Read wanga 2 SAMWELI 17 Bible Online

2 SAMWELI 17 - wanga bible

2 SAMWELI 17

¹Olunyumakhwo Ahitsofeli yaboolela Abusalomu ari, “Lekha ndaahule abasaatsa ebikhumila ekhumi nababili (12,000), ne eshilo shino ndalarula okhukhaaba Daudi.

²Ndalamuseera olwa alaba nachoonyile khandi nafwile omwoyo. Alatiilwa neindenga, ne abandube boosi balelukha. Ndaleera omuruchi yenyene,

³mana ekhukalusilie abandube shinga lwomukhasi omweha akalushilanga omusaatsawe. Okhaabanga butswa okhwira omundu mulala, ne abandu bandi boosi balahonokokha.”

⁴Obwibaali obwo nibuchamisia Abusalomu nende abemilisi ba Abaisiraeli boosi.

⁵Mana Abusalomu naboola ari, “Tsie mulaanje Hushai Omuariki khuhulile aka naye aboola.”

⁶Mana olwa Hushai yetsa, Abusalomu yamuboolela ari, “Ako niko aka Ahitsofeli akhwibaaliile. Kho khulalonda obwibaalibwe noho ta? Nibulali obulayi ta, iwe okhuboolele elia khukhola.”

⁷Mana Hushai nakalusia ari, “Aka Ahitsofeli akhwibaaliile leelo luno shikali amalayi tawe.”

⁸Hushai nameeta okhuboola ari, “Omanyile mbu papawo Daudi nende abelihebe nabalwani abalulu muno, khandi mbu bali neliruma shinga itubu ikhasi niyinuulilwe abaana bayo mubulimo. Okhumeetakhwo, papawo nomulwani omuchesi muno, ne shiyeyalisinjia nabelihebe mushilo tawe.

⁹Ebise bino haundi wibisile mumbinga noho habundu undi hosi hosi. Ne mubwangu bwa Daudi aseera abandubo, omundu yesi yesi oulahulilakhwo alaboola mbu abandubo bamalile okhuhulwa.

¹⁰Mana kata abalwanibo abahalaba shinga italanyi balatiilwa noburi, shichila abandu boosi mu Isiraeli bamanya mbu, papawo Daudi nomulwani omululu, nabo abelihebe balwananga namaani.

¹¹Habula obwibaali bwanje buli mbu, okhung'asie Abaisiraeli boosi halala, okhurula khundulo welihanga okhuula khundulo undi, babe abanji shinga omuyeshe khulukuku lweinyanza, mana iwe omwene obemilile okhuseera.

¹²Nefu khulanyoola Daudi hasi aha alaba nali, mana khumuseere nashili okhumanyakhwo eshitsiilililanga tawe. Kho abulaho khubandube, kata ye mwene, oulatong'a nali omulamu.

¹³Naba niyelushila mwitookho, abandu befwe balareera emikoye mana bakhwese litookho elo likwe mwibanda hasi, mbu libuleho kata lichina elala elilatong'a nilisinjiile khushikulu eshio.”

¹⁴Mana Abusalomu nende Abaisiraeli boosi nibaboola bari, “Obwibaali bwa Hushai nobulayi okhushila obwa Ahitsofeli.” Okhuba OMWAMI Nyasaye yali niyamala khale okhwahula mbu, obwibaali obulayi bwa Ahitsofeli shibuliloondwa ta kho mbu, amasila ketse khu Abusalomu.

¹⁵Mana Hushai naboolela abesaaliisi Zadoki nende Abiatsari aka yali niyebaaliile Abusalomu nende abemilisi ba Abaisiraeli. Khandi nababoolela aka Ahitsofeli yali nabebaaliile.

¹⁶Mana Hushai nameeta okhubaboolela ari, “Mutsie bwangu bulano muboolele Daudi mbu aleshe okhwiyalisia eshilo shino habwambushilo bwomwalo mushitsiimi, habula yambushe atsie injelekha womwalo kwa Yorodani bwangu, kho mbu ye nende abandube baleshe okhutiilwa nibeerwa boosi.”

¹⁷Naye Yonatsani omusiani wa Abiatsari nende Ahimaazi omusiani wa Zadoki bali nibalindililanga hasebele ya Enirogeli, elwanyi welitookho lia Yerusalemu, shichila shibayenyanga mbu, abandu babalole nibenjila mwitookho elo tawe. Kho omukholi weshikhaana niye owetsangaho okhubaboolela akekholekhanga, ne nabo nibatsia nibaboolela omuruchi Daudi.

¹⁸Nebutswa inyanga yindi omuraaka undi yabalola ne naboolela Abusalomu. Kho nibatsia bwangu nibebisa munzu yomusaatsa undi Bahurimu. Omusaatsa oyo yali neliyabo liamaatsi ahambi neinzuye, kho nibatsia nibebisamwo.

¹⁹Omukhasi womusaatsa oyo nabukula eshifuunikho nafuunikha liyabo elo, ne nabakalakhwo imele kho mbu, omundu aleshe okhumanyakhwo eshindu shiosi tawe.

²⁰Abakhongo ba Abusalomu nibetsa munzu omwo nibareeba omukhasi oyo bari, “Ahimaazi nende Yonatsani bali heena?” Omukhasi oyo nabakalusia ari, “Bambuushe injelekha womwalo.” Abasaatsa abo nibateema okhubakhaaba, nebutswa shibanyala okhubanyoola ta, kho nibakalukha Yerusalemu.

²¹Olwa abasaatsa abo bali nibakhatsia, Ahimaazi nende Yonatsani barula mwiyabo elo ne nibatsia nibaboolela Daudi. Bamuboolela aka Ahitsofeli yali niyenyanga okhukhola khu Daudi, mana nibamuboolela bari, “Yambukha omwalo kwa Yorodani bwangu.”

²²Kho Daudi nabandube boosi nibachaaka okhwambukha omwalo kwa Yorodani, ne okhuula mumabwibwi boosi bali nibambuushe.

²³Ne olwa Ahitsofeli yalola mbu, aka yali niyebaalile shikaloondilwe ta, yaniina khusishiliye ne nakalukha mwitaalalie. Ne olwa yali namalile okhuloosia amakhuwake komunzuye, yemika omwene. Mana nayabilwa mung'ani yabeinzu yabwe.

²⁴Ebise bia Abusalomu nende Abaisiraeli bambushilakhwo omwalo kwa Yorodani, Daudi yali namalile okhuula Mahanaimu.

²⁵(Bulaano Abusalomu yali nakholile Amasa okhuba omwimilisi wabelihe mushilenje shia Yoabu. Amasa yali omusiani wa Yetseri, owali Omuisiraeli. Naye nyinamwana yali Abigaili omukhaana wa Nahashi, ne nali omukhaana wabwe Zeruyia nyinamwana Yoabu.)

²⁶Abusalomu nende abandube nibakhupa ikambi yabwe mushialo shia Giliadi.

²⁷Olwa Daudi yoola Mahanaimu yabukaanilwa nende Shobi, omusiani wa Nahashi okhurula mwitookho lia Raba elili Amoni, nende Makiri omusiani wa Amieli okhurula Lodebari, nende Barizilayi okhurula Rogelimu elili mu Giliadi,

²⁸nibamureerera ebiokhwiyalisiakhwo, tsingaraya, tsinyungu, ingaano, ishayiri, eshiokhulia, imele isiyile, amaakaanda nende amahondo.

²⁹Nibamureerera khandi obuushi, amabeele ketsikubuli, amakondi nende isiaki eyokhurula khumiruko echio. Nibareerera Daudi nende abandu ba yali ninabo mbu babilie, shichila bali nibaboolile bari, “Abandu bali inzala khandi bachoonyile khandi bali nobuloho mushitsiimi shino.”