Read wanga OBUCHACHILO 8 Bible Online

OBUCHACHILO 8 - wanga bible

OBUCHACHILO 8

¹Mana Nyasaye niyetsulila Noa nende tsisolo nabulimo nende emiruko chiosi echia yali ninachio muliaro. Kho nakhola omuyeka okhuhutsa khushialo, nako amaatsi nikachaaka okhukhamulukha.

²Amaatsi akafuutuukhanga okhurula hasi weliloba nikalekha okhufuutuukha, khandi amatirisha komumaleesi nikekala. Ifula niyilekha okhukwa,

³nako amaatsi nikatsiililila okhukhamulukha khushialo khulwa tsinyanga eshikhumi shilala nende amakhumi karano.

⁴Khunyanga yomusaafu mumwesi kwekhumi namusaafu, okhurula omuyembo kwamaatsi nikubaho, eliaro lierenjekha khubutenje bweshikulu shia Ararati.

⁵Mana amaatsi nikatsiililila okhukhamulukha. Ne inyanga yambeli yomwesi kwekhumi, obutenje bwebikulu bwachaaka okhulolekha.

⁶Olunyuma lwetsinyanga amakhumi kane, Noa yekula litirisha khwisisi lie eliaro,

⁷ne naruma likhookho okhutsia elwanyi, ne shiliachelela tawe. Liabotokhana butswa okhuula olwa amaatsi kakhamulukha khushialo.

⁸Kho naruma lihusi okhulola nikaba mbu, amaatsi kakhwele khushialo.

⁹Ne okhuba mbu, amaatsi ako kali nikashiyembile khushialo, lihusi elo shilianyoola habundu, halinyala okhuyeela ta, kho nilichelela muliaro. Mana Noa nanyiila omukhonokwe, natiila lihusi elo ne nalikalusia muliaro.

¹⁰Noa yaliindakhwo khulwa tsinyanga tsindi musaafu, mana naruma khandi lihusi elo elwanyi weliaro.

¹¹Lihusi elo liachelela khungoloobe, nilichinjile lisaafu liomuseituni omutoro khumunwa kwalio. Kho Noa namanya mbu, amaatsi kakhamulushe khushialo.

¹²Mana naliinda tsinyanga tsindi musaafu, khandi naruma lihusi elwanyi, ne nililachelelakhwo khandi tawe.

¹³Khunyanga yambeli yomwesi kwambeli, Noa nali nemiyika ebikhumi bisasaba namulala, amaatsi kali nikakhamulushe khushialo. Mana Noa nafwimbula eshilama shieliaro, nahenga eyi nende eyi, ne nalola mbu, eshialo shisangalaale.

¹⁴Khunyanga yamakhumi kabili namusaafu, eyomumwesi kwakhabili, eshialo shiali nishimalile okhuuma shiosi.

¹⁵Mana Nyasaye naboolela Noa ari,

¹⁶“Iwe nende omukhasiwo nende abasianibo halala nabakhasi babwe, murule elwanyi weliaro.

¹⁷Murulemwo nende ebindu biosi ebili mwoyo, amanyonyi, tsisolo nende buli shindu shiosi eshimoolanga khushialo mbu, biibulane nibiba ebinji muno khushialo.”

¹⁸Kho Noa halala nomukhasiwe, nende abasianibe halala nabakhasi babwe, nibarula muliaro.

¹⁹Mana buli isolo, nende buli shindu eshimoolanga khwiloba nende buli linyonyi, buli shindu eshichendanga khushialo, eshisaatsa neshikhasi nibirula elwanyi weliaro.

²⁰Mana Noa niyombashila OMWAMI Nyasaye eshimalilo shiemisango, nabukula khubuli isolo isiiye nende linyonyi lisiiye, ne nabisamba biosi pe khushimalilo shiemisango.

²¹Olwa OMWAMI Nyasaye yahunyilisia isaakakha, ne niyimuchamisia, yaboola mumwoyokwe ari, “Shindililaamilakhwo khandi liloba eshilaamo shiobubi khulwa obumayanu bwomundu ta, shichila okhurula mubwanabwe, amaparoke namamayanu. Kata shindilimululakhwo khandi buli shindu eshili mwoyo shinga olwa ndakhola tawe.

²²Shinga olwa eshialo shilatsiililla okhubaho, ebise shibilachweyanga okhubaho ebiokhuraaka nende ebiokhuchesa ebiraache, ebiomunyiri nende ebiomubasu, ebieifula nende ebieshimiyu, ebieshilo nende ebieshiteere tawe.”