Read wanga 2 SAMWELI 16 Bible Online

2 SAMWELI 16 - wanga bible

2 SAMWELI 16

¹Olwa Daudi yali niyakhasitakhwo hambeli wobutenje bweshikulu, yabukaana nende Ziba, omukhalabani wa Mefiboshetsi nali nende tsisishili tsinyinji nitsichinjile emikaate ebikhumi bibili (200), ebisakanya bietsinzabibu tsinyumu eshikhumi shilala (100), nende eshimuka shieliseelo nishiitsulemwo idivai.

²Mana omuruchi Daudi namureeba ari, “Mbushiina noreera ebindu bino biosi?” Naye Ziba namukalusia ari, “Tsisishili tsino netsia abeinzu yomuruchi okhuchendelakhwo, emikaate nende ebiamo nebia abasaatsa abo okhulia, nayo idivai neyokhubameeta amaani nibali mushitsiimi.”

³Mana omuruchi namureeba ari, “Mefiboshetsi omwitsukhulu womwamiwo Saulo ali heena?” Ziba namukalusia ari, “Atoonyile Yerusalemu shichila apaaranga mbu, Abaisiraeli balamukalusilia oburuchi bwali bwa Saulo kuukanyene.”

⁴Mana omuruchi naboolela Ziba ari, “Ebindu biali bia Mefiboshetsi biosi nebibio.” Naye Ziba nakalusia ari, “Isie endi omukhalabaniwo, ekhoya ndakhuchamisinjia iwe omwami wanje buli lwosi.”

⁵Olwa omuruchi Daudi yoola Ebahurimu, Shimeyi omusiani wa Gera, womunzu ya Saulo yetsa okhumwakaanila, namulaamanga eshilaamo shiobubi.

⁶Mana nachaaka okhulasa Daudi nende abakhalabanibe namachina. Nebutswa abalindi ba Daudi bali nibamubotokhaane tsimbeka tsiosi.

⁷Shimeyi yamulaama eshilaamo shiobubi naboola ari, “Tsia iwe! Tsia iwe! Omwiri! Omundu omukhaya!

⁸Iwe wabukula oburuchi bwa Saulo, ne bulano OMWAMI Nyasaye akhuhelesinjia eshinyasio khulwa okhwira abandu abanji abeinzu ya Saulo. OMWAMI Nyasaye uhaanile oburuchi obwo khumwanawo Abusalomu, ne iwe omalile okhusasibwa, iwe omwiri!”

⁹Mana Abishai, owa nyina yalaangwa mbu, Zeruya naboolela omuruchi ari, “Omwami, mbushiina imbwa yino niyikhulaamanga eshilaamo eshiobubi? Lekha enzie ekhalache omurwekwe!”

¹⁰Nebutswa omuruchi yakalusia ari, “Nishiina eshia isie nende inywe abaana ba Zeruyia khufunaananga? Naba niyanaamanga eshilaamo shiobubi shichila OMWAMI Nyasaye amuboolele okhulaama, ouli nobunyali bwokhureeba eshichila nakhola ario niwiina?”

¹¹Mana Daudi naboolela Abishai nende abakhalabanibe boosi ari, “Nikakhaba mbu omwana wanje mwene yenyanga okhunzira, eshichila nimuhuchisibwa nende amakhuwa komundu womuluyia lwa Benjamini uno nishiina? OMWAMI Nyasaye amubooleele okhuulaama isie eshilaamo shiobubi, kho lekha akhole ario.

¹²Haundi OMWAMI Nyasaye alalola okhutsuunwa[5] khwanje, mana yarunje netsikhabi khulwa eshilaamo shiobubi eshia enaamuungwa inyanga yino.”

¹³Kho Daudi nende abandube nibatsiililila okhuchenda khunjila eyo, naye Shimeyi natsia ninabo nalondela khunjila yomushikulu nali namukongo wa Daudi. Natsiililila okhulaama Daudi namulasa namachina nende okhuhanyakhwo olufu.

¹⁴Omuruchi nende abandube boola khumwalo kwa Yorodani nibachoonyile, mana nibahuluukha.

¹⁵Mana Abusalomu nende Abaisiraeli abali ninaye nibenjila Yerusalemu, naye Ahitsofeli yali nali ninabo.

¹⁶Olwa Hushayi omwitsa omwisiikwa wa Daudi yabukaana nende Abusalomu, yayula nomwoyo omukhongo naboola ari, “Omuruchi obeho mwoyo inziayo! Omuruchi abeho mwoyo inziayo!”

¹⁷Mana Abusalomu namureeba ari, “Buno nibwo obuheeli bwomanyinjia omwitsawo noho? Mbushiina nolatsia nende omwitsawo Daudi?”

¹⁸Naye Hushayi namukalusia ari, “Ndakhatsiile endie ninaye? Isie endi elubeka lwa oyo owaahulwa nende OMWAMI Nyasaye, nende abandu bano, nende Abaisiraeli boosi. Isie ndalatoong'a ninawe.

¹⁹Okhumeetakhwo owa ekhoyile okhukhalabanila niwiina, nalali omusiani womuruchi? Shinga olwa ndakhalabanila papawo, nolwa ndalakhukhalabanila iwe khandi.”

²⁰Mana Abusalomu nashiukhana naboolela Ahitsofeli ari, “Bulano khuchetsiyiekhwo, khukhole shiina?”

²¹Ahitsofeli namuboolela ari, “Tsia okone nende abakhasi ababiikhwa ba papawo yalekha mbu, balinde inzuye eyoburuchi. Mana abandu boosi Muisiraeli balamanya mbu, osinyishiile papawo muno. Mana abandu boosi abali halala ninawe balanyoola amaani.”

²²Kho nibakaasilia Abusalomu liheema khushilama shieinzu yoburuchi eyo, naye niyenjilamwo nende abakhasi ababiikha ba samwana Abaisiraeli boosi nibalolanga.

²³Obuchetsiyi bwosi obwa Ahitsofeli yahaananga mutsinyanga etsio, bwafuchililungwa shinga obuchetsiyi oburula khu Nyasaye. Bosi Daudi nende Abusalomu baloondanga obuchetsiyi obwo.