Read wanga 2 SAMWELI 10 Bible Online

2 SAMWELI 10 - wanga bible

2 SAMWELI 10

¹Olunyumakhwo, Nahashi owali omuruchi wa Amoni yafwa, ne omusianiwe mbu Hanuni nakalukha muburuchi bwa samwana.

²Mana Daudi naboola ari, “Ndalamanyisia Hanuni obuheeli shinga obwa Nahashi samwana yesi yalolesia khwisie.” Kho Daudi naruma abarume okhutsia okhulemia Hanuni omwoyo khulwa okhufwa khwa samwana. Olwa abarume abo boola Amoni,

³ne abemilisi ba Abamoni nibareeba omuruchi bari, “Opaara mbu, Daudi ahaananga oluyali khu papawo khulwa okhuruma abarume bano khulwa okhukhulemia omwoyo noho? Shikali kario ta! Daudi abarumile hano khulwa okhulaambuula nende okhurunilisia litookho kho mbu, nayetse yakhuseera nalibukula!”

⁴Mana Hanuni natiila abarume ba Daudi abo, nabeka buli mulala tsindefu tsiabwe obulatsimala tsiosi ta, khandi nakhalaka ebifwalo biabwe hakari mushishienje, ne nabaseebula nibatsia.

⁵Abasaatsa abo nibafwimbwa omurwe muno ne nibalakalukha nango wabwe tawe. Ne olwa Daudi yahulila akali nikekholeeshe, yarumana naboola mbu, abasaatsa abo bamenye Yeriko okhuula olwa tsindefu tsiabwe tsiliba nitsikhulile, kho balikalukha.

⁶Olwa Abamoni balola mbu bakholeele Daudi amakhuwa amabi, barumana abelihe abokhurungwa, Abasiria ebikhumila amakhumi kabili (20,000) okhurula Betserebu nende Zoba, nende abandi ebikhumila ekhumi nababili (12,000) okhurula Tobu, halala nende omuruchi wa Maka nende abelihebe eshikhumi shilala (1,000).

⁷Ne olwa Daudi yahulila amakhuwa ako, yaruma Yoabu okhutsia nende omukanda kwabelihe kwosi.

⁸Mana Abamoni nibarula nibeyanza habwinjililo bwelitookho liabwe likhoongo lia Roba. Nabo Abasiria abelihe bandi abokhurula Tobu nende Maka nibeyanza ebulafu mushikuri.

⁹Olwa Yoabu yalola mbu abasukube abo banyala okhumuseera okhurulila imbeli nende inyuma, yaahula abelihe ba Isiraeli abalulu okhuseera Abasiria.

¹⁰Nabo abelihe bandi nabakhola okhuba hasi wobwimilisi bwa Abishai omusiani wabwe, nabo abenabo nabakhola okhuseera Abamoni.

¹¹Mana Yoabu naboolela Abishai ari, “Nolola Abasiria nibaayombelela, witse ukhonyelele, nasi nindola Abamoni nibakhuyombelela ndaletsa okhukhukhonyelela.

¹²Obe oweitswoni mana khulwanile abandu befwe nende amatookho ka Nyasaye wefwe namaani. Naye OMWAMI Nyasaye akhoya yakhukholela akamuchamisia!”

¹³Kho Yoabu nende abandube nibachaaka okhuseera Abasiria, Abasiria abo nibamwilukha.

¹⁴Nabo Abamoni olwa balola Abasiria nibelukhanga, boosi belukha okhurula khu Abishai nibakalukha mwitookho. Mana Yoabu nalekha okhuseera Abamoni ne nakalukha Yerusalemu.

¹⁵Nebutswa olwa Abasiria balola mbu bahulilwe nende Abaisiraeli, bekhung'asia halala khandi.

¹⁶Omuruchi Hadadezeri nalaanga Abasiria abali injelekha womwalo kwa Yorodani, nibetsa Helamu nibeemiliilwe nende Shobaki, owali omusinjilili wabelihe lia Hadadezeri Zoba.

¹⁷Olwa Daudi yahulila, yakhung'asia abelihe ba Isiraeli nibambukha omwalo kwa Yufurate nibatsia Helamu, ewa Abasiria beyanza nibahengaane ninaye. Kho nibachaaka okhukhupana,

¹⁸Abasiria nibelukha okhurula khu Abaisiraeli. Daudi nende abandube nibeera Abasiria abali namakaari ketsifarasi ebikhumi musaafu (700). Nabo abokhubilenje nibeera abandu ebikhumila amakhumi kane (40,000). Khandi nafumira Shobaki, owali omusinjilili wabelihe liabwe, naye yamala afwile mwihe elo.

¹⁹Olwa abaruchi abali muburuchi bwa Hadadezeri boosi balola mbu, bahulilwe nende Abaisiraeli, bakaasia omulembe ninabo ne nibaba hasi wabandu ba Isiraeli. Abasiria bamala nibaria okhukhoonya Abamoni.