Read wanga 2 SAMWELI 19 Bible Online

2 SAMWELI 19 - wanga bible

2 SAMWELI 19

¹Mana Yoabu naboolelwa mbu, omuruchi Daudi yali nalilanga niyekhuula khulwa okhufwa khwa Abusalomu.

²Kho obusaangaafu bwabandu ba Daudi obwokhuhula lihe inyanga eyo nibukalukhana nibukwa okhwikhuula shichila bahulila mbu, omuruchi yali niyekhuulanga khulwa okhufwa khwomwanawe.

³Mana abandu abo nibakalukha mwitookho nibaholeelile tsi shinga abalwani abatiililwe tsisoni khulwa okhwilukha mwihe.

⁴Mana omuruchi niyefuunikha mumonimwe ne niyekhuula obutinyu naboola ari, “Oh omwana wanje! Omwana wanje Abusalomu! Abusalomu omwana wanje!”

⁵Kho Yoabu natsia munzu yomuruchi namuboolela ari, “Inyanga yino ofwimbiye abandubo omurwe, abandu beene abahoniye obulamubwo, nende obwabaanabo abasiani nende bwabaanabo abakhaana, nende bwabakhasibo nende bwabakhasibo ababiikha,

⁶shichila iwe oheelanga abakhusila, ne nosila abakhuheela. Inyanga yino okhumanyiye habulafu mbu abemilisi belihe nende kata abelihe beene shibali eshindu khwiwe tawe. Endolanga mbu, Abusalomu aba nashiliho mwoyo nefu fwesi nikhufwile, inyanga yino wakhabeele nobusaangaafu.

⁷Kho bulaano bukha otsie ohotselesie abakhalabanibo. Okhuba nditsuba muliira elia OMWAMI Nyasaye mbu, noba nolakhola orio ta, abulaho omundu kata mulala oulasikala ninawe eshilo shino. Ne lino liakhaba libi okhushilakhwo amabi kandi koosi akakhwikholekhakhwo okhurula mubwanabwo okhuula bulano.”

⁸Mana omuruchi nabuukha natsia niyekhala mushilibwa shielitookho. Abandube boosi nibahulila mbu yekhaleho, kho boosi nibakhung'anilaho khuye. Mubise ebio Abaisiraeli boosi bali nibeluushe, buli mundu nakaluushe inangowe.

⁹Mushialo shia Isiraeli shiosi abandu basoolana nibaboola abeene khu beene bari, “Omuruchi Daudi yakhuhonia okhurula khubasuku befwe, yakhuhonokosia okhurula khu Abafilisiti, nebutswa bulano wiluushe okhurula khu Abusalomu.

¹⁰Ifwe khwemekha Abusalomu okhuba omuruchi wefwe, nebutswa ufwilile mwihe. Kho mbushiina omundu nalatsia okhuteema okhukalusia Daudi?”

¹¹Olwa amakhuwa ka Abaisiraeli bali nibaboolanga kooleela Daudi, yaruma abesaaliisi Zadoki nende Abiatsari okhureeba abemilisi boluyia lwa Yuda ari, “Mbushiina inywe mube abamalilikha okhukalusia omuruchi muburuchibwe? Khulwa okhubeela amakhuwa koosi aka muboolanga koolele omuruchi muburuchibwe;

¹²Inywe muli abaana befwe, abomunda ndala. Mbushiina mube abokhumalilikha okhungalusia muburuchi?”

¹³Daudi khandi naboolela abesaaliisi abo okhuboolela Amasa bari, “Iwe oli omusiani wefwe owomunda ndala. Okhurula bulano ekhwemekha okhusinjililanga abelihe mushilenje shia Yoabu. Nyasaye akhoya yakhupa ndafwa nindalakhukhola endio ta.”

¹⁴Amakhuwa ka Daudi ako kakhola aboluyia lwa Yuda boosi okhuba abaloondi ba Daudi. Mana nibaruma likhuwa khumuruchi nibaboola bari, “Kalukha iwe halala nende abelihebo boosi.”

¹⁵Mana omuruchi nachaaka okhukalukha, ne yali niyakhatsia okhuula khumwalo kwa Yorodani, ne nabukaana nende abandu boluyia lwa Yuda, abali nibetsile okhumwakanila Giligali kho mbu bamukoobe okhwambukha omwalo kwa Yorodani.

¹⁶Mubise bilala ebio Shimeyi omusiani wa Gera okhurula Bahurimu yetsa bwangu khumwalo okwo okhwakanila Daudi.

¹⁷Yali nende abandu eshikhumila shilala (1,000) okhurula muluyia lwa Benjamini. Naye Ziba omukhalabani wobomunzu ya Saulo yesi yetsa nali nende abasianibe ekhumi nabarano nende abakholi amakhumi kabili, mana niboola khumwalo kwa Yorodani omuruchi nashili.

¹⁸Mana nibambukha omwalo kwa Yorodani okwo nibakooba omuruchi halala nabandube, nende okhukholela omuruchi shiosi eshia yakhenya. Olwa omuruchi yali niyerechekhanga okhwambukha omwalo kwa Yorodani, Shimeyi omusiani wa Gera yakwa hasi imbeliwe khulwa okhumuhelesia oluyali,

¹⁹naboola ari, “Omwami nochama wibilile amabi ka ndakhukholela khunyanga yawarulila Yerusalemu. Shiolakabikha mumwoyokwo ta, kata olaketsulilakhwo tawe.

²⁰Emanyile mbu ndakhwonoonela, ne niko akachilile nimba owambeli okhwitsa hano okhurula mutsimbia tsiebukwe okhukhwakanila inyanga yino.”

²¹Ne Abishai omusiani wa Zeruyia naboola ari, “Shimeyi okhuula yeerwe, shichila yalaama eshilaamo shiobubi khu oyo owa OMWAMI Nyasaye yali niyahuule mbu abe omuruchi.”

²²Nebutswa Daudi yaboolela Abishai nende Yoabu omusiani wabwe ari, “Nishiina eshia isie ninenywe abaana ba Zeruyia khuli ninashio nashilala? Inyanga yino mwikholile abasuku banje! Toto mwene Omuisiraeli yesi anyala okhwirwa khunyanga yino? Inyanga yino muparanga mbu shiemanyile mbu endi omuruchi wabandu ba Isiraeli ta?”

²³Mana omuruchi naboolela Shimeyi ari, “Nditsuba nekhusuubisia mbu shioleerwa tawe.”

²⁴Mana Mefiboshetsi omwitsukhulu wa Saulo nakholomokha okhwakanila omuruchi. Okhurula lwomuruchi Daudi yelukha okhurula Yerusalemu okhuula olwa yakalukha, Mefiboshetsi yali nashili okhwisingakhwo, okhwibekakhwo eshilefu, kata okhwosiakhwo tsingubotsie.

²⁵Kho olwa Mefiboshetsi yetsa okhurula Yerusalemu okhwakanila omuruchi, omuruchi Daudi yamureeba ari, “Shichila shiina noletsa ninasi olwa ndarula hano?”

²⁶Naye Mefiboshetsi namukalusia ari, “OMWAMI Nyasaye, shinga lwomanyile isie omukhalabaniwo endi likara. Ndaboolela omukholi wanje mbu aniine khuipunda yanje kho mbu khuchende halala ninawe nebutswa yaloba ne niyakhoba.

²⁷Yambeyela khumuruchi, nebutswa iwe oli butswa shinga omumalaika wa Nyasaye, kho khola akakhuchamisia iwe.

²⁸Iwe omuruchi wali nokhoyile okhwira aboluyia lwa kuuka wanje boosi. Nebutswa wafuchiliile isie okhulia halala ninawe khumeesa. Kho shiekhoyile okhukhureba iwe omuruchi akandi akashila ako tawe.”

²⁹Mana omuruchi namukalusia ari, “Shiolameeta okhuboola tawe. Emalile okhukhalaka mbu iwe nende Ziba mulakabana emiandu chia Saulo.”

³⁰Naye Mefiboshetsi nakalusia ari, “Khulwa okhubeela omuruchi yakaluushe hano mumulembe, lekha Ziba abukule emiandu echio chiosi.”

³¹Ne Barizilayi owokhurula Giliadi yesi yali niyetsile okhurula Rogelimu khulwa okhukouba omuruchi okhwambukha omwalo kwa Yorodani.

³²Naye Barizilayi yali omukofu muno, yali nali owemiyika amakhumi munane. Khandi yali omuyinda muno, yahelesinjia omuruchi ebiokhulia lwomuruchi yali nashimenyile Mahanaimu.

³³Mana omuruchi namuboolela ari, “Yitsa khutsie ninawe Yerusalemu, nasi ndalakhulinda.”

³⁴Nebutswa Barizilayi yamukalusia ari, “Shieshili nemiyika eminji echiokhumenya tawe, kho eshichila enzie ninawe Yerusalemu nishiina?

³⁵Bulano buno endi wemiyika amakhumi munane, ne shibulaho eshindu eshishiisaangaasinjia mubulamu. Shinyala okhuhulilisia eshiuya shieshiokhulia kata eshiokhunywa shiosi ta, kata shinyala okhuhulila amayoosi kiabembi tawe. Isie ndalakhusitohela butswa omuruchi.

³⁶Shiekhoyile okhunyoola omurungo omukhongo shinga kuno tawe. Kho isie ndalatsiakhwo butswa ninawe hatiiti olunyuma lwokhwambukha Eyorodani.

³⁷Mana undeshe engalushe ingo enzie efwile ahambi nende eshilindwa shiabebusi banje. Bukula Chimuhamu omwana wanje omusiani uno otsie ninaye, akhukhalabanile iwe omuruchi, mana omukholele shinga olwa wenya.”

³⁸Naye omuruchi namukalusia ari, “Ndalamubukula enzie ninaye, ne ndalamukholela aka wenya. Nawe ndalakhukholela koosi aka ureeba.”

³⁹Mana Daudi nende abandube boosi nibambukha omwalo kwa Yorodani. Yafumbelela Barizilayi, ne namulaamila ikhabi, naye Barizilayi nakalukha inangowe.

⁴⁰Olwa omuruchi yali niyambuushe omwalo kwa Yorodani, nakoobilwe nende aboluyia lwa Yuda nende inusu yaboluyia lwa Isiraeli, yatsia Giligali. Ne Chimuhamu yatsia ninaye.

⁴¹Mana Abaisiraeli boosi nibatsia khumuruchi nibamureeba bari, “Omuruchi wefwe, eshiachila abasiani befwe aboluyia lwa Yuda nibapaara mbu nibo abokhoyile okhukhukooba iwe, nende abeinzuyo, nende abandubo okhwambukha omwalo kwa Yorodani nishiina?”

⁴²Aboluyia lwa Yuda nibakalusia bari, “Khwakhola khurio shichila omuruchi ni mulala khwifwe. Kho eshiakhachila kano kamusinyisie nishiina? Shikhwareeba omuruchi okhurunga khulwa eshiokhulia shiefwe ta, kata shikhwamureeba okhukhuhelesia eshindu shiosi tawe.”

⁴³Nabo Abaisiraeli nibakalusia bari; “Fwesi khandi khuli nende amanji okhuula ekhumi aka khunyala okhureeba okhurula khumuruchi, kata nali mulala khwinywe. Kho eshichilanga nimukhulechelesia nishiina? Khandi mwitsulile mbu, nifwe abali abambeli okhuboola khumakhuwa aka okhukalusia omuruchi!” Nebutswa aboluyia lwa Yuda bali nende amahababa amanji mukhureeba khwabwe okhushila Abaisiraeli.