakano hakari wanje ninawe. Ne iwe nende abasianibo, omukhasiwo nende abakhasi babasianibo, mulenjila muliaro elo.

¹⁹Nawe olenjila muliaro elo nende bibili bibili biokhubuli oluyia lweshilonje eshili mwoyo, eshisaatsa nende eshikhasi kho mbu, obihonokosie bibeho mwoyo halala ninawe.

²⁰Winjilemwo nende linyonyi lisaatsa nende likhasi okhurula khu buli oluyia lwamanyonyi, khandi tsisolo tsiosi, isaatsa neikhasi okhurula khubuli oluyia lwatsio kho mbu, bitsiililile okhubaho mwoyo.

²¹Winjilemwo nende ebiokhulia mana obibiishe, bibe ebiokhuliabio nende ebietsisolo namanyonyi.”

²²Mana Noa nakhola shinga olwa Nyasaye yamulaka okhukhola.