Read wanga 2 SAMWELI 23 Bible Online

2 SAMWELI 23 - wanga bible

2 SAMWELI 23

¹Daudi omusiani wa Yese niye wa Nyasaye yakhola okhuba omundu woluyali. Niye owa Nyasaye wa Yakobo yaahula okhuba omuruchi khandi niye owali omurereesi wetsinyimbo tsindayi khulwa Abaisiraeli. Kano niko akali amakhuwa ka Daudi akokhumalilisia:

²“Roho wa OMWAMI Nyasaye aboolelanga mwisie, amakhuwake kali khululimi lwanje.

³Nyasaye wa Isiraeli aboolile, omulindi wa Isiraeli yambooleele ari, ‘Omuruchi ourukanga munjila ya hanwene, ourukanga niyambelesia oluyali isie Nyasaye,

⁴ali shinga eliuba liomumabwibwi, khandi shinga eliuba likholanga obunyasi okhusebukha olunyuma lwokhukwa khweifula.’

⁵Nolwa Nyasaye alihelesia abolwibulo lwanje tsikhabi, shichila yamala okhukhola ninasi indakano yeinziayo. Indakano eyilanyala okhufunakwa ta, obusuubisie obulanyala okhukalukhasibwa tawe. Ako koosi niko aka ndikombanga, ako niko akaliba akobuhuli bwanje, ne toto Nyasaye alakakhola.

⁶Nebutswa abandu abalahulilanga Nyasaye ta, bali shinga amahwa akasukunungwa, akomundu yesi yesi alanyala okhuseenakhwo eshilenje eshikhaya tawe.

⁷Okhuula wikhoonyele eshibia noho lifumo okhukatiila. Balisambwa nibakwa likoshe.”

⁸Abalwani ba Daudi abeifuma bali, Yoshebu Bashebetsi, Omutakemoni, owali omwimilisi wa bataru abo, ye yakhupana niyekhoonyela lifumolie okhukhupana nende abandu ebikhumi munane (800), aba yeera boosi halala.

⁹Oundi weifuma muno khubataru abo yali Eliazari, omusiani wa Dodo, owokhushilibwa shia Ahohi. Inyanga yindi ye nende Daudi barula okhuseera Abafilisiti abali nibakhung'anile okhulwana Abaisiraeli. Mana abandu ba Isiraeli nibelukha.

¹⁰Nebutswa ye yaralila ne nakhupa Abafilisiti okhuula lwomukhonokwe kwachoonya ne nikuhanda khulukanga. OMWAMI Nyasaye yabanyalila okhuhula muno inyanga eyo.

¹¹Owakhataru mubeifuma bataru abo yali Shama, omusiani wa Agee okhurula Harari. Abafilisiti bali nibakhung'anile Lehi, mumukunda kwetsing'oli tsiomuboshi. Abaisiraeli nibelukha okhurula khu Abafilisiti.

¹²Shama yaralila ne nasinjila mumukunda kwetsing'oli tsiomuboshi okwo khulwokhukuterera, mana niyeera Abafilisiti. Mana OMWAMI Nyasaye nabanyalila okhuhula muno inyanga eyo.

¹³Mukhuchaka khwetsinyanga tsielichesa, abasaatsa bataru okhurula mubeifuma amakhumi kataru bakholomokha ewa Daudi yali mumbinga ya Adulamu. Ne Abafilisiti bali nibakhupile ikambi yabwe mwibanda lia Abarefahimu.

¹⁴Mubise ebio Daudi yali nali mulukoba, ne omukanda kwabelihe okwa Abafilisiti kwali nikuli Betselehemu.

¹⁵Mana obuloho nibulia Daudi, ne naboola ari, “Shiakhuha omundu yambelesiakhwo amaatsi komwiyabo elili ahambi khushiliibwa shia Betselehemu!”

¹⁶Mana abalwani beifuma bataru abo nibenjila mukambi ya Abafilisiti namaani, nibataha amaatsi okhurula mwiyabo elo ne nibareerera Daudi. Nebutswa shiyakanywa ta, habula yakatsukha hasi nahaanila OMWAMI Nyasaye.

¹⁷Daudi naboola ari, “OMWAMI Nyasaye, shienyala okhunywa amaatsi kano ta, okhuba ndalaba shinga ounywele amatsayi kabandu abareere obulamu bwabwe mumaraba kokhufwa.” Kho nalanywa amaatsi ako tawe. Ebio nibio ebiali ebikhole ebikhongo ebiabalwani abeifuma bataru abo.

¹⁸Naye Abishai omusiani wabwe Yoabu owa nyina yali Zeruyia, niye owali omwimilisi wa “Abalwani abeifuma muno amakhumi kataru abo.” Yalwana niyekhoonyela lifumolie ne niyeera abandu ebikhumi bitaru (300) mana yesi namanyikha muno shinga abeifuma bataru abo.

¹⁹Mana namanyikha muno mubeifuma amakhumi kataru abo, kho naba omwimilisi wabwe, nebutswa shiyamanyikha muno shinga bataru abo tawe.

²⁰Naye Benaya omusiani wa Yehoyada owokhurula Kabuzeli yesi khandi yali omulwani wamaani. Yakhola amakhuwa amanji amakhongo. Yeera abalwani babili bamaani ba Abamori. Khandi olundi yenjila mubwina oburambi khunyanga yomunyiri mana niyeera italanyi.

²¹Khandi yeera Omumisiri omukhongo. Omundu oyo yali nelifumo, nebutswa Benaya yamuseera butswa neindabushi. Mana niyetsumba lifumo liali mumukhono Kwa Omumisiri oyo, ne namwira nelifumo lilie omwene.

²²Ebio nibio ebiali ebikhole ebikhongo bia Benaya, owali mulala khubalwani bamaani amakhumi kataru abo.

²³Yali niyamanyikha muno mubamaani amakhumi kataru abo, nebutswa shiyali owamaani shinga abamaani bataru abo tawe. Mana Daudi namukhola okhusinjilila abalindibe.

²⁴Abali mumukanda kwabamaani amakhumi kataru bali, Asaheli omusiani wabwe Yoabu, Elihanani omusiani wa Dodo okhurula Betselehemu.

²⁵Shama Omuharodi, nende Elika Omuharodi.

²⁶Helezi Omupaliti, nende Ira omusiani wa Ikeshi okhurula Tekoa.

²⁷Abiezeri okhurula Anatsotsi, nende Mebunayi Omuhushatsi.

²⁸Zalumoni Omwahohi, nende Maharayi Omunetofatsi.

²⁹Helebu omusiani wa Bana Omunetofatsi, nende Itsayi omusiani wa Ribayi okhurula Gibea muluyia lwa Benjamini.

³⁰Benaya Omuparatsoni, nende Hidayi okhurula khumichela chia Gashi.

³¹Abialiboni Omuaribatsi, Azimawetsi Omubahurimu.

³²Eliaba omu Shaalaboni, abasiani ba Yasheni, Yonatsani,

³³Shama, Omuharari. Ahimu omusiani wa Sharari Omuharari.

³⁴Elifeleti omusiani wa Ahasibayi Omumaka, Eliamu omusiani wa Ahitsofeli Omugiloni

³⁵Hesirawi Omukarimeli, Parayi Omuaribi.

³⁶Igali omusiani wa Natsani okhurula Zoba owali omusiani wa Hagari.

³⁷Zeleki Omuamoni, Naharayi Omuberotsi, owali omuchinji webimanulwa wa Yoabu omusiani wa Zeruyia.

³⁸Ira nende Garebu Abaitsiri, nende Uria, Omuhiti.

³⁹Boosi halala bali abalwani bamaani amakhumi kataru namusafu.