Read wanga 2 SAMWELI 12 Bible Online

2 SAMWELI 12 - wanga bible

2 SAMWELI 12

¹OMWAMI Nyasaye yaruma omulakusi Natsani khu Daudi. Ne olwa Natsani yatsia wa Daudi, yamuboolela ari, “Baliho abandu bandi babili abamenyanga mwitookho elala, mulala khubo yali omuyinda naye oundi omutakha.

²Omuyinda oyo yali netsing'ombe tsinyinji khandi namakondi amanji,

³naye omutakha oyo yali butswa neshimeeme shielikondi shilala, eshia yali niyakula. Yashilinda obulayi, nishikhulila mungomwe halala nende abaanabe. Yashiliisiinjia khubiokhuliabie, nashinywesilia mushikombeshie, khandi shiakonanga khushilifushie. Eshimeeme eshio shiali shinga omwana omukhaana khuye.

⁴Inyanga yindi omucheni yacheniya mungo mwomuyinda oyo. Omuyinda oyo shiyayenya okhubukula shilala khubiayobie kata khung'ombetsie khulwa okhusinzila omucheniwe tawe.” Habula yatsia nabukula eshimeeme shiomutakha eshio nasinzila omucheniwe.

⁵Daudi nasinyikha khulwa omuyinda oyo ne naboola ari, “Nditsuba muliira elia OMWAMI Nyasaye mbu, omundu wakhola likhuwa elo akwanile okhufwa!

⁶Khulwa okhukhola likhuwa elo, omuyinda oyo okhuula arunje omutakha oyo akhandi khane khushimeeme shia yabukula eshio, shichila shiyalolela omutakha oyo eshisa tawe.”

⁷Mana Natsani naboolela Daudi ari, “Niwe omubatsa tsana oyo. Ne kano niko aka OMWAMI Nyasaye wa Isiraeli aboola ari, ‘Ndakhwahula okhuba omuruchi wa Isiraeli khandi nekhuhonia okhurula khu Saulo.

⁸Ndakhuhelesia lihangalie nende abakhasibe, nikhukhola omuruchi wa Isiraeli nende owa Yuda. Ne kata bino nibiakhabeele ebileemu muno, ndakhakhumeetile ebindi khandi birio.

⁹Kho eshichilile nokhaya okhulonda amalako kanje nishiina? Mbushiina nokhola eshindu eshibi shino? Wakholile Uria Omuhiti okhwiirwa nolukanga, walekha niyeerwa nolukanga lwa Abamoni khandi nobukula omukhasiwe!

¹⁰Khulweshio, buli abolwibulolwo, abetsukhulubo bakheerungwe nolukanga shichila ufwolile, ne nobukula omukhasi wa Uria okhuba omukhasiwo.

¹¹Isie OMWAMI Nyasaye ekhwitsubila mbu, ndakhakhole mulala khubeinzuyo okhukhureerera amasila. Iwe omwene wakhalole nembukula abakhasibo nihelesia omusaatsa undi, naye yakhakone ninabo mushiteere.

¹²Iwe wonoona masiliisi, nebutswa isie ndalakhola likhuwa lino mushiteere, mana Abaisiraeli boosi balilole.’ ”

¹³Mana Daudi naboolela Natsani ari, “Ekholeele OMWAMI Nyasaye obwonooni.” Naye Natsani namukalusia ari, “OMWAMI Nyasaye akhulesheele obwonoonibwo, kho shiolafwa tawe.

¹⁴Nebutswa khulwa okhuba ofwolile OMWAMI Nyasaye mushikhole eshio, omwanawo niye oulafwa.”

¹⁵Mana Natsani niyenyokha nakalukha nangowe. OMWAMI Nyasaye yakhola omwana womukhasi usika Uria yebula nende Daudi okhuba omulwale muno.

¹⁶Daudi nasaaya Nyasaye muno mbu, omwana oyo ahone. Daudi nahonga inzala khulwokhusaaya, khandi buli nyanga yenjilanga munzuye niyeyalisia hasi eshilo shiosi.

¹⁷Abakhongo bomunzuye bamwitsila nibateema okhumubuusia, nebutswa yakhaya, khandi naloba kata okhulia ebiokhulia ninabo.

¹⁸Olunyuma lwelichuuma elala, omwana oyo nafwa. Abakhongo ba Daudi nibaria okhumuboolela mbu, omwanawe afwile. Nibaboolelana abeene khu beene bari, “Olwa omwana abeele nashili mwoyo, khwaboolilenje nende Daudi naye nalakhukalusia eshindu ta, kho nakhumuboolele khurie mbu omwanawe afwile? Yakhekhola likhuwa libi!”

¹⁹Olwa Daudi yahulila abasumbabe nibamonyananga abeene khu beene ne namanya mbu, omwanawe afwile. Kho nabareeba ari, “Omwana afwile noho?” Nabo nibamukalusia bari, “Afwile.”

²⁰Mana Daudi nabuukha okhurula hasi, niyesinga, nakaasia liswilie, khandi nafwala tsingubo tsindayi ne natsia munzu eya OMWAMI Nyasaye namwinamila. Mana nakalukha munzuye nasaba ebiokhulia, nibamurenjeshela naye nabilia.

²¹Abakhalabanibe nibamureeba bari, “Shikhumanyilisinjia likhuwa liokholile lino ta, lwomwana yabeele nashiliho mwoyo, wahonjilenje inzala nomulilila, ne bulano lwomwana afwile, obuushile nolia ebiokhulia!”

²²Naye Daudi nabakalusia ari, “Kali habwene, olwomwana yabeele nashiliho mwoyo, ndahonjilenje inzala khulwokhusaaya nende okhulila, shichila ndapaarirenje mbu, OMWAMI Nyasaye alambeela tsimbabasi mana aleshe omwana abeho mwoyo.

²³Nebutswa bulano afwile, eshiakhachila ndahonga inzala nishiina? Shienyala okhumukalusia tawe. Inyanga yindi siesi ndakhatsie ewa atsiile, nebutswa ye shianyala okhungalushila tawe.”

²⁴Mana Daudi nalemia omukhasiwe Batsisheba omwoyo, naba ninaye, naye niyebulila Daudi omwana omusiani, Daudi namukulikha mbu, Solomoni. OMWAMI Nyasaye naheela omwana oyo,

²⁵ne naruma omulakusi Natsani mbu, atsie okulishe omwana oyo mbu, Yedidia. [4]

²⁶Mana Yoabu naseera Raba, eliali litookho likhongo lia Abamoni, ne nalibukula.

²⁷Ne naruma abarume khu Daudi okhumuboolela bari, “Ndaseerire litookho lia Raba, khandi embukuule litookho liabwe lilimwo litiba lia banywetsangamwo amaatsi.

²⁸Kho bulano khung'asia abelihebo halala mana oseere litookho elo olibukule omwene. Shinzenya okhunyoola oluyali lwokhulibukula tawe.”

²⁹Kho Daudi nakhung'asia abelihebe boosi ne natsia naseera Raba nalibukula.

³⁰Mana nabukula olusimbi okhurula khumurwe kwomuruchi wabwe. Olusimbi olwo lwali nobusiro buhela tsikilo amakhumi kataru natsirano, khandi lwalimwo lichina liobukusi. Daudi yabukula olusimbi olwo ne niyefwala khumurwekwe. Khandi nabukula ebiyaayo ebinji okhurula mwitookho elo.

³¹Mana nabukula abandu belitookho elo nabara khumilimo chiokhwara tsimbao, nende echiebibia ebimemu nende echiokhwasiaka tsikhwi. Khandi nabanichilisia okhukhola emilimo chiebilonjelo biamatofwali. Yakholela ario amataala koosi ka Abamoni. Mana Daudi nende abandu ba yali ninabo boosi nibakalukha Yerusalemu.