Read wanga 2 SAMWELI 21 Bible Online

2 SAMWELI 21 - wanga bible

2 SAMWELI 21

¹Mutsinyanga tsia Daudi yali nali omuruchi, inzala yaliho ikhongo eyaluma abandu khulwemiyika chitaru emilamba. Kho omuruchi Daudi natsia okhureeba OMWAMI Nyasaye eliokhukhola. Naye OMWAMI Nyasaye namuboolela ari, “Saulo nende abeinzuye bali neshikha eshiokhwira. Shichila beera aboluyia lwa Gibeoni.”

²(Ne aboluyia lwa Gibeoni shibali Abaisiraeli ta, bali butswa omukanda mutiiti khuboluyia lwa Abamori, olwa Abaisiraeli bali nibetsuba okhubalinda. Nebutswa Saulo yateema okhubamulula khulwa obulumilifubwe, khulwa abandu ba Isiraeli nende aba Yuda.)

³Kho Daudi nalaanga aboluyia lwa Gibeoni nabareeba ari, “Nishiina eshienyala okhumukholela inywe? Enzenya okhumurunga amalayi khulwa amabi ka mwakholelwa kho mbu, mulaamile abandu aba OMWAMI Nyasaye tsikhabi.”

⁴Nabo nibakalusia bari, “Obusoolo bwefwe nende Saulo nende abeinzuye shibunyala okhumalwa khulwa okhurungwa ifetsa kata itsahabu tawe. Kata shikhwenyakhwo okhwira Omuisiraeli yesi yesi tawe.” Kho Daudi nabareeba ari, “Kho mwenya mbu emukholele shiina?”

⁵Nabo nibakalusia bari, “Saulo yenyanga okhukhumulula fwesi kho mbu, omundu kata mulala khwifwe aleshe okhusikalakhwo nali mwoyo Muisiraeli tawe.

⁶Khulweshio khuhelesie abasaata musaafu abomulwibulolwe, nefu khulabeera mana khubamiche habulafu imbeli wa OMWAMI Nyasaye khushikulu shia Gibea, litaala lia Saulo, omuruchi wa OMWAMI Nyasaye yaahula.” Mana omuruchi namukalusia ari, “Ndalamuhelesia abandu abo.”

⁷Nebutswa khulwa indakano yomuruchi Daudi nende Yonatsani bali nebakhola, Daudi yalekha okhwira Mefiboshetsi omusiani wa Yonatsani, omwitsukhulu wa Saulo.

⁸Nebutswa yabukula Arimoni nende Mefiboshetsi abasiani babili ba Rizipa omukhaana wa Ayi yebula nende Saulo. Khandi nabukula abasiani barano abomukhaana wa Saulo mbu, Merabu yebula nende Andireyi omusiani wa Barizilayi owokhurula Meholatsi.

⁹Mana nahaana khu Abagibeoni nibabeera, ne nibabakala emibili chiabwe khushikulu imbeli wa OMWAMI Nyasaye. Mana boosi musaafu nibafwila halala. Beerwa mutsinyanga tsiambeli tsielichesa lieishayiri.

¹⁰Mana omukhasi wa Saulo omubiikha mbu Rizipa, omukhaana wa Ayi niyekhoonyela tsingubo tsiamakunia okhwikaasilia omwene eshiokhwifimba khulwanda ewa emilambo echio chiali. Mana namenyaho okhurula khukhuchaaka khwelichesa okhuula olwa ifula yeirootso yachaaka okhukwa. Mushiteere yaloondanga amanyonyi okhurula khumilambo echio, ne mushilo yachilindanga okhurula khutsisolo nabulimo.

¹¹Olwa Daudi yahulilakhwo aka Rizipa yali nakholile,

¹²yatsia nabukula amakumba ka Saulo nende akomusianiwe Yonatsani okhurula muboluyia lwa Yabeshi mushialo shia Giliadi. (Okhuba bali nibeeba emibili echio okhurula mulwanyi lwelitookho lia Betsi Shani, ewa Abafilisiti bali nibachiachikha khunyanga ya beerirakhwo Saulo khushikulu shia Giliboa.)

¹³Daudi yabukula amakumba ka Saulo nende aka Yonatsani mana khandi nabunjelesia amakumba kabasaatsa musaafu abali nibaachiikhwe abo.

¹⁴Mana nayabila amakumba ka Saulo nende aka Yonatsani mushilindwa shia Kishi samwana Saulo, eshiali Sela mulukongo lwa Benjamini. Mana nibakhola koosi akomuruchi yali nalachilisiye. Olunyuma lwako Nyasaye yahulila amasaayo kabandu.

¹⁵Lihe lindi lialiho hakari wa Abafilisiti nende Abaisiraeli, mana Daudi nende abandube nibatsia okhuseera Abafilisiti. Olwa bali nibashilwananga, Daudi yachoonya.

¹⁶Mana okundu okukhongo kwamaani okwalangwa mbu Ishibibenobu, okwali nikuchinjile lifumo liomukasa eliobusiro buhela hambi tsikilo tsitaru neinusu, khandi okwali nikwiboyile olukanga oluyia, nikupaara mbu kunyala okhwira Daudi.

¹⁷Nebutswa Abishai omusiani wa Zeruya yetsa nahonia Daudi, naseera okundu kwamaani okwo ne nakwira. Kho abandu ba Daudi nibakhola Daudi okhwitsuba mbu, shialitsiakhwo ninabo mwihe khandi tawe. Abandu abo nibamuboolela bari, “Abandu ba Isiraeli bara obunaayi bwabwe mwiwe, kho shikhwenya okhukhukosia tawe.”

¹⁸Olunyuma lwamakhuwa ako, lihe lialiho hakari wa Abaisiraeli nende Abafilisiti nibali Gobu. Mwihe omwo nimwo omwa Sibekayi okhurula Hushatsi yeerera okundu okukhongo kwamaani kwalaangwa mbu Safu.

¹⁹Khandi lialiho lihe lindi nende Abafilisiti Gobu, mana Elihanani omusiani wa Yairi okhurula Betselehemu niyeera Goliatsi okhurula Gatsi, owali nelifumo lisiro shinga omusaala kwomulushi wetsingubo.

²⁰Khandi lihe lindi nilibaho Gatsi, ewa okundu okukhongo kwamaani kwali, okwali netsinzala tsisasaba khubuli omukhono nende tsinzala tsisasaba khubuli eshilenje. Tsiosi halala tsiali amakhumi kabili natsine. Okundu kwamaani okwo kwali okwomulwibulo lwa Rafa.

²¹Olwa okundu okwo kwaseya Abaisiraeli, Yonatsani omusiani wa Shimeha, omusiani wabwe Daudi yamala akwire.

²²Abandu bane abo boosi bali bolwibulo lwa Rafa owa Gatsi. Boosi beerwa nende Daudi nende abandube.