Read wanga 2 SAMWELI 22 Bible Online

2 SAMWELI 22 - wanga bible

2 SAMWELI 22

¹Olwa OMWAMI Nyasaye yahonia Daudi okhurula khu Saulo nende okhurula khubasukube bandi boosi, Daudi yembela OMWAMI Nyasaye olwimbo luno naboola ari,

²“OMWAMI Nyasaye niye omulindi wanje, niye olukoba lwanje. Khandi niye Omuhonia wanje.

³Nyasaye wanje niye omulindi wanje, khandi yanindanga shinga olwa eshikhumba shilindanga. Yandereranga khandi niyaninda obulayi. Niye omuhonia wanje! Yamboninjia okhurula khubandu abamayanu.

⁴Ehabilanga OMWAMI Nyasaye, naye yahonokosinjia okhurula khubasuku banje. OMWAMI Nyasaye yetsoomibwe!

⁵Olumbe lwokhufwa lwali nilwambotokhana, nako amarunda kobusasishi kanzinikha.

⁶Emikoye chiemakombe chianzikanyilakhwo, nachio emireko chiolumbe nichindiila.

⁷Ndahabila OMWAMI Nyasaye mumatinyu kanje, ndahabila OMWAMI Nyasaye wanje mbu yambabine. Naye nali mu Ihekaluye yahulila omwoyo kwanje.

⁸Mana eshialo nishirenga khandi nishitechela, tsinyanzo tsiebikulu nitsitechela, shichila Nyasaye yali nasinyiishe.

⁹Omwosi kwatuumuukha okhurula mumooluke, ne omulilo kwolumemu nende amanda komulilo nibirula mumunwakwe.

¹⁰Yekula likulu ne niyekha hasi, ne lileesi limali liali hasi wamakuluke.

¹¹Yapulushila khumukongo kweshilonje shietsimbaha, yalolekha niyekhaale khutsimbaha tsiomuyeka.

¹²Yaraho eshiilima okhumufuunikha, nako amaleesi amakhongo aketsuulemwo amaatsi kamubotokhana.

¹³Amanda komulilo kamwesukha okhurula mutsimbenu etsiamwesukha imbeliwe.

¹⁴Mana OMWAMI Nyasaye nakukuma okhurula mwikulu, nakwo omwoyo kwa Nyasaye Omukhongo Muno nikuhulilikha.

¹⁵Yalasa ebisele biobuyingobwe ne nasalaasia abasukube. Yabataafia netsimbenu etsimwesukhanga.

¹⁶Mana olwalo lweinyanza nilulolekha, natsio tsinyanzo tsieshialo nitsitechesibwa, olwa OMWAMI Nyasaye yakondeshela abasukube nabakukumila muburuma.

¹⁷OMWAMI Nyasaye yanyiila omukhonokwe okhurula hekulu niyandiila, ne niyakhwesa niyarusia mulusiba lwamaatsi.

¹⁸Yahonokosia okhurula mubasuku banje bamaani, khandi okhurula mubandu abaasila.

¹⁹Olwa ndali nendi mumatinyu, baseera nebutswa OMWAMI Nyasaye yaniinda.

²⁰Yakhoonya okhurula mumatinyu, ne niyahonia, shichila yachamisibwa ninasi.

²¹OMWAMI Nyasaye yaarunga amalayi, shichila endi omulunjishi. Yambelesinjia tsikhabi, shichila embula eshikha.

²²Ndalinda amalakoke koosi, ne shindarula khu Nyasaye wanje tawe.

²³Enindanga amalakoke koosi, shindaalekhakhwo okhuhulila amalakoke tawe.

²⁴Amanyile mbu embula eshikha, ndelinda mbu, endeshe okhuba neshikha.

²⁵Khulweshio OMWAMI Nyasaye yarunjile okhulondana nende obulunjishi bwanje, khandi okhulondana nende obweleleshe bwomwoyo kwanje.

²⁶Iwe OMWAMI Nyasaye, oli omwisiikwa khubali abesiikwa. Khandi oli omulayi khubali abalunjishi.

²⁷Oli omweleleshe khubali abeeleleshe, nebutswa iwe oli omululu khubamayanu.

²⁸Ohoninjia abaholo, nebutswa otuutuyinjia abechinjimisi.

²⁹Iwe OMWAMI Nyasaye unzashilinjia obulafu, norusiaho eshiilima shianje.

³⁰Umbelesinjia amaani kokhuseera abasuku banje, khandi umbelesinjia obunyali bwokhubahula.

³¹OMWAMI Nyasaye uno, tsinjilatsie netsiahabwene muno, amakhuwake nakahabwene. Ye ali shinga eshikhumba khubandu boosi abakhaabanga obulindibwe.

³²OMWAMI Nyasaye yenyene niye Nyasaye, Nyasaye yenyene niye omulindi wefwe.

³³Nyasaye uno niye obwilushilo bwanje, khandi akholanga tsinjila tsianje okhuba tsindayi.

³⁴Aralisinjia ebilenje bianje shinga eshitsusu, yambelesinjia omulembe khubutenje bwebikulu.

³⁵Yanzechesinjia okhulasana lihe, kho mbu enyale okhwikhoonyela obuyingo bwamaani.

³⁶Iwe OMWAMI Nyasaye unindanga niumbonia, nabwo obulindibwo bwayakholile okhuba omukhongo.

³⁷Wayahonokosiye okhurula mukhutiilwa nabasuku banje, nasi shindahulwakhwo tawe.

³⁸Ndalondachila abasuku banje nebatiila, ne shindakalukhakhwo inyuma ta, okhuula olwa ndali nebamuluule.

³⁹Ndabakhupa ne shibanyala okhubuukha ta, bakwa hasi webilenje bianje nibahulilwe.

⁴⁰Wambelesia amaani kokhukhupana mwihe, khandi niunyalila okhuhula abasuku banje.

⁴¹Wakhola abasuku banje okhunzilukha, nasi nemulula boosi abaasila.

⁴²Bahaba nibakhaaba oubakhoonya, nebutswa oubahonia shiyaliho tawe. Bahabila OMWAMI Nyasaye, nebutswa shiyabahulila tawe.

⁴³Ndabatubula shinga olufu, mana nebaseenakhwo shinga ouseena amatoyi kokhunjila.

⁴⁴Iwe wambonia okhurula mubandu beinduli, mana niukhola okhuba omuruchi okhuruka amahanga. Abandu ba ndalaali nindamanya ta, bulano baakhalabanilanga.

⁴⁵Abarende bambelesinjia oluyali, ne olwa ehaananga amalachilisio kanje, bakahulilanga.

⁴⁶Emioyo chiabwe chiafwa ne nibarula mutsingoba tsiabwe nibatechela.

⁴⁷OMWAMI Nyasaye aliho mwoyo! Ouli olwanda lwanje yetsoomibwe, khandi Nyasaye wanje aheebwe oluyali, olwanda lwobuhonia bwanje.

⁴⁸Yakholanga okhuhula abasuku banje, mana ara amahanga hasi woburuchi bwanje.

⁴⁹Yahonokosinjia okhurula mubasuku banje. Iwe OMWAMI Nyasaye unyalilanga okhuhula abasuku banje, niumbonia okhurula khubandu beinduli.

⁵⁰“Khulweshio ekhwitsoominjia iwe OMWAMI Nyasaye mumahanga koosi, ekhwimbilanga tsinyimbo tsiokhukhwitsoomia.

⁵¹Nyasaye ahelesinjia omuruchiwe obuhuli obukhongo. Alolesinjia obuheeli oburalilu khumundu wa yaahula. Khu Daudi nende abolwibulolwe ebisoni nebisoni.”