Read wanga 2 SAMWELI 20 Bible Online

2 SAMWELI 20 - wanga bible

2 SAMWELI 20

¹Yaliho omundu undi omukholi weinduli Giligali owalaangwa mbu, Sheba, omusiani wa Bikuri okhurula muluyia lwa Benjamini. Yakhupa olwika nalaanjilisia ari, “Leshe Daudi abe! Shikhumuloondakhwo tawe! Inywe Abaisiraeli chende khukalushe nango!”

²Kho Abaisiraeli nibalekha Daudi nibalonda khu Sheba, nebutswa aboluyia lwa Yuda batong'a nibali abahulili khu Daudi ne nibamuloondakhwo okhurula khumwalo kwa Yorodani okhuula Yerusalemu.

³Olwa Daudi yoola Yerusalemu munzuye yoburuchi, yabukula abakhasibe ababiikha ekhumi, aba yali niyalekha mbu balinde inzuye yoburuchi, nabara hasi wobulindi obutinyu. Yabahelesinjia buli eshia benyanga, nebutswa shiyakonakhwo ninabo tawe. Bamenya nibekalilwa khulwa obulamu bwabwe bwosi, nibaba butswa shinga abakhasi abalekhwa.

⁴Mana omuruchi naboolela Amasa ari, “Laanga aboluyia lwa Yuda boosi halala mana okalushe ninabo hano inyanga yiloonda mukamba.”

⁵Amasa natsia okhubalanga, nebutswa shiyakalukha khunyanga yomuruchi yali namubooleele tawe.

⁶Kho omuruchi naboolela Abishai ari, “Sheba omusiani wa Bikuri alakhola induli ikhongo okhushila eya Abusalomu yakhola. Bukula abelihe banje omulondachile, nebutswa anyala okhunyoola amatookho ketsingoba ne nahonokokha okhurula khwifwe.”

⁷Kho abandu ba Yoabu, abalindi bomuruchi, nende abelihe bandi boosi nibarula Yerusalemu nibemiliilwe nende Abishai khulwa okhulondachila Sheba.

⁸Olwa boola khulwanda olukhongo oluli Gibeoni, Amasa yetsa okhubaakaanila. Yoabu yali nafwalile tsingubotsie tsielihe, ne naboyile khushilenjeshie olukanga olwali muluula lwalwo. Ne olwa yachenda nasita imbeli, olukanga olwo lwarula muluula lwalwo ne nilulakakha hasi.

⁹Mana Yoabu naboolela Amasa ari, “Omusiani wefwe, oboola orie?” Naye Yoabu natiila khutsindefu tsia Amasa nomukhonokwe omusaatsa mbu amutsunzuune.

¹⁰Naye Amasa shiyali niyerechesheele olukanga lwali mumukhono mukhasi kwa Yoabu tawe. Kho Yoabu namufumira munda, ne amalake nikayombookha hasi ne nafwa habwene nahabwene, kata Yoabu shiyamufumira khandi tawe. Mana Yoabu nende Abishai omusiani wabwe nibatsiililila okhulondachila Sheba.

¹¹Mulala khubandu ba Yoabu nasinjila khumulambo kwa Amasa ne nalaanjilisia obutinyu ari, “Omundu yesi yesi owa Yoabu nende Daudi, aloonde khu Yoabu.”

¹²Omubili kwa Amasa nikutong'a nikuyembile mumatsayi hakari womuhanda. Omusaatsa wa Yoabu oyo nalola mbu, buli mundu niyolanga khukwo yasinjilanga. Kho natsia nakukhwesa okhurula khumuhanda nakuyila mubulimo ne nakufuunikhakhwo ingubo.

¹³Olunyuma lwokhurusia omubili okwo khumuhanda, abandu boosi balonda khu Yoabu nibalondachila Sheba.

¹⁴Sheba yaburira mutsingongo tsiabetsimbia tsia Isiraeli tsiosi ne niyoola khwitookho lia Abeli, elia Betsi-maka. Mana abeshiliibwa shia Bikiri boosi nibakhung'ana halala nibamulondakhwo okhuula mwitookho elo.

¹⁵Abandu ba Yoabu nibahulila mbu, Sheba ali mwitookho omwo, kho nibatsia nibalikoneshela. Nibombakha amatuuli keliloba khwisiisi lielwanyi welitookho elo, khandi nibachaaka okhuyaba hasi welisiisi elo kho mbu likwe hasi.

¹⁶Yaliho omukhasi undi omuchesi mwitookho omwo owalaanjilisia nali khwisiisi elo naboola ari, “Recheresie! Recheresie! Boolele Yoabu yetse hano, enzenya okhuboola ninaye.”

¹⁷Kho Yoabu natsia ewa yali. Omukhasi oyo namureeba ari, “Niwe Yoabu?” Naye Yoabu nakalusia ari, “Nisie.” Omukhasi oyo namuboolela ari, “Recheresia akomukhalabaniwo yenyanga okhukhuboolela.” Yoabu namukalusia ari, “Erecheresinjia!”

¹⁸Kho omukhasi oyo namuboolela ari, “Khale bwene baboolanga bari, ‘Tsia onyoole likalusio mwitookho lia Abeli,’ ne nolwa bakholanga butswa bario.

¹⁹Litookho liefwe lino ni likhongo, ne nelala khumatookho akomulembe khandi akahulilanga omuruchi mu Isiraeli. Kho eshichilanga bulano niwenya okhulisasia nishiina? Mbushiina wenyanga okhusasia obulaame bwa OMWAMI Nyasaye?”

²⁰Yoabu nakalusia ari, “Tawe! Shindalalikulula kata okhusasia litookho lienywe tawe!

²¹Elo shilili lipaaro liefwe tawe. Omundu mbu Sheba omusiani wa Bikiri, owokhurula mushialo shiebikulu shia Efuraimu yachaachiiye induli khumuruchi Daudi. Mumbelesie omundu oyo yenyene nasi ndalarula mwitookho lienywe.” Omukhasi oyo naboola ari, “Khulamufuubila omurwekwe ikulu welisiisi.”

²²Mana omukhasi oyo natsia naboolela abandu belitookho elo aka yali nakaasiye, nabo nibakhalaka omurwe kwa Sheba nibakufuubila Yoabu ikulu welisiisi. Mana Yoabu nakhupa olwika okhuboolela abandube mbu, barule mwitookho liabwe batsie, mana nibakalukha nango. Naye Yoabu nakalukha Yerusalemu khumuruchi.

²³Yoabu yasinjilila abelihe ba Isiraeli boosi. Naye Benaya omusiani wa Yehoyada nasinjilila abalindi bomuruchi Daudi.

²⁴Adoniramu yasinjilila abakholi bemilimo chiokhunichilisibwa, naye Yehoshafati omusiani wa Ahiludi yasinjilila amahandiko.

²⁵Naye Shewa yali omuhandichi womushiina. Zadoki nende Abiatsari bali abesaaliisi.

²⁶Ira owokhurula mwitaala lia Yairi yesi yali mulala khubesaaliisi ba Daudi.