Read wanga 2 SAMWELI 3 Bible Online

2 SAMWELI 3 - wanga bible

2 SAMWELI 3

¹Obulwani hakari wabandu ba Saulo nende aba Daudi bwatsiililila khulwa oluhoono olurambi. Mana Daudi natsiililila okhuba owamaani muno, nabo abasukube nibatsiililila okhuba abateshele muno.

²Abasiani balondakhwo basasaba bano, nibo aba Daudi yebula nali Heburoni. Owambeli yali Amoni, owa nyinamwana yali Ahinoamu okhurula Yezireli.

³Owakhabili yali Kiliabu, owa nyinamwana yali Abigaili ousika Nabali okhurula Karimeli. Owakhataru yali Abusalomu, owa nyinamwana yali Maka, omukhaana womuruchi Talamai okhurula Geshuri.

⁴Owakhane yali Adoniya, owa nyinamwana yali Hagitsi. Owakharano yali Shefatia, owa nyinamwana yali Abitali.

⁵Owakhasasaba yali Itsireamu, owa nyinamwana yali Egila. Abasiani abo boosi bebulilwa Heburoni.

⁶Olwa obulwani bwatsiililila hakari wabandu ba Daudi nende aba Saulo, Abuneri yetsa naba owamaani muno mubandu ba Saulo.

⁷Bulano Saulo yali nende omukhasi omubiikha oulangwa mbu, Rizipa, owali omukhaana wa Aya. Mana Ishiboshetsi nareeba Abuneri ari, “Mbushiina nokona nende omukhasi omubiikha wapapa wanje?”

⁸Naye Abuneri nasinyikha namakhuwa ka Ishiboshetsi, kho nareeba ari, “Opaaranga mbu, isie enyala okhukhoba Saulo? Toto bwene opaaranga mbu isie ekhalabanilanga Yuda? Okhurula khunyanga yene yambeli isie embetsanga omuhulili khu papawo Saulo, nende khubasiani babwe nende abetsabe, khandi ndamuhonokosiiye okhurula khu Daudi mbu aleshe okhumuhula inywe, ne kata kario inyanga yino unzinjililanga mbu, endi neshikha nomukhasi uno.

⁹Nyasaye akhoya yambelesia eshinyasio eshilulu nemba nendekha okhukholela Daudi aka OMWAMI Nyasaye yamusuubisia niyetsuba.

¹⁰Nyasaye yaboola mbu, shialifuchililakhwo khandi omundu undi owomunzu ya Saulo okhuba omuruchi ta, habula mbu, Daudi niye owakhabe omuruchi. Khandi yaboola mbu, Daudi yakharuche Isiraeli nende Yuda, okhurula khundulo welihanga emasaba okhuula khundulo undi emulambo.”

¹¹Ishiboshetsi yatiilwa noburi khu Abuneri mbu, kata shiyamukalusiakhwo likhuwa tawe.

¹²Mana Abuneri naruma abarume khu Daudi mutsinyanga etsio nali Heburoni naboola ari, “Outsia okhuruka eshialo shino niwiina? Khola indakano ninasi, nasi ndalakhukhoonya okhuhula Isiraeli yoosi.”

¹³Naye Daudi namukalusia ari, “Nobulayi, ndalakhola indakano ninawe, nebutswa ndalakhureeba eshindu shilala, nashio shili mbu, shiolandoleshelakhwo mumoni mwanje noshili okhundeerera Mikali omukhaana wa Saulo olwa witsa okhundola tawe.”

¹⁴Mana khandi Daudi naruma abarume khu Ishiboshetsi namuboolela ari, “Mbelesia Mikali omukhasi wanje, owandakhwa amafunga eshikhumi shilala (100) aka Abafilisiti.”

¹⁵Kho Ishiboshetsi nabukula omukhasi oyo okhurula khumusaatsawe Palatieli wa Laishi.

¹⁶Nebutswa Palatieli yatsia nomukhasiwe oyo, namuloondakhwo nalilanga okhuula khwitaala lia Bahurimu. Ne olwa Abuneri yamulola, yamuboolela ari, “Kalukha nango.” Naye nashiukhana nakalukhayo.

¹⁷Abuneri yatsia khubakhulundu ba Isiraeli nababoolela ari, “Khulwa eshise eshirambi mwikombanga mbu, Daudi abe omuruchi wenywe.

¹⁸Kho bulaano khole murio. Mwitsulile mbu, OMWAMI Nyasaye yasuubisia naboola ari, ‘Ndalekhoonyela omukhalabani wanje Daudi okhuhonokosia abandu banje ba Isiraeli okhurula mumakhono ka Abafilisiti, nende okhurula mumakhono kabasuku babwe bandi boosi.’ ”

¹⁹Khandi Abuneri naboola nabandu boluyia lwa Benjamini, ne natsia Heburoni okhuboolela Daudi kabandu boluyia lwa Benjamini nende olwa Isiraeli bali nibafuchilisaniye okhukhola.

²⁰Olwa Abuneri yetsa khu Daudi Heburoni, nali nabandu amakhumi kabili, Daudi yabakholela lisabo.

²¹Mana Abuneri naboolela Daudi ari, “Lekha bulano enzie ekhukhung'asilie Abaisiraeli boosi iwe omwami wanje omuruchi. Balakhufuchilila shinga omuruchi wabwe, ne olanyoola koosi akomwoyokwo kwikombanga khandi olaruka eshialo shiosi.” Kho Daudi naseebula Abuneri, naye natsia nomulembe.

²²Olunyumakhwo abelihe ba Daudi betsa nende Yoabu nibarula mukhuseera. Betsa nende ebindu ebinji ebia bali nibayaayile. Nebutswa Abuneri shiyali nashili Heburoni nende Daudi ta, shichila Daudi yali niyamuseebula khandi niyamusuubisia okhuba nomulembe.

²³Olwa Yoabu nende abandube boola, Yoabu yaboolelwa mbu, Abuneri omusiani wa Neri yali yetsile khumuruchi Daudi, naye Daudi namuseebuule khandi namusuubisiye okhuba nomulembe.

²⁴Kho Yoabu natsia khumuruchi namureeba ari, “Okholile makhuwa shiina kano? Abuneri yetsile khwiwe, mbushiina nomulekha natsia butswa ario?

²⁵Omanye mbu, Abuneri yetsile okhukhukaatia nende okhumanyilisia buli shindu shiokholanga nende habundu hoosi aha otsitsanga.”

²⁶Yoabu niyakharula wa Daudi yali, yalanga abarumebe ne nabaruma okhutsia okhutiila Abuneri. Abarume abo nibamutiila nibamukalusia okhurula khwiyabo lia Sira. Nebutswa Daudi shiyakamanyakhwo tawe.

²⁷Ne olwa Abuneri yakalukha Heburoni, Yoabu yamura halubeka mubwinjililo, nafwana shinga owenyanga okhuboola ninaye mumaasiliisi, ne habwene yaho namufumira munda nafwa. Kho Abuneri yeerwa shichila naye yali niyeera Asaheli omusiani wabwe Yoabu.

²⁸Olwa Daudi yahulila amakhuwa ako yaboola ari, “Isie nende aboburuchi bwanje khubula eshikha imbeli ewa OMWAMI Nyasaye obushia nobushia khulwa okhwirwa khwa Asaheli.

²⁹Eshitsaishie shikhoya shiaba butswa khu Yoabu nende abeinzuye. Mulwibulolwe buli lwosi omundu akhoya yabetsangamwo oulwala obulwale bwokhuraatsa imbeliwe noho owobuchele, noho owokhutiechela khumutunga noho oufwila mwihe noho oufwa inzala!”

³⁰Kho Yoabu nende Abishai omusiani wabwe beera Abuneri, shichila naye yali niyeera Asaheli omusiani wabwe mwihe eliali Gibeoni.

³¹Mana Daudi naboolela Yoabu nende abandu boosi abali ninaye mbu, barandule tsingubo tsiabwe, befwale tsingubo tsiamakunia mana bekhuule nibasinjiile imbeli welisanduku liomulambo kwa Abuneri. Ne mumasika ako, omuruchi Daudi omwene yachendela inyuma welisanduku elo.

³²Abuneri nayabilwa Heburoni, naye omuruchi Daudi nende abandu bandi boosi nibekhuula obutinyu nibali hang'ani yaho.

³³Daudi yekhuula Abuneri nolwimbo naboola ari, “Mbushiina Abuneri nofwa shinga omundu omuyingwa?

³⁴Amakhonoko shikaabohwa ta, kata ebilenjebio okhuliitswa tawe. Ne kata kario, wiirirwe shinga lwomundu yerungwa nabandu abamayanu.” Mana abandu boosi nibamwikhuula khandi.

³⁵Mana abandu nibahotselesia Daudi mbu aliekhwo eshiokhulia eshialo nishishili eshiteere, nebutswa Daudi yetsuba naboola ari, “Nyasaye akhoya yakhupa ndafwa, nemba nendiakhwo eshiokhulia shiosi shiosi eliuba nilishili okhuyeela.”

³⁶Abandu boosi balola aka Daudi yakhola, ne nibakasaangaalila, koosi aka omuruchi yakhola kabachamisia.

³⁷Mana khunyanga eyo abandu boosi Abaisiraeli nibamanya mbu, shikhubeele okhwenya khwomuruchi Daudi mbu, Abineri yerwe tawe.

³⁸Mana omuruchi naboolela abakhongobe belihe ari, “Inywe shimumanyile mbu, inyanga yino omwimilisi omukhongo mu Isiraeli ufwile tawe?

³⁹Kata isie nendi omuruchi owaahulwa nende Nyasaye, inyanga yino endi omuteshele. Abasiani ba Zeruyia bano nabaraasi muno khwisie. OMWAMI Nyasaye akhoya yahelesia abakhalabani bomumayanu abo eshinyasio shibakhoyeele!”