Read wanga OBUCHACHILO 9 Bible Online

OBUCHACHILO 9 - wanga bible

OBUCHACHILO 9

¹Mana Nyasaye nalaamila Noa nende abaanabe abasiani tsikhabi naboola ari, “Mwibulane nimumeetekha mana mwitsule khushialo.

²Buli isolo, linyonyi nende ebindu biosi ebimoolanga nende tsinyeni bilamuria inywe. Biosi bili hasi wobunyali bwenywe.

³Mulaliitsanga buli shindu eshichendanga khandi eshili mwoyo. Khandi shinga olwa ndamuhelesia emimela okhuba eshiokhulia shienywe, nolwa emuhelesiiye ebindu biosi mbu, bibe ebiokhulia bienywe.

⁴Ne shimulaliitsanga inyama niyishilimwo amalasile tawe, okhuba obulamu buli mumalasile.

⁵Omundu yesi yesi naba narusiaho obulamu bwomundu washie, yesi yakhanyoole eshinyasio, ne isolo yosi yosi niyirusiaho obulamu bwomundu, ndakhachihelesie eshinyasio shiokhufwa.

⁶Omundu yalongwa mwikondo lia Nyasaye, kho omundu yesi yesi naba niyera omundu washie, oundi yesi khandi yakhamwire.

⁷Nenyu inywe, emulaka mbu, mwibulane nimumeetekha muno khushialo.”

⁸Mana Nyasaye naboolela Noa nende abasianibe ari,

⁹“Bulano ekhola indakano ninenywe nende abolwibulo lwenywe,

¹⁰nende eshilonje shindi shiosi eshili mwoyo nende amanyonyi nende emiruko, nende buli isolo yokhushialo, nende biosi ebiorulile muliaro ninabio.

¹¹Esuubisia mbu, shindilimululakhwo abandu nende tsisolo okhubirira mumuyembo kweifula khandi tawe. Ne khandi omuyembo kweifula shikulibakhwoho okhusasia eshialo tawe.”

¹²Mana Nyasaye naboola ari, “Ndalaraho eshilolelo shiendakano eyekholanga ninenywe nende buli shindu eshili mwoyo eshia muli ninashio bulano nende khulwa tsinzibulo tsiosi etsiakhetse olunyuma.

¹³Endetsangaho olulindi lwanje mumaleesi, ne lulaba eshilolelo shieindakano yanje nende abeshialo.

¹⁴Olwa endeera olucheka lweifula khushialo mana olulindi luloleshe mumaleesi,

¹⁵ndaletsulila indakano yanje hakari wanje ninenywe nende tsisolo tsiosi mbu, omuyembo kweifula shikulimululakhwo khandi ebilonje ebili mwoyo tawe.

¹⁶Olulindi niluli mumaleesi, ndalalulolanga nindiitsulila indakano yeyinziayo, eyandakhola nende ebilonje biosi ebiokhushialo ebili mwoyo.”

¹⁷Nyasaye naboolela Noa ari, “Shino nishio eshilolelo shieindakano hakari wanje nende ebilonje biosi ebili mwoyo ebili khushialo.”

¹⁸Abasiani ba Noa abarula muliaro bali Shemu, Hamu nende Yafetsi. Hamu niye owali samwana Kanani.

¹⁹Bataru abo nibo abali abasiani ba Noa, ne nibo abebula abandu abali khushialo boosi.

²⁰Noa niye owali omulimi wambeli. Niye owali owambeli okhuraaka omukunda kwemitsabibu,

²¹ne olwa yanywakhwo idivai, yameela, ne nafwalula tsingubotsie nakona shichula mwiheemalie.

²²Olwa Hamu, samwana Kanani yalola mbu, samwana ali shichula, yarula natsia elwanyi naboolela abasiani babwe babili abo.

²³Kho Shemu nende Yafetsi nibabukula ingubo nibachinga khumabeka kabwe, nibachenda eshinamukongo okhuula mwiheema, nibafwimba shichula shia sabwe nibamufutariire ne nibalalolakhwo shichulashie tawe.

²⁴Olwa Noa yameelulukha ne namanya aka omwanawe wamakhokoro yali namukholeele,

²⁵yaboola ari, “Kanani ali mushilaamo shiobubi! Alaba omusumba wabasumba khubasiani babwe.”

²⁶Khandi Noa naboola ari, “OMWAMI Nyasaye, Nyasaye wanje, ahelesie Shemu ikhabi naye Kanani abe omusumba wa Shemu.

²⁷Nyasaye ahelesie Yafetsi olwibulo olunji, lusalaane khushialo, ne abolwibulolwe bamenye nende abolwibulo lwa Shemu! Naye Kanani abe omusumba wa Yafetsi.”

²⁸Olunyuma lwomuyembo, Noa yamenya emiyika ebikhumi bitaru nende amakhumi karano.

²⁹Noa yamenya emiyika chiosi halala ebikhumi shienda namakhumi karano ne nafwa.