Read wanga 2 SAMWELI 18 Bible Online

2 SAMWELI 18 - wanga bible

2 SAMWELI 18

¹Mana omuruchi Daudi nakhung'asia halala abandube boosi, ne nabakabula mumikanda chiabandu ebikhumila nende ebikhumi, nabara hasi wa abakhongo belihe abokhubemilila.

²Mana nabasumula mumikanda chitaru, mulala kwemililwa nende Yoabu, okundi nikwimililwa nende Abishai omusiani wa Zeruyia, owali omusiani wabwe Yoabu, nakwo okundi nikwimililwa nende Itai Omugiti. Mana omuruchi nababoolela ari, “Isie omwene ndalatsia ninenywe.”

³Nabo nibamukalusia bari, “Shiolatsia ninefwe tawe. Okhuba nikhuba nikhwilukha, shibalateeba eshindu shiosi khwifwe ta, kata inusu khwifwe nibeerwa shibalateeba eshindu shiosi tawe. Nebutswa iwe ohelana nabandu ebikhumila likhumi (10,000). Khulweshio nobulayi iwe otoonye hano mwitookho mana okhurumile obukhoonyi.”

⁴Naye omuruchi nabakalusia ari, “Ndalakhola akamulola mbu namalayi.” Kho nasinjila hashiliibwa, ne abelihebe nibaburaho nibatsia mumikanda chieshikhumila nende eshikhumi.

⁵Mana omuruchi nalachilisia Yoabu, Abishai nende Atai ari, “Khulwa isie, shimulasaalisilie omuraaka Abusalomu tawe.” Abelihe boosi bahulila omuruchi nalachilisia amakhuwa ako khubemilisi belihe boosi.

⁶Mana abelihe ba Daudi nibatsia ebulafu okhulwana nende Abaisiraeli mumutsuru kwa Efuraimu.

⁷Abaisiraeli nibahulwa nabandu ba Daudi. Abandu beerwa inyanga eyo bali abanji muno, bali abandu ebikhumila amakhumi kabili (20,000).

⁸Obulwani obwo nibutwana mushialo shiosi, ne inyanga eyo abandu nibafwila mumutsuru abanji okhushila abafwila ebulafu welihe liali.

⁹Mana Abusalomu niyetsukhana nabukaanile nende abandu ba Daudi. Abusalomu yali naniinile khufarasiye, ne ifarasi eyo niyinjila mumasaka komuruba omukhongo, mana liswi lia Abusalomu nilihanda mumasaka ako, nayo ifarasi eyo niyilukha tsimbilo niyitsia, kho natoong'a niyeeleelile ikulu hakari wamasaka ako nende liloba.

¹⁰Mulala khubelihe ba Daudi namulola ne natsia naboolela Yoabu ari, “Endutsi Abusalomu niyeelelile ikulu mumusaala kwomuruba.”

¹¹Naye Yoabu namukalusia ari, “Oboola mbu omuluutsi! Mbushiina nolamwira habwene nahabwene? Ndakhakhuhelesiye ebitonye bieifetsa likhumi nende omushipi kwokhwiboha.”

¹²Nebutswa omusaatsa oyo namukalusia ari, “Kata niwakhambelesia ebitonye bieifetsa eshikhumila (1,000), shienyala okhuchinguula omukhono kwanje okhukhupa omusiani womuruchi tawe. Okhuba fwesi khwahulila omuruchi nakhulachilisia nakhuboolela iwe, nende Abishai nende Atai ari, ‘Khulwa isie shimulasaalisia omuraaka Abusalomu tawe.’

¹³Kata kario nimba mbu, shienoondile lilako liomuruchi ta, mana nindiira Abusalomu, omuruchi yakhahuliile, shichila ahulilanga koosi akekholekhanga, nawe shiwakhandereere tawe.”

¹⁴Mana Yoabu naboola ari, “Shindalamalakhwo ninawe ebise tawe.” Kho nabukula amafumo kataru, ne nakafumira mushilifu shia Abusalomu, nashili omulamu, nashieleelile mumasaka komuruba okwo.

¹⁵Mana abasaatsa likhumi khubomukanda kwa Yoabu nibabotokhana Abusalomu nibamufumira nibamalilisia okhumwira.

¹⁶Mana Yoabu nakhupa olwika khulwa okhusinjisia lihe, ne abelihebe nibachelela nibalekha okhulondachila Abaisiraeli.

¹⁷Nibabukula omubili kwa Abusalomu, nibakusukuna mubwina oburambi mumutsuru, mana nibabukaho obwina obwo nende eshituuli shiamachina eshikhongo. Abaisiraeli boosi nibelukha tsimbilo, buli mundu natsia nangowe.

¹⁸Mutsinyanga tsiobulamu bwa Abusalomu, omwene yali niyeyumbashila isiio mwibanda liomuruchi, shichila shiyali niyebulakhwo omwana omusiani wokhutsiililisia olwibulolwe tawe. Kho yakulikha isiio eyo eliiralie omwene, ne okhuula olwa leelo yishilaangungwa mbu, Isiio ya Abusalomu.

¹⁹Mana Ahimaazi omusiani wa Zadoki naboolela Yoabu ari, “Lekha enzie tsimbilo emboolele omuruchi amakhuwa amalayi mbu, OMWAMI Nyasaye amuhoniye okhurula khubasukube.”

²⁰Nebutswa Yoabu namukaya namuboolela ari, “Tawe! Shiolayililakhwo omuruchi amakhuwa amalayi olwa leelo ta, fwana inyanga yindi, nebutswa olwa leelo ta, shichila omusiani womuruchi afwile.”

²¹Mana naboolela omusumbawe owokhurula Etsopia ari, “Tsia oboolele omuruchi akolutsi.” Mana omusumba oyo niyenamia obwenibwe okhuula hasi ne natsia tsimbilo.

²²Naye Ahimaazi naboolela Yoabu khandi ari, “Shiendeeba likhuwa liosi ta, lekha enzie nende Omuetsopia oyo.” Naye Yoabu namureeba ari, “Omusiani wanje, eshichila niwenya okhutsia nishiina? Shiolanyoolakhwo eshihaanwa shiosi shiosi khulwa okhuboola amakhuwa ako ta?”

²³Ahimaazi namuboolela khandi ari, “Shiendeeba likhuwa liosi liosi ta, lekha enzie.” Kho Yoabu namuboolela ari, “Nakhatsia mana.” Mana Ahimaazi natsia tsimbilo nakholomoshela khunjila yomwibanda lia Yorodani, ne bwangu nabira khumusumba Omuetsiopia oyo.

²⁴Naye Daudi yali niyekhaale mubwiyangu buli hakari weshiliibwa shiomukari nende eshielwanyi shiomwitookho. Omulindi natsia ikulu khubutenje bwelisiisi lieshiliibwa eshio, naheenga ne nalola omundu niyetsanga tsimbilo yenyene.

²⁵Mana nalaanga naboolela omuruchi, naye omuruchi namuboolela ari, “Naba nali yenyene, yetsanga namakhuwa amalayi.” Omusaatsa oyo natsiililila okhwitsa tsimbilo.

²⁶Mana omulindi oyo nalola omusaatsa undi khandi niyetsanga tsimbilo, ne nalaanga naboolela omulindi wokhusiliibwa ari, “Lola, omundu undi khandi yetsanga tsimbilo.” Omuruchi nakalusia ari, “Uno yesi khandi yetsanga namakhuwa amalayi.”

²⁷Omulindi oyo naboola ari, “Embaara owimiile yelukhanga tsimbilo shinga Ahimaazi omusiani wa Zadoki.” Omuruchi nakalusia ari, “Oyo nomusaatsa omulayi, khandi yetsanga namakhuwa amalayi.”

²⁸Mana Ahimaazi nashiesia omuruchi naboola ari, “Amakhuwa koosi namalayi.” Mana niyenamia obwenibwe okhuula hasi naboola ari, “OMWAMI Nyasayewo yetsoomibwe, oukhunyaliile okhuhula abandu abateema okhuyinga iwe omuruchi!”

²⁹Omuruchi namureeba ari, “Omuraaka Abusalomu nomulamu noho?” Ahimaazi namukalusia ari, “Omwami, lwomukhongo Yoabu yarumile indiri yibeleho ikhongo, nebutswa shiemanyile mbu yibele eyashiina tawe.”

³⁰Omuruchi namuboolela ari, “Sinjila yaho,” kho natsia nasinjila habwene tsana yaho.

³¹Omusumba Omuetsiopia oyo niyoola naboolela omuruchi ari, “Omuruchi wanje, ekhureerera amakhuwa amalayi! Inyanga yino OMWAMI Nyasaye akhunyaliile okhuhula abandu abakhufukula iwe.”

³²Omuruchi nareeba Omuetsiopia oyo ari, “Abusalomu nomulamu?” Naye Omukushi oyo naboola ari,

³³Mana omuruchi natiilwa neshibeela eshinji, natsia mushisika shili ikulu khushiliibwa niyekhuula. Ne olwa yali natsitsanga hekulu, yekhuula naboola ari, “Oh omwana wanje, omwana wanje Abusalomu! Abusalomu omwana wanje! Ndakhafwile ndakhulekha iwe mwana wanje! Abusalomu omwana wanje!”