Read wanga 2 SAMWELI 1 Bible Online

2 SAMWELI 1 - wanga bible

2 SAMWELI 1

¹Olunyuma lwokhufwa khwa Saulo, Daudi yakalukha namalile okhuhula Abameleki, ne namenya mwitookho lia Zikilagi khulwa tsinyanga tsibili.

²Inyanga yalondakhwo, omuraaka undi okhurula mukambi ya Saulo yetsa. Ne khulwa okhumanyia eshibeelashie, yali naraanduule tsingubotsie khandi niyepuuchile olufu khumurwekwe. Olwa yetsa wa Daudi yali, yenamia omurwekwe okhuula hasi khulwa okhuhelesia Daudi oluyali.

³Mana Daudi namureeba ari, “Orula heena?” Naye nakalusia ari, “Ndihonokosiye okhurula mukambi ya Abaisiraeli.”

⁴Daudi namureeba ari, “Mboolelakhwo, eshiikholeesheyo nishiina?” Kho omuraaka oyo namuboolela ari, “Abelihe befwe belushe okhurula mwihe. Khandi abanji khubo beerirwe. Saulo nende Yonatsani omusianiwe boosi khandi beerirwe.”

⁵Mana Daudi nareeba omuraaka tsana oyo ari, “Omanyile orie mbu, Saulo nende Yonatsani omusianiwe bafwile?”

⁶Omuraaka oyo namukalusia ari, “Embeele nendi khushikulu shia Giliboa, ne nindola Saulo nayeeshile khwifumolie. Nabo abasuku bokhumakaari nende abokhutsifarasi nibali ahambi okhumuulakhwo.

⁷Mana niyeshebukha, ne olwa yanduutsi ne niyananga. Nasi nefuchilila endi, ‘Omwami, endiho.’

⁸Ne niyareeba ari, ‘Niwe wiina?’ Nasi nemukalusia endi, ‘Endi Omumeleki.’

⁹Mana niyamboolela ari, ‘Yitsa hano unzire! Basaalisiye obubi muno ne endi ahambi okhufwa.’

¹⁰Mana nenzia ewa abeele, ne nemwira shichila embeele nemanyile mbu, olwa akwa hasi shialachweya okhufwa tawe. Mana nembukula ikofia yibeele khumurwekwe nende omukasa kubeele khumukhonokwe, mbu ebireere khwiwe omwami wanje.”

¹¹Mana Daudi narandula tsingubotsie mushibeela, khandi abasaatsa ba yali ninabo boosi nibakhola bario.

¹²Nibekhuula, nibalila khandi nibahonga inzala okhuula khubwile, khulwa okhufwa khwa Saulo nende Yonatsani omusianiwe nende khulwa Abaisiraeli, abandu aba OMWAMI Nyasaye, shichila abanji khubo bali nibeeriirwe mwihe.

¹³Mana Daudi nareeba omuraaka wali namubooleele amakhuwa ako ari, “Orulanga heena?” Naye namukalusia ari, “Endi Omumeleki halali ndamenya mushialoshio.”

¹⁴Daudi namureeba ari, “Mbushiina nolariakhwo okhwira omuruchi omwahule owa OMWAMI Nyasaye?”

¹⁵Mana Daudi nalanga omusaatsa mulala khubelihe namuboolela ari, “Mwire.” Kho omusaatsa oyo nakhupa Omumeleki oyo ne namwira.

¹⁶Mana Daudi naboolela Omumeleki tsana ari, “Eshitsayi shino shibe khwiwe omwene, shichila omwene wikhalachiile eshiina lwofuchiliile mbu, wiirire omundu owa OMWAMI Nyasaye yamala okhwahula mbu, abe omuruchi.”

¹⁷Mana Daudi niyekhuula niyemba khulwa Saulo nende Yonatsani omusianiwe.

¹⁸Khandi nalaka mbu, abandu ba Yuda bechesibwe olwikhuulu olwo. (Nalwo lwahandikwa mushitabu shia Yashari.)

¹⁹Kho Daudi niyekhuula ari, “Khubikulu bia Isiraeli abemilisi befwe bafwile. Abalwani befwe abalulu bakwile.

²⁰Shimulakarumbulekhwo mu Gatsi, kata khumihanda chia Ashekaloni tawe. Shimulakhole abakhasi Abafilisiti okhusaangaala, kata abakhaana ba abamahanga kalamumanyile Nyasaye okhutsatsahala tawe.

²¹Ifula kata liime shibilakwakhwo khubikulu bia Giliboa tawe. Emikunda chiabwe shichilaamakhwo imele ta, shichila tsingabo tsiabalwani abalulu tsikwile hasi mushifimbwa murwe. Ingabo ya Saulo shiyishibakhungwa amafura tawe.

²²Obuyingo bwa Yonatsani buli lwosi bweranga. Nalwo olukanga lwa Saulo shilwabeelanga omundu yesi yesi ta, lwafumiranga abasuku bamaani.

²³Saulo nende Yonatsani bali nibaheelwa khandi abeene nibaheelana. Khandi bali halala mubulamu, khandi bafwila halala. Bali abangu okhushila tsindutsu, khandi abamaani okhushila tsitalanyi.

²⁴Inywe abakhasi ba Isiraeli mwikhuule Saulo! Yamufwala tsingubo tsinzakhanyu tsiobukusi, khandi nara ebimili bieitsahabu khubifwalo bienywe.

²⁵Abalwani abalulu bakwile, berirwe mwihe. Yonatsani akonile hasi mubikulu afwile.

²⁶Ekhwikhuula iwe Yonatsani omusiani wefwe, wali omuheelwa muno khwisie. Obuheelibwo khwisie bwali obwamakana. Bwali obwamakana kata okhushila obuheeli bwabakhasi.

²⁷Abalwani abalulu bakwile, ebimanulwa biabwe bielihe bisishile.”