Read wanga 2 SAMWELI 13 Bible Online

2 SAMWELI 13 - wanga bible

2 SAMWELI 13

¹Bulano Abusalomu omusiani wa Daudi yali nomukhaana wabwe welikondo lilayi, oulangwa mbu Tamari. Olunyuma lwetsinyangakhwo, Amunoni omwana wa Daudi yaheela Tamari.

²Amunoni yachama Tamari muno okhuula nalwala. Ne okhuba Tamari yali nashili omushisila, bwali obutinyu khulwa Amunoni okhuba ninaye. Shichila abakhaana abashisila bekalilungwa okhwakaana nabasaatsa.

³Habula Amunoni yali nomwitsawe mbu, Yonadabu omusiani wa Shimea, omusiani wabwe Daudi. Yonadabu yali omundu omuchesichesi muno.

⁴Mana Yonadabu nareeba Amunoni ari, “Iwe oli omwana womuruchi, ne eshichilanga nobeelela obushia nobushia nishiina.” Amunoni namukalusia ari, “Ndamuheela Tamari, omukhaana wabwe Abusalomu omusiani wefwe.”

⁵Naye Yonadabu namukalusia ari, “Tsia wiyalisie mushitali mana wikaatie mbu, olwala. Olwa papawo aletsa okhukhulola, omuboolele ori, ‘Nochama boolela omukhaana wefwe Tamari yetse yambelesie ebiokhulia endie. Yangaasilie ebiokhulia nemulola khandi abingaamile nomukhonokwe omwene.’ ”

⁶Kho Amunoni niyekaatia mbu, nomulwale ne natsia okhwiyalisia khushitali. Omuruchi Daudi yatsia okhumulola ne Amunoni namuboolela ari, “Chama Tamari yetse yangaasiliekhwo amandasi ahenyala okhumulola, mana omwene yandeerere.”

⁷Kho Daudi narumana likhuwa khu Tamari naboola ari, “Tsia munzu mwa Amunoni omusiani wenywe omukaasilie ebiokhulia.”

⁸Mana Tamari natsia nanyoola Amunoni nali mushitali. Nabukula obusie nabunyooba, ne nakaasia amandasi Amunoni nalola. Mana nateekha amandasi ako,

⁹nakatsukha koosi imbeliwe mbu alie. Nebutswa Amunoni yaloba okhukalia, namuboolela ari, “Loonda abandu boosi barule elwanyi.”

¹⁰Mana Amunoni naboolela Tamari ari, “Ndeerera amandasi ako hano mushitali muno mana ungaamile nomukhonokwo omwene.” Kho Tamari niyenjila ewa yali mushisikashie namuyilila amandasi ka yali nakaasiye.

¹¹Olwa yali namukaamilanga ne Amunoni namukwakhwo namaani namuboolela ari, “Omukhaana wefwe itsa okone ninasi.”

¹²Naye Tamari namukalusia ari, “Tawe, mwana wefwe, shiolanichilisia okhukhola eshindu shieshifwimbwa murwe shino tawe. Eshifwabwi shino shishikhoyile okhwikholekha mu Isiraeli tawe.

¹³Nasi ndakhara heena tsisoni tsianje? Nawe olaba mulala khubeshiyingwa ba Isiraeli. Nochama tsia oboole nomuruchi, ne emanyile mbu shialanzikalila okhwitsa khwiwe tawe.”

¹⁴Nebutswa Amunoni shiyarecheresia aka Tamari yamuboolela tawe. Ne okhuba Amunoni yali namaani okhushila Tamari, yakona ninaye namaani.

¹⁵Mana Amunoni nasila Tamari muno, namala namusila kata okhushila okhuheela khwa yali niyamuheela olwambeli. Mana Amunoni namuboolela ari, “Rula otsi.”

¹⁶Naye Tamari namukalusia ari, “Tawe! Likhuwa liokhunoonda lino ni libi kata okhushila libi liomalile okhukhola.” Nebutswa Amunoni shiyamurecheresia tawe.

¹⁷Mana nalaanga omukhalabaniwe namuboolela ari, “Rusia omukhasi uno imbeli wanje! Musukune elwanyi mana omwikalileyo.”

¹⁸Mana omukhalabani oyo namusukuna elwanyi ne niyekala omuliango. Naye Tamari yali niyefwalile ingubo indayi eyamakhono amarambi, shichila abakhaana bomuruchi abashili abashisila befwalanga bario mutsinyanga etsio.

¹⁹Mana Tamari niyepuuka likoshe khumurwe narandula inguboye ne nafuunikha obwenibwe namakhono natsia nalilanga obutinyu.

²⁰Olwa Abusalomu omusiani wabwe yamulola, yamureeba ari, “Amunoni omusiani wefwe akhwonooniye noho? Omukhaana wefwe elo shililakhunyasia omwoyo ta, olaboolelakhwo omundu yesi yesi ta, shichila ye nomusiani wenywe.” Kho Tamari namenya munzu mwa Abusalomu niyebeeleleele.

²¹Olwa omuruchi Daudi yahulilakhwo amakhuwa ako yaleka muno.

²²Naye Abusalomu natiilila Amunoni isila khulwa okhukwa khu Tamari omukhaana wabwe, kho mbu kata Abusalomu shiyaboolanakhwo nende Amunoni tawe.

²³Olunyuma lwemiyika chibili, Abusalomu yali natetanga obwoya bwamakondike Baali Hazori ahambi nende litaala lia Efuraimu. Mana nalaanga abaana bomuruchi boosi mbu babeho.

²⁴Kho Abusalomu niyetsa khumuruchi Daudi naboola ari, “Omwami, endetanga obwoya bwamakondi kanje, ekhwinjisia iwe nende abakhongobo boosi mwisabo elo.”

²⁵Omuruchi namukalusia ari, “Tawe mwana wanje, shikhunyala okhwitsa fwesi ta, khwakhakhusitohela.” Abusalomu namunichilisia mbu yetse, nebutswa omuruchi shiyafuchilila ta, habula yamulaamila tsikhabi mbu, lisabo elo libe lilayi.

²⁶Mana Abusalomu naboola ari, “Noba noletsa ta, ofuchilile omusiani wefwe Amunoni yetse.” Naye omuruchi namureeba ari, “Eshichila yetse nishiina?”

²⁷Nebutswa Abusalomu yanichilisia Daudi okhuula olwa Daudi yafuchilila mbu, abasianibe boosi halala nende Amunoni batsie nende Abusalomu.

²⁸Mana Abusalomu naboolela abakhalabani ari, “Muhenjelesie, ne olwa mulola Amunoni niyakhameela idivai nasi nemulaka mbu mumwire, shimularie tawe. Isie omwene ndaletuukha eshikha eshio. Mube abamaani ne shimularie tawe!”

²⁹Kho abakhalabani abo nibahulila aka Abusalomu yababoolela, ne nibeera Amunoni. Mana abasiani ba Daudi boosi nibaniina khu tsipuri tsiabwe ne nibelukha.

³⁰Olwa bali nibashili khuluchendo lwokhukalukha ingo, omundu yaboolela Daudi ari, “Abusalomu yeerire abasianibo boosi, kata mulala shiasikaalekhwo tawe!”

³¹Mana omuruchi nasinjila narandula tsingubotsie mushibeela ne nakona hasi. Abakhalabanibe abali nibali ninaye boosi nibarandula tsingubo tsiabwe.

³²Nebutswa Yonadabu omusiani wa Shimea omusiani wabwe Daudi yetsa naboolela Daudi ari, “Omwami, shiberire abaanabo boosi tawe. Amunoni yenyene niye oufwile. Kano niko aka yachoomanga okhukhola okhurula khunyanga ya Amunoni yakona Tamari omukhaana wabwe namaani.

³³Kho amakhuwa mbu abasianibo boosi bafwile kalakhuhendia omwoyo ta, Amunoni yenyene niye oufwile.”

³⁴Naye Abusalomu niyelukha. Ne omuraaka wali nali khumulimo kwokhulinda yachinguula tsimonitsie ne nalola abandu omukanda omukhongo nibakholomokhanga khumuhanda kurulanga Heronaimu. Mana natsia naboolela omuruchi aka yali naluutsi.

³⁵Mana Yonadabu naboolela Daudi ari, “Abasianibo mbabo betsanga, shinga olwa embeele nekhubooleele mbu baleetsa.”

³⁶Olwa yali butswa niyakhamala okhuboola amakhuwa ako, ne abasiani bomuruchi niboola. Mana nibachaaka okhwikhuula obululu.

³⁷Nebutswa Abusalomu yelukha natsia ewomuruchi Talimayi omusiani wa Amihudi owarukanga Geshuri. Naye Daudi niyekhuula omwanawe Amunoni oluhoono olurambi.

³⁸Olwa Abusalomu yelukha natsia Geshuri yamenyayo emiyika chitaru.

³⁹Nebutswa olwa Daudi yali nalemiibwe omwoyo khulwa okhufwa khwa Amunoni, amahofu kamulia khumwanawe Abusalomu.