Read wanga 2 SAMWELI 24 Bible Online

2 SAMWELI 24 - wanga bible

2 SAMWELI 24

¹Mana OMWAMI Nyasaye nasinyishila abandu ba Isiraeli khandi, mana naboolela Daudi okhubareerira amatinyu, “Tsia obale abandu ba Isiraeli nende aba Yuda.”

²Kho Daudi nalachilisia Yoabu omusinjilili wabelihebe ari, “Tsia nende abakhongobo mutsimbia tsia Abaisiraeli tsiosi okhurula khundulo welihanga emasaba okhuula khundulo undi emulambo mana obale abandu boosi. Enzenya okhumanya obunji bwabwe.”

³Nebutswa Yoabu yakalusia omuruchi ari, “Omwami wanje omuruchi, OMWAMI Nyasaye akhoya yakhola abandu ba Isiraeli okhwinjiha akhandi eshikhumila (1,000) okhwimeeta okhushila shinga olwa bali bulano, nawe okhoya wamenya okhulola kano nikekholekha. Nebutswa omwami wanje omuruchi mbushiina wenyanga okhukhola likhuwa lino?”

⁴Nebutswa omuruchi yakhola Yoabu nende abakhongobe okhukhola shinga yali nabalachilisiye. Kho nibarula imbeliwe nibatsia nibabala abandu ba Isiraeli.

⁵Olunyuma lwokhwambukha omwalo kwa Yorodani, bakhupa ikambi yabwe emulambo welitookho lia Aroeri, elili hakari welibanda mulukongo lwa Gadi. Okhurula habwene yaho batsia emasaba okhuula Eyazeri,

⁶Batsiililila okhuula Giliadi, okhutsia Ekadeshi elili mulukongo lwa Abahiti. Mana nibatsia okhuula khuluyia lwa Dani, ne okhurula habweneyaho batsia Esidoni.

⁷Mana nibatsiililila niboola khulukoba lwelitookho lia Tiro nende khu mataala ka Abahiwi nende aka Abakanani; mana nibamalilishila Ebetsisheba elili emulambo wolukongo lwa Yuda.

⁸Kho olunyuma lwemiesi shienda netsinyanga amakhumi kabili bakalukha Yerusalemu, nibamalile okhuchenda mushialo shiosi.

⁹Mana Yoabu naboolela omuruchi obunji bwabandu abali nibanyala okhutsia okhukhupana mwihe; mu Isiraeli bali abandu ebikhumila ebikhumi munane (800,000). Ne muluyia lwa Yuda bali ebikhumila ebikhumi birano (500,000).

¹⁰Nebutswa olunyuma lwa Daudi okhubala abandu yachaaka okhunyakhana namayililisioke akomukari, mana naboolela OMWAMI Nyasaye ari, “Ndonoonile muno khulwa aka ekholile kano. Bulano OMWAMI Nyasaye, ekhusaaya orusieho obumayanu bwanje. Ekholile likhuwa liobusilu.”

¹¹Daudi nashili okhubukha omukamba kwaloondakhwo, likhuwa elia OMWAMI Nyasaye liali litsilile Gadi omulakusi khandi omurobi wa Daudi niliboola liri,

¹²“Tsia oboolele Daudi mbu kano niko aka OMWAMI Nyasaye aboola mbu, ‘Eretsanga imbeliwo amakhuwa kataru, wahulekhwo elala elia enzia okhukhukholela.’ ”

¹³Kho Gadi natsia naboolela Daudi ari, “Wahula elilena khu kano? Inzala yibeho mushialoshio khulwemiyika chitaru, noho wilushe okhurula khubasukubo nibakhulondachila khulwemiesi chitaru, noho olumbe lubeho mushialoshio khulwa tsinyanga tsitaru? Kho okapaarekhwo mana umboolele aka enzia okhuboolela OMWAMI Nyasaye ourumile.”

¹⁴Daudi namukalusia ari, “Endi mumanyakhano amakhongo; Nebutswa shinzenya okhuhebwa eshinyasio nabandu ta, habula lekha OMWAMI Nyasaye omwene akhuhelesie ifwe eshinyasio shichila ye nowetsimbabasi tsinyinji.”

¹⁵Kho OMWAMI Nyasaye naruma olumbe mu Isiraeli okhurula khunyanga eyo mumabwibwi okhuula khushise eshia omwene yahula; okhurula khundulo weshialo eshio okhuula khundulo elubeka undi abandu ebikhumila musafu (70,000) bafwa.

¹⁶Ne olwomumalaika owa OMWAMI Nyasaye yachinguula omukhonokwe mbu asasie Yerusalemu, OMWAMI Nyasaye yakalukhasia amapaaroke khulwa okhuhelesia abandu eshinyasio mana naboolela omumalaika owali nabeeranga ari, “Kahelile! Leshela habwene yaho!” Omumalaika oyo yali niyakhoola khulwanda lwokhuseielakhwo imele olwa Arauna Omuyebusi.

¹⁷Daudi yalola omumalaika owali niyeranga abandu mana naboolela OMWAMI Nyasaye ari, “Nisie owonoona khandi ouli neshikha. Ne abandu abamanani bano bakholile shiina? Nisie oukhoyeele okhuhebwa eshinyasio nende abeinzu yanje.”

¹⁸Khunyanga tsana eyo Gadi yatsia khu Daudi mana namuboolela ari, “Tikulukha otsie khulwanda lwa Arauna olwokhuseielakhwo imele mana umbashile OMWAMI Nyasaye eshimalilo shiemisango.”

¹⁹Mana Daudi natikulukha natsia shinga olwa OMWAMI Nyasaye yali namulachilisiye okhubirira mu Gadi.

²⁰Olwa Arauna yahenga ne nalola omuruchi nabandube nibetsanga ewa yali, yarula niyenamia obwenibwe okhuula hasi imbeli womuruchi,

²¹ne nareeba omuruchi ari, “Omuruchi omwami wanje yanzitsile mbushiina?” Naye Daudi namukalusia ari, “Nditsile okhukula olwandalwo olwokhusielakhwo imele kho mbu enyumbashileho OMWAMI Nyasaye eshimalilo shie misango, kho olumbe luli khubandu lurusibweho.”

²²Mana Arauna naboola ari, “Omwami lubukule okholele OMWAMI Nyasaye omusango okwa ochamakhwo. Tsiheyi tsiomusango omusambe nzietsino, nako amachoki katsio nende ebihulilo bieimele mbiebino khulwa okhuhafilia omulilo.”

²³Mana khandi Arauna namuboolela ari, “OMWAMI Nyasayewo akhoya yafuchilila omusangokwo.”

²⁴Nebutswa omuruchi yamukalusia ari, “Tawe! Ndalakhurunga khulwa ebindu bino. Shinyala okhukholela OMWAMI Nyasaye wanje omusango omusambe okwa ndalarunjile tawe.” Kho Daudi nakula olwanda lwokhusielakhwo imele olwo nende tsiheyi etsio khulwa ebitonye bieifetsa amakhumi karano.

²⁵Mana niyombashilaho OMWAMI Nyasaye eshimalilo shiemisango, ne nakholelaho emisango emisambe nende emisango chiokhureera omulembe. Kho OMWAMI Nyasaye nahulila amasaayo ka Daudi khulwa abandu, ne olumbe mu Isiraeli nilusinjisibwa.