Read wanga 2 SAMWELI 14 Bible Online

2 SAMWELI 14 - wanga bible

2 SAMWELI 14

¹Yoabu omusiani wa Zeruya yamanya mbu amahofu kalitsanga muno omuruchi Daudi khulwa Abusalomu.

²Kho narumana mbu balaanje omukhasi omuchesi okhurula Tekoa. Olwa omukhasi oyo yetsa, Yoabu yamuboolela ari, “Wikaatie mbu, wikhuulanga, mana ofwale tsingubo tsiokhwikhuula, ne shiolekaasia liswilio tawe. Mana wikhole butswa shinga omundu owakhekhuulanga khulwa oluhoono olurambi.

³Mana otsie imbeli womuruchi omuboolele amakhuwa kekhuboolela.” Mana Yoabu namuboolela aka atsia okhuboola.

⁴Mana omukhasi oyo natsia ewomuruchi niyenamia obwenibwe okhuula hasi khulwa okhuhaana oluyali, ne naboolela omuruchi ari, “Omuruchi, nochama ukhoonye.”

⁵Omuruchi namureeba ari, “Eshikhunyasinjia nishiina?” Naye namukalusia ari, “Isie endi omukhasi omulekhwa, omusaatsa wanje yafwa.

⁶Ndali nabaana abasiani babili, ne inyanga yindi basoolana abeene khu beene mushikuri, omundu shiyaliho owokhubakabukhasia ta, mana mulala niyeera oundi.

⁷Bulano abekho banje boosi baarulilekhwo, benyanga mbu, embahelesie omwana wanje watong'a bamwire khulwa okhwira owashie. Nibamwira ndalatong'a nembula omusiani yesi ta, khandi eliira liomusaatsa wanje lilasikha.”

⁸Omuruchi naboolela omukhasi oyo ari, “Kalukha nangowo, nasi ndalarusia lilako khumakhuwa ako.”

⁹Omukhasi oyo naboolela omuruchi ari, “Liosi liosi eliokhola, obubi bulaba khwisie nende khubeinzu yanje, nebutswa iwe nende aboburuchibo shibalabakhwo neshikha tawe.”

¹⁰Naye omuruchi namukalusia ari, “Omundu yesi yesi oukhuhendia omwoyo omureere khwisie, naye shialakhunyasiakhwo khandi tawe.”

¹¹Omukhasi oyo namuboolela ari, “Omwami, ekhusaaya mbu nochama oreebe OMWAMI Nyasayewo kho mbu yekalile omwikho oukhoyile okhumala eshikwoli shieshitsayi shiomwana wanje kho mbu, aleshe okhukhola obubi bundi obwokhwira omwana wanje watong'a tawe.” Daudi namukalusia ari, “Nditsuba muliira elia OMWAMI Nyasaye ouliho mwoyo mbu, omwanawo shialasaalisibwakhwo kata nahatuutu tawe.”

¹²Omukhasi oyo khandi naboola ari, “Omwami, nochama lekha khandi emboolekhwo lulala lwonyene.” Omuruchi namufuchilila mbu aboole.

¹³Omukhasi oyo naboola ari, “Mbushiina nokholela abandu ba Nyasaye likhuwa lino? Shiwafuchilila omwanawo okhukalukha ingo okhurula ewayelushila tawe. Kho wikhalachiile omwene eshiina khulwa amakhuwa kawakhaboola ako.

¹⁴Fwesi okhuula khulifwa. Khuli butswa shinga amaatsi akamalile okhusuundukha hasi, akalanyala okhukhunjelesibwa khandi tawe. Kata Nyasaye shiyeranga omundu ta, mushilenje eshio anyoolanga tsinjila tsianyala okhukalusiliamwo omundu owelushila mushialo shindi mbu, aleshe okhutsiililila okhuba ehale okhurula khuye.

¹⁵Bulano omwami, eshichilile nenzitsa okhuboola ninawe shili mbu, abandu bayariisiye, nasi nindiboolela omwene mumwoyo mbu, nditse emboole ninawe haundi wakhachama wakholela aka ekhureeba.

¹⁶Embaarire mbu, olarecheresia mana umbonie okhurula khu owenyanga okhwira omwana wanje halala ninasi, ne khulwa okhukhola ario akhurusieho fwesi okhurula mushialo shia Nyasaye yahelesia abandube.

¹⁷Ndibooleele omwene mbu, obusuubisiebwo bunyala okhuuhonia, shichila iwe omuruchi oli shinga omumalaika wa Nyasaye, khandi onyala okhwahukhasia amalayi okhurula khumabi. OMWAMI Nyasaye abe ninawe.”

¹⁸Omuruchi namuboolela ari, “Enzia okhukhureeba lireebo elala, ne shiolambisakhwo eshindu shiosi shiosi tawe.” Omukhasi oyo namukalusia ari, “Omwami onyala okhuureeba eshindu shiosi.”

¹⁹Omuruchi namureeba ari, “Yoabu alikhwo mumakhuwa kano?” Naye omukhasi oyo nakalusia ari, “Nditsuba muliralio iwe omwami wanje mbu, akoboolile nakahabwene. Omukhalabaniwo Yoabu niye oumbooleele akokhukhola nende akokhuboola.

²⁰Nebutswa akholile ario khulwa okhulunjisia likhuwa lino. Iwe Omwami oli nobuchesi shinga obwomumalaika wa Nyasaye khandi omanyanga amakhuwa koosi akekholekhanga.”

²¹Olunyumakhwo, omuruchi yamala aboolele Yoabu ari, “Bulano enzia okhukhola shinga olwa wenyile, tsia okalusie omuraaka Abusalomu hano.”

²²Mana Yoabu nakwa hasi imbeli wa Daudi khulwa okhuhaana oluyali naboola ari, “Omwami Nyasaye akhulaamile tsikhabi, bulano ndakhamanya mbu ochamisibwe ninasi, shichila ofuchilile akekhusabile.”

²³Mana nabuukha natsia Geshuri, ne nakalusia Abusalomu Yerusalemu.

²⁴Mana omuruchi naboola ari, “Mumuleshe amenye yenyene munzuye, aletsokakhwo imbeli wanje tawe.” Kho Abusalomu namenya yenyene munzuye, ne shiyaloleshelakhwo omuruchi tawe.

²⁵Omundu shiyaliho mu Isiraeli yoosi owali niyamanyikha khulwa likoondolie lilayi okhushila Abusalomu tawe. Shiyalikhwo nobulema bwosi bwosi okhurula khumurwe okhuula khubilenje tawe.

²⁶Liswilie liali lisiro muno, yalibekanga lulala buli khumuyika, olwa lialinji niliakharambiya muno khandi niliakhasitoha mumurwe. Olwa yachelanga obusiro bweliswilie liahelanga tsikilo tsibili okhulondana neshichelo shioburuchi, eshiabachelelanga obusiro.

²⁷Abusalomu yali nabaana abasiani bataru nende omukhaana mulala mbu, Tamari, owali omukhasi welikoondo lilayi muno.

²⁸Mana Abusalomu namenya emiyika chibili emilamba mu Yerusalemu nalaloleshelangakhwo omuruchi tawe.

²⁹Mana narumana mbu, Yoabu yetse, kho amurume khumuruchi. Nebutswa Yoabu shiyamala niyetsa tawe. Khandi narumana olwa khabili, Yoabu khandi naletsa tawe.

³⁰Kho Abusalomu naboolela abakhalabanibe ari, “Lole, omukunda kwa Yoabu kwarondokhana nende okwanje, naye yarakamwo ishayiri, tsie muchihafiemwo omulilo.” Kho abakhalabani ba Abusalomu nibatsia nibahafia ishayiri eyo omulilo.

³¹Yoabu niyetsa munzu mwa Abusalomu okhumulola, ne namureeba ari, “Mbushiina abakholibo nibahafia omukunda kwanje omulilo?”

³²Abusalomu namukalusia ari, “Ndaruma likhuwa khwiwe mbu, witse nawe noletsa tawe. Enzenyanga okhukhuruma khumuruchi mbu otsie omureebe ori, ‘Nishiina eshiachila nerula Geshuri nenzitsa hano? Bwakhabeele obulayi khwisie nindakhamenyileyo.’ Ndenyanga okaasie khwakane nomuruchi, ne nemba nendi neshikha, kho lekha yanzire.”

³³Kho Yoabu natsia khumuruchi namuboolela aka Abusalomu yali naboolile. Mana omuruchi narumana mbu, Abusalomu atsie. Olwa Abusalomu yetsa, yenama okhuula hasi imbeli womuruchi khulwa okhumuhelesia oluyali. Naye omuruchi namwinjisia namutsunzuuna.