Read wanga 2 SAMWELI 2 Bible Online

2 SAMWELI 2 - wanga bible

2 SAMWELI 2

¹Olunyuma lwako, Daudi yareeba OMWAMI Nyasaye ari, “Enyala okhutsia okhubukula elala khumatookho ka Yuda?” Naye OMWAMI Nyasaye namukalusia ari, “Tsia.” Mana Daudi namureeba ari, “Embukule elileena?” OMWAMI Nyasaye namukalusia ari, “Tsia obukule Heburoni.”

²Kho Daudi natsia Heburoni nali nabakhasibe babili: Ahinoamu, owarula Yezireli nende Abigaili ousika Nabali, owarula Karimeli.

³Nabukula khandi abasaatsa abali ninaye nende abetsinzu tsiabwe, ne nibamenya mumatookho akali nikabotokhaane Heburoni.

⁴Mana abandu ba Yuda nibetsa Heburoni, ne nibatsushilila Daudi amafura namwahula okhuba omuruchi wa Yuda. Olwa Daudi yahulila mbu, abandu ba Yebeshi litookho lia Giliadi bayabiile Saulo,

⁵yarumayo abandu noburume okhuboola bari, “OMWAMI Nyasaye amuhelesie tsikhabi, shichila mwakholeele omuruchi wenywe Saulo aka oluyali khulwa okhumuyabila.

⁶Bulano OMWAMI Nyasaye akhoya yaba oweshisa khandi omusuubilwa khwinywe. Siesi khandi ndalamukholela amalayi kario khulwa akamwakholile.

⁷Khulweshio mube abamaani khandi abalulu. Saulo omuruchi wenywe yafwile nabo abandu ba Yuda banzushililekhwo amafura nibanzahula okhuba omuruchi wabwe.”

⁸Naye Abuneri omusiani wa Neri, owali omusinjilili wabelihe lia Saulo, yali niyeluushe nende Ishiboshetsi omusiani wa Saulo nibaambushe omwalo kwa Yorodani nibatsiile Mahanaimu.

⁹Ebweneyo Abuneri yaahula Ishiboshetsi okhuba omuruchi wa Abagileadi, Abashuri, Abayezireli, Abaefuraimu, Ababenjamini, nende Abaisiraeli boosi.

¹⁰Ishiboshetsi yali nali nemiyika amakhumi kane olwa yaahulwa okhuba omuruchi wa Isiraeli, ne naruka khulwemiyika chibili. Nebutswa aboluyia lwa Yuda bali abahulili khu Daudi,

¹¹naye naba omuruchi wa Heburoni elili mu Yuda khulwemiyika musaafu nende emiesi chisasaba.

¹²Mana Abuneri omusiani wa Neri, halala nende abandu ba Ishiboshetsi omusiani wa Saulo nibarula Manaimu nibatsia mwitookho lia Gideoni.

¹³Naye Yoabu owa nyinamwana yalangwa mbu Zeruya, nende abandu bandi ba Daudi nibarula ne nibaakaana ninabo ahambi nende litiba lia Gideoni. Omukanda mulala nikwikhala khulubeka lulala lwelitiba elo, nakwo okundi nikwikhala khulubeka lundi.

¹⁴Mana Abuneri naboolela Yoabu ari, “Chenda khubukulekhwo balala khubaraaka okhurula tsimbeka tsiosi bakhupane imbeli wefwe.” Naye Yoabu nakalusia ari, “Nobulayi, lekha khukhole khurio.”

¹⁵Kho abaraaka ekhumi nababili okhurula muluyia lwa Ishiboshetsi nende olwa Benjamini nibakhupana nende abaraka ekhumi nababili abokhurula muluyia lwa Daudi.

¹⁶Mana buli mundu natiila omusuku washie omurwe, nibafumirana netsinganga mana, abaraaka amakhumi kabili nabane boosi nibakwa hasi nibafwa. Kho habundu yaho mu Gibeoni nihakulikhwa mbu, “Eshikuuri shietsinganga.”

¹⁷Mana nibakhupana obululu inyanga eyo. Nabo abandu ba Daudi nibahula Abuneri nende Abaisiraeli.

¹⁸Abasiani bataru ba Zeruya: Yoabu, Abishai nende Asaheli baliho. Naye Asaheli yali owetsimbilo shinga eshitsusu.

¹⁹Mana nachaaka okhulondakasia Abuneri tsimbilo namwichoomile.

²⁰Abuneri nakhupa lishemo inyuma ne nareeba ari, “Khane niwe Asaheli?” Naye Asaheli nakalusia ari, “Nisie.”

²¹Abuneri namuboolela ari, “Lekha okhunondakasia, londachila mulala khubelihe abo, omutiile mana obukule ebindu biosi ebia ali ninabio.” Nebutswa Asaheli yatsiililila butswa okhumulondachila.

²²Mana khandi Abuneri namuboolela ari, “Lekha okhunondakasia! Mbushiina wenyanga mbu ekhwire? Ndakhahenga endie Yoabu omusiani wenywe mumoni?”

²³Nebutswa Asaheli yatsiililila butswa okhumulondachila. Kho Abuneri namufumira munda nende olubango njela yelifumo; olubango lwelifumo elo nilurulila khumukongo kwa Asaheli. Asaheli nakwa hasi nafwa. Buli mundu wolanga habundu aha Asaheli yali nafwilile yaho, yasinjilangaho.

²⁴Nebutswa Yoabu nende Abishai balondachila Abuneri. Olwa eliuba liali niliyelanga boola khushikulu shia Ama eshili ebukwe wa Gia khumuhanda kutsitsanga mushitsiimi shia Gibeoni.

²⁵Mana abandu boluyia lwa Benjamini nibakhung'ana halala ewa Abuneri yali, nibekhola omukanda mulala, ne nibasinjila khubutenje bweshikulu.

²⁶Mana Abuneri nalanjilisia Yoabu namuboolela ari, “Okhuula khutsiililile okhulwana obushia nobushia? Shiomanyile mbu obumalilishi bulaba obululu ta? Ifwe khuli abashienywe. Kho niliina olwa nolachilisie abandubo okhulekha okhukhulondachila ifwe?”

²⁷Naye Yoabu namukalusia ari, “Nditsuba muliira lia Nyasaye ouliho mwoyo mbu, oba nolaboolile ta, khane abandu banje bakhakhulondachiile okhuula mukamba mumabwibwi.”

²⁸Mana Yoabu nakhupa olwika ne abandube nibalekha okhulondachila Abaisiraeli, ne obulwani nibuhwela abwene yaho.

²⁹Abuneri nende abandube nibachenda eshilo eshio shiosi nibabira mwibanda lia Yorodani, nibaambukha omwalo kwa Yorodani, ne mumabwibwi niboola Mahanaimu.

³⁰Olwa Yoabu yalekha okhulondachila Abuneri, yakhung'asia halala abandube boosi, ne nanyoola mbu, okhumeeta khu Asaheli, abandu bandi ekhumi na shienda bali nibabulaho.

³¹Abandu ba Daudi bali nibeerile abandu ba Abuneri ebikhumi bitaru namakhumi kasasaba (360), muboluyia lwa Benjamini.

³²Mana Yoabu nabandube nibabukula omubili kwa Asaheli nibakuyabila mung'ani yabeinzu yabwe mu Betselehemu. Mana nibachenda eshilo eshio shiosi, ne niboola Heburoni eshialo nibushietsanga.