Read wanga 2 SAMWELI 11 Bible Online

2 SAMWELI 11 - wanga bible

2 SAMWELI 11

¹Mana mutsinyanga tsieirotso, tsiabaruchi batsitsanga mwihe, Daudi yaruma Yoabu nende abakhongobe nende abelihe ba Isiraeli boosi. Batsia nibahula Abamoni nende okhubotokhana litookho lia Raba. Habula Daudi yasikala Yerusalemu.

²Inyanga yindi khubwile, Daudi yabuukha mushitalishie ne natsia okhuchenda khushilama shieinzuye. Ne olwa yali nashichendangakhwo yalola omukhasi undi niyesinganga. Omukhasi oyo yali owelikondo lilayi.

³Kho Daudi naruma omundu okhureebelesia khukomukhasi oyo. Mana naboolelwa mbu, omukhasi oyo alangwa mbu Batsisheba, nomukhaana wa Eliamu, ne nomukhasi wa Uriah Omuhiti.

⁴Kho Daudi naruma omundu mbu amureere. Nibamureerera omukhasi oyo, ne Daudi nakona ninaye. (Naye omukhasi oyo yali kho namalile okhwisiiya olunyuma lwokhuba mumwesi.) Mana nakalukha ingowe.

⁵Olunyumakhwo, omukhasi oyo nanyoola mbu ali nomusiko, ne nayilila Daudi likhuwa mbu ali nomusiko.

⁶Naye Daudi narumana likhuwa khu Yoabu naboola ari, “Ruma Uria Omuhiti yetse.” Kho Yoabu naruma Uriah ewa Daudi yali.

⁷Olwa Uria yetsa, Daudi yamureeba shinga olwa Yoabu nende abelihebe bali nibatsiilililanga, khandi shinga olwa lihe elo liali nilitsiilililanga.

⁸Mana Daudi naboolela Uriah ari, “Tsia nangowo, ouluushekhwo hatiiti.” Uria natsia, ne Daudi namurumila eshihaanwa ingowe.

⁹Nebutswa Uria shiyatsia ingowe ta, habula yeyalisia butswa hamuliango weinzu yomuruchi halala nabalindi bomwamiwe boosi.

¹⁰Olwa Daudi yaboolelwa mbu Uria shiatsiile ingowe ta, yamulaanga namureeba ari, “Ocheleele okhurula muluchendo olurambi, mbushiina nolatsia nango?”

¹¹Naye Uria namukalusia ari, “Abandu ba Isiraeli nende Yuda bali ehale mwihe, bali nelisanduku lieindakano. Omusinjilili wanje Yoabu nende abelihebe bakhupile tsikambi tsiabwe mushikuri. Kho nasi ndakhatsia endie ingo okhunywa, nokhulia, nokhukona nomukhasi wanje? Nditsuba muliiralio mbu, shienyala okhukhola likhuwa shinga elo tawe!”

¹²Mana Daudi naboolela Uriah ari, “Inyanga yino wikhale hano khandi, ne mukamba olatsia.” Kho Uria niyekhala mu Yerusalemu inyanga eyo nende eyaloondakhwo.

¹³Mana Daudi niyenjisia Uria, nibalia ninaye, khandi namunywesia nameela. Habula khungoloobe Uria yatsia okhwiyalisia khubulilibwe halala nabalindi bomuruchi.

¹⁴Olwa bwashia Daudi yahandika ibarwa nahelesia Uria mbu, ayilile Yoabu.

¹⁵Yahandika mubarwa omwo naboola ari, “Ore Uria imbeli wa lihe lili lilulu. Mana mumuleshe nimwilukha naye afumirwe afwe.”

¹⁶Kho olwa Yoabu yali nabotokhananga litookho, yaruma Uria ewa yamanya mbu abasuku nabalulu.

¹⁷Mana abelihe belitookho elo nibarula okhukhupana nende abelihe ba Yoabu. Abandu bandi khubelihe ba Daudi nibeerwa, ne Uria Omuhiti yesi nafwilamwo.

¹⁸Mana Yoabu narumila Daudi amakhuwa khukelihe elo,

¹⁹ne naboolela omurume oyo ari, “Olwa oba niwakhamala okhuboolela omuruchi khukelihe elo,

²⁰anyala okhusinyikha ne nareeba ari, ‘Mbushiina nimusita ahambi muno nelitookho khulwa okhubaseera? Shimumanyilenje mbu, banyala okhuniinila khulukoba nibamulasa ta?

²¹Owera Abimeleki omusiani wa Gideoni yali wiina? Shiyali omukhasi undi owaniina khulukoba ne namulasa neikhomako nafwa Tsebezi? Kho mbushiina nenywe nimusita hambi neliisiisi murio?’ Naba nakhureeba ario, omuboolele mbu, Omukhalabaniwo Uria Omuhiti yesi yafwile.”

²²Mana omurume oyo natsia wa Daudi yali, ne namuboolela aka Yoabu yali namulachilisiye okhuboola.

²³Kho naboolela Daudi ari, “Abasuku befwe bakhuyinjile namaani mana nibarula mwitookho nibetsa okhukhuseera ebulafu. Nebutswa khubaloondile okhuula mubwinjililo bwelitookho.

²⁴Mana nibaniina khulukoba nibalasa abelihebo nobuyingo, nibeera abandi khubelihebo, omukhalabaniwo Uria yesi afwile.”

²⁵Daudi naboolela omurume oyo ari, “Tsia otsuube Yoabu, ne omuboolele mbu shialafwa omwoyo ta, shichila shiomanyanga oulafwila mwihe tawe. Omuboolele ameete okhuseera litookho elo obutinyu mana alibukule.”

²⁶Olwa Batsisheba omukhasi wa Uria yahulila mbu, omusaatsawe Uria afwile, yamwikhuula.

²⁷Olwa tsinyanga tsiokhwikhuula tsiali nitsihwele, Daudi yarumana mbu Batsisheba yetse munzuwe, kho Batsisheba naba omukhasi wa Daudi, ne namwibulila omwana omusiani. Nebutswa likhuwa lia Daudi yakhola elo shiliachamisia OMWAMI Nyasaye tawe.