Read wanga 2 SAMWELI 5 Bible Online

2 SAMWELI 5 - wanga bible

2 SAMWELI 5

¹Mana abetsimbia tsia Isiraeli boosi nibetsa khu Daudi nali Heburoni nibamuboolela bari, “Ifwe khuli aba amatsayiko keene.

²Mutsinyanga tsiabira olwa Saulo yali nashili omuruchi wefwe, niwe owemililanga Abaisiraeli nibatsia mwihe, ne OMWAMI Nyasaye yakhusuubisia iwe mbu, oliimilila abandube khandi wakhabe omuruchi wabwe.”

³Kho abakhulundu ba Isiraeli boosi nibetsa khumuruchi Daudi nali Heburoni. Naye nakhola indakano ninabo, nabo nibamutsushililakhwo amafura, ne naba omuruchi wa Isiraeli.

⁴Daudi yali nali nemiyika amakhumi kataru olwa yaahulwa okhuba omuruchi, naye yaruka khulwemiyika amakhumi kane.

⁵Nali Heburoni, yaruka Yuda khulwemiyika musaafu nende emiesi chisasaba. Ne nali Yerusalemu, yaruka Isiraeli yoosi halala nende Yuda khulwemiyika amakhumi kataru nachitaru.

⁶Daudi nende abelihebe nibatsia Yerusalemu okhuseera Abayebusi. Abayebusi abo, abali beene shialo eshio bapaaranga mbu, Daudi shianyala okhubukula litookho elo tawe. Kho nibamuboolela bari, “Shionyala okhwinjila muno tawe, kata ababofu nende abalema banyala okhukhwikalila okhwinjila.”

⁷(Nebutswa Daudi yamala abukule olukoba lwabwe lwa Zayuni ne nilulangwa mbu “Litookho lia Daudi.”)

⁸Inyanga eyo Daudi yaboolela abelihebe ari, “Aliho omundu khwinywe owasila Abayebusi shinga olwa isie ndabasila? Ounyala kata okhubeera? Kho omundu oyo natikulushe okhubirira mumutaro kwamaatsi mana yeere ababofu nende abalema abandasila muno abo.” (Niko akachilanga nibaboola mbu, “Ababofu nende abalema shibanyala okhwinjihila munzu eya OMWAMI Nyasaye tawe.”)

⁹Olunyuma lwokhubukula olukoba olwo, Daudi yamenya mulwo ne nalukulikha mbu, “Litookho lia Daudi.” Mana niyombakhaho litookho okhulubotokhana, okhuchaachila Milo okhuula ebukwe.

¹⁰Naye Daudi natsiililila okhuba owamaani buli lwosi, shichila OMWAMI Nyasaye yali ninaye.

¹¹Ne Hiramu omuruchi wa Tiro naruma abarume khu Daudi nibali nende emisaala chiemisita[1], nende ababaatsi, nende abombashilanga amachina nibombashila Daudi inzu.

¹²Kho Daudi namanya mbu, OMWAMI Nyasaye yamwahula okhuba omuruchi wa Isiraeli, khandi mbu, akholanga lihangalie okhutsiililila khulwa abandube ba Isiraeli.

¹³Olunyuma lwa Daudi okhurula Heburoni natsia Yerusalemu yateeshia abakhasi abanji nende abakhasi ababiikha abanji, mana niyebula abaana abanji abakhaana nabasiani.

¹⁴Abaana ba yebula nali Yerusalemu mbabano mbu, Shamua, Shobabu, Natsani, Solomoni,

¹⁵Ibuhari, Elishua, Nefeki, Yafia,

¹⁶Elishama, Eliada, nende Elifeleti.

¹⁷Olwa Abafilisiti bahulila mbu, Daudi yaahuulwe okhuba omuruchi wa Isiraeli, barula nibakhaaba okhumutiila. Nebutswa Daudi yahulila mbu bamukhaabanga kho nakholomokha mulukoba.

¹⁸Abafilisiti betsa mwibanda lia Abarefahimu nibalibukula.

¹⁹Mana Daudi nareeba OMWAMI Nyasaye ari, “Nenzie okhuseera Abafilisiti noho? Olanyalila okhubahula noho?” Naye OMWAMI Nyasaye namukalusia ari, “Tsia obaseere, ndalakhunyalila okhubahula.”

²⁰Kho Daudi natsia Baali Perazimu, ne nahula Abafilisiti nali ebweneyo. Mana Daudi naboola ari, “OMWAMI Nyasaye yenjiile mubasuku banje shinga olwa amaatsi karabulanga nikenjila.” Kho habundu yaho nihalangwa mbu, Baali Perazimu. [2]

²¹Olwa Abafilisiti belukha, balekha ebifwanani biabwe inyuma, ne Daudi nende abelihebe nibabibukula nibatsia ninabio.

²²Mana Abafilisiti nibakalukha khandi mwibanda lia Abarefahimu nibalibukula.

²³Kho Daudi khandi nareeba OMWAMI Nyasaye, naye namukalusia ari, “Shiolabaseera noli hano ta, habula obotokhane mana otsie obaseere okhurulila emukongo ahambi nende emisaala chia Balisama.

²⁴Mana lwohulila obuyoka bwokhuchenda mubutenje bwemisaala echio nawe obaseera, shichila ndalaba nekhwimiliile imbeli okhuhula abelihe lia Abafilisiti.”

²⁵Kho Daudi nakhola shinga olwa OMWAMI Nyasaye yali namulachilisiye, ne nanyalilwa okhulondachila Abafilisiti okhurula Geba okhuula Gezeri.