Read wanga 2 SAMWELI 15 Bible Online

2 SAMWELI 15 - wanga bible

2 SAMWELI 15

¹Olunyuma lwa ako Abusalomu yekaasilia omwene likaari nende tsifarasi nende abandu amakhumi karano abamwimililanga imbeli.

²Mana buli nyanga yahuunanga okhusinjila khunjila yokhwinjila mwitookho. Ne lwomundu yesi yesi yabirangaho nali namakhuwa kenyekha okhukhalakwa nomuruchi, Abusalomu yamulaanganga halubeka mana amureeba ewa arulanga. Olunyuma lwomundu oyo okhumuboolela oluyia lwarulangamwo,

³Abusalomu yamuboolelanga ari, “Lola, amakhuwako namalayi khandi naka habwene, habula abulaho owomuruchi aheele obunyali okhukhuhulilisia tawe.”

⁴Khandi yameetanga okhuboola ari, “Shiakhuha ndaahulwa okhuba omuyaasi mushialo mana omundu yesi yesi ouli nobusoolo noho nelikhuwa liokhukhalakwa nomuruchi yakhanzitsiilenje, nasi nemukhalachila munjila ya habwene.”

⁵Ne lwomundu oyo yasitanga ahambi khu Abusalomu okhumwinamila, Abusalomu yayilanga omukhonokwe, namutiila nende okhumutsunzuuna.

⁶Abusalomu yakholanga ario khu Abaisiraeli boosi abetsanga khumuruchi khulwa obukhalachi bwa habwene, nolwa Abusalomu yakhola Abaisiraeli okhumuchama okhushila Daudi.

⁷Olunyuma lwemiyika chine, Abusalomu yaboolela Daudi ari, “Omwami, lekha enzie Heburoni nduusie eshitsubo shiandetsubila OMWAMI Nyasaye.

⁸Olwa ndali nemenyile Geshuri mushialo shia Siria ndetsubila OMWAMI Nyasaye mbu, naba nalingalusia Yerusalemu ndakhamwinamile nendi Heburoni.”

⁹Mana omuruchi namuboolela ari, “Tsia mumulembe.” Kho Abusalomu natsia Heburoni.

¹⁰Nebutswa yarumana abarume masiliisi mutsimbia tsia Isiraeli tsiosi naboola ari, “Olwa muhulila olwika nilukhupa mulaanjilisie muri, ‘Abusalomu niye omuruchi wa Heburoni.’ ”

¹¹Abusalomu yatsia nabandu ebikhumi bibili (200) okhurula Yerusalemu, aba yali nalaanjile, nabo batsia nibalamanyilekhwo likhuwa liosi liosi tawe.

¹²Ne olwa Abusalomu yali nakholanga emisango echio, yalaanga khandi Ahitsofeli owomwitaala lia Gilo, owali mulala khubachetsiyi ba Daudi. Mana obukhobani obwo nibuba namaani, nabo abandu balonda khu Abusalomu nibameetekha.

¹³Omurume niyetsa khu Daudi namuboolela ari, “Abaisiraeli boosi bahulilanga Abusalomu.”

¹⁴Kho Daudi naboolela abakhalabanibe boosi abali nibali ninaye Yerusalemu ari, “Buushe khwilushe! Nebutswa abulaho khwifwe oulahonokokha okhurula khu Abusalomu tawe. Khusumushilemwo butswa mubwangu buno, yakhetsukhana yetsa bwangu mana yakhunyoolelesia, yakhuhula khandi yeera abandu boosi mwitookho!”

¹⁵Nabo nibamukalusia bari, “Nihabwene omwami, ifwe khumalile okhwirechekha okhukhola liosi liosi elia oboola.”

¹⁶Kho omuruchi narula halala nende abeinzuye boosi nende abakhalabanibe. Habula yalekha inyuma abakhasibe ababiikha ekhumi okhulinda inzuye.

¹⁷Olwa omuruchi nende abandube bali nibarulanga mwitookho, basinjilakhwo nanzu yokhumalilikha.

¹⁸Mana abakhongobe boosi nibasinjila ahambi ninaye, nabo abalindibe nibabira imbeliwe. Abelihe ebikhumi bisasaba (600) abali nibamuloondilekhwo okhurula Gatsi boosi khandi nibabira imbeliwe.

¹⁹Mana omuruchi naboolela omwimilisi wabwe Itai ari, “Mbushiina wesi niwitsa ninefwe? Kalukha omenye nende omuruchi omuyia, shichila iwe oli omucheni khandi omuhuuyi omwilushi, owamenya ehale neshialoshie.

²⁰Iwe witsile butswa mukoloba muno, kho nekhubukule endie mbu, khuchendachende ninawe, ne kata shiemanyile ewa enzitsanga ta? Bukula aboluyialwo mana mukalusheyo ninabo. OMWAMI Nyasaye naye akhumanyie obuheelibwe oburalilu nende eshisashie.”

²¹Nebutswa Itai yamukalusia ari, “Nditsuba mbu shinga olwa OMWAMI Nyasaye ashiliho mwoyo, khandi shinga olwa Omwami omuruchi wanje ashiliho mwoyo, toto mwene hosi hosi ewa omwami omuruchi wanje alaba, kata khulwa okhufwa kata khulwa obulamu, niho aha siesi ndalaba.”

²²Mana Daudi namuboolela ari, “Nobulayi, chenda khutsie.” Kho Itai natsiililila niyambukha nende abandube boosi nende abaana abatiiti ba yali ninabo.

²³Abandu balila obutinyu olwa balola omuruchi nende abandube boosi nibatsitsanga. Mana omuruchi niyambukha libanda lia Kidironi, abandu boosi nibambukha nibatsiila khunjila yomushitsiimi.

²⁴Omwisaaliisi Zadoki yesi yaliyo nali nende Abalawi nibachinjile lisanduku lieindakano. Mana nibarenjekha lisanduku elo hasi, naye Abiatsari nakhola emisango okhuula olwa abandu boosi bali nibarulile mwitookho.

²⁵Mana omuruchi Daudi naboolela Zadoki ari, “Kalusia lisanduku litakatifu lieindakano elo mwitookho. OMWAMI Nyasaye naba nachamisibwa ninasi, yakhangalusie okhulola lisanduku liene nende eshimenyo shialio.

²⁶Ne naba nalachamisibwa ninasi ta, kho lekha yakholele aka yenya.”

²⁷Mana omuruchi natsiililila okhuboolela Zadoki ari, “Shioli omulakusi noho? Bukula omusianiwo Ahimaazi nende Yonatsani omusiani wa Abiatsari mana mukalushe mwitookho nomulembe.

²⁸Nasi ndalalindilila habwambushilo mushitsiimi okhuula olwa embulila likhuwa okhurula khwiwe.”

²⁹Kho Zadoki nende Abiatsari nibakalusia lisanduku lieindakano Yerusalemu ne nibamenyayo.

³⁰Naye Daudi natikulukha mushikulu shia Miseituni niyekhuulanga. Yachenda ebilenje ebikhaya, khandi niyefuunikha omurwe khulwa okhumanyia mbu, ali mushibeela. Abandu bali ninaye boosi bafunikha emirwe khandi nibekhuula.

³¹Olwa Daudi yahulila mbu, Ahitsofeli yali niyeyunjile halala nende abelihe ba Abusalomu, yasaaya naboola ari, “OMWAMI Nyasaye, nochama kalukhasia obuchetsiyi bwa Ahitsofeli bukwe obusilu butswa.”

³²Olwa Daudi yoola khubutenje bweshikulu eshio, aha abandu benamilanga Nyasaye, omwitsawe omusuubilwa Hushai wa Ariki yetsaho namwakaanila nafwalile tsingubo tsiamatasi, khandi niyepuuchile olufu khumurwekwe.

³³Mana naboolela Daudi ari, “Shiolabaakhwo owobukhoonyi bwosi bwosi khwisie noba notsia ninasi tawe.

³⁴Nebutswa olaba owobukhoonyi khwisie noba nokalukha mwitookho mana oboolele Abusalomu mbu, olamukhalabanila nomwoyo kwosi shinga olwa wakhalabaniilenje samwana. Mana oteeme muno okhufukula obuchetsiyi bwosi obwa Ahitsofeli ahaana.

³⁵Omwisaaliisi Zadoki nende Abiatsari boosi balabaho, obaboolele koosi aka ohulila okhurula munzu yomuruchi.

³⁶Abaana babwe abasiani Ahimaazi nende Yonatsani baliyo, obarume khwisie nende amakhuwa koosi aka onyoolayo.”

³⁷Kho Hushai omwitsa wa Daudi nakalukha mwitookho lia Yerusalemu olwa Abusalomu yali niyenjilangamwo.