Read wanga 2 SAMWELI 4 Bible Online

2 SAMWELI 4 - wanga bible

2 SAMWELI 4

¹Olwa Ishiboshetsi omusiani wa Saulo yahulila mbu, Abuneri yali niyeeriirwe Heburoni, yatiilwa noburi khandi abandu ba Isiraeli boosi besundukha.

²Naye Ishiboshetsi yali nabasaatsa babili abali abemilisi bemikanda chiokhuseera. Mulala yalangwa mbu, Bana, naye oundi mbu, Rechabu, bali abasiani ba Rimoni Omuberotsi okhurula muluyia lwa Benjamini. (Berotsi shibasibungwa okhuba shilala khu shia Benjamini,

³shichila Ababerotsi beene eshialo eshio, bali nibelushila Gitaimu, ewa bashimenyile okhuula olwa leelo.)

⁴Omwitsukhulu undi wa Saulo yali Yonatsani, owali nomusianiwe mbu, Mefiboshetsi, owali niyalema ebilenje. Omusiani oyo yali nemiyika chirano olwa Saulo nende Yonatsani beerwa. Olwa amakhuwa kokhufwa khwabwe karula mwitookho lia Yezirili omulesiwe yamubukula niyelukha ninaye, nebutswa olwa yali nali mubwangu obwo, yamulakasia hasi ne omusiani oyo naba omulema.

⁵Bulano Rechabu nende Bana abasiani ba Rimoni batsia khunzu ya Ishiboshetsi. Mana mushiteere hakari niboolayo, naye yali nahuluukhanga.

⁶Naye omukhasi wokhulinda hamuliango yali naseesanga ingano, ne tsindoolo nitsimuhungulakhwo, kho Rechabu nende Bana nibenjila munzu omwo maasiliisi.

⁷Olwa benjila munzu omwo batsia mushisika shia Ishiboshetsi shiokhwiyalisia, ne olwa yali nashili mundoolo bamufumira nafwa. Mana nibakhalaka omurwekwe nibachenda ninakwo eshilo shiosi nibabiranga mwibanda lia Yorodani.

⁸Mana nibareerera Daudi omurwe okwo olwa yali nali Heburoni, nibamuboolela bari, “Omurwe kwa Ishiboshetsi omusiani wa Saulo ngwokuno, owali omusukuwo khandi owakhaabanga okhukhwira. Inyanga yino OMWAMI Nyasaye ukhumaliile iwe omuruchi eshikwoli khu Saulo nende abolwibulolwe.”

⁹Nebutswa Daudi yabakalusia ari, “Nditsuba muliira elia OMWAMI Nyasaye ouliho mwoyo, khandi owahonokosia okhurula mumatinyu koosi mbu,

¹⁰lwomurume yanzitsila Zikilagi niyamboolela mbu, Saulo afwile, yapaara mbu, yamboolelanga amakhuwa amalayi. Nebutswa ndamutiila ne nemwira. Okwo nikwo omurungo kwa ndamuhelesia khulwa amakhuwake amalayi.

¹¹Kho bulano olwabandu abamayanu beerile omundu omulunjishi munzuye omwene khushitalishie, ndalamukhola inywe okhurunga eshitsayishie khulwa okhumumulula okhurula khushialo!”

¹²Mana Daudi nalachilisia abelihebe mbu, beere Rechabu nende Bana. Abelihe abo nibakhalaka emikhono nende ebilenje biabwe, ne nibabiachikha khumusaala hambi nende litiba lia Heburoni. Ne nibabukula omurwe kwa Ishiboshetsi nibakuyabila mung'ani ya Abuneri Heburoni.