Read wanga 2 SAMWELI 6 Bible Online

2 SAMWELI 6 - wanga bible

2 SAMWELI 6

¹Daudi nakhung'asia khandi abalwani abalulu Abaisiraeli, boosi bali ebikhumila amakhumi kataru (30,000).

²Mana Daudi nabemilila nibatsia Baala mu Yuda okhwendayo lisanduku lieindakano ya Nyasaye. Lisanduku elo lialikhwo eliira lia OMWAMI Nyasaye omwene mahe, owikhalanga hakari webilonje bietsimbaha ebiali khwisanduku elo.

³Balibukula okhurula munzu mwa Abinadabu khushikulu, ne nibalira khwikaari liyiakha. Uza nende Ahiyo abasiani ba Abinadabu nibo abacheesia likaari elo,

⁴ne Ahio niye owali naliimiliile imbeli.

⁵Daudi nende Abaisiraeli boosi bali nibashinanga khandi nibembanga namaani kabwe koosi khulwa okhuhelesia OMWAMI Nyasaye oluyali. Bali nibembanga nibakhupa amatungu, obukhana, tsisukuti, ebitsiliba nende ebikhuli.

⁶Ne olwa boola halwanda lwokhuhuulilakhwo imele olwali Nakoni, tsiheyi tsiesichirala ne Uza nanyiila omukhonokwe natiila khwisanduku lieindakano elo.

⁷Mana Nyasaye nasinyishila Uza muno ne namwira, shichila yatiila khwisanduku lieindakano eya OMWAMI Nyasaye. Uza yafwila habwene yaho hambi nende lisanduku lieindakano elo.

⁸Mana habundu yaho hashilangungwa mbu Perezi Uza okhuula olwa leelo.[3] Mana Daudi nasinyikha, shichila OMWAMI Nyasaye yali nahelesiye Uza eshinyasio khulwokhusinyikha.

⁹Mana Daudi naria OMWAMI Nyasaye inyanga eyo, ne naboola ari, “Nekhabukule endie lisanduku lieindakano?”

¹⁰Kho Daudi nashiukhana nayila lisanduku elo munzu mwa Obedi Edomu, omwibule welitookho lia Gatsi, kho shiyaliyila mwitookho lia Yerusalemu tawe.

¹¹Mana nilimenyayo khulwemiesi chitaru, naye OMWAMI Nyasaye nahelesia Obedi Edomu nende abeinzuye tsikhabi.

¹²Mana omuruchi Daudi nahulila ari, “OMWAMI Nyasaye yahelesiye Obedi Edomu nende abeinzuye boosi tsikhabi nende biosi ebiali ninabio khulwa lisanduku lieindakano elo.” Kho Daudi natsia nabukula lisanduku elo okhurula munzu mwa Obedi Edomu naliyila Yerusalemu nomwikhoyo omukhongo.

¹³Ne olwa abasaatsa bali nibachinjile lisanduku elo bali nibakhachenda amakulu kahela kasasaba, Daudi yabasinjisia, ne nakholela OMWAMI Nyasaye omusango kweing'ombe nende eshimoosi eshinulu.

¹⁴Ne Daudi yashina namaani koosi niyefwalile inguboye yeikitani mushishienje khulwa okhuhelesia OMWAMI Nyasaye oluyali.

¹⁵Kho Daudi nende Abaisiraeli boosi nibayila lisanduku lieindakano elia OMWAMI Nyasaye elo Yerusalemu, nibakhupanga tsingalakala nende okhwikhoya okhukhongo.

¹⁶Ne olwa lisanduku lieindakano liali nilireerungwa mwitookho, Mikali omukhaana wa Saulo yahenjelela mwitirisha, ne nalola omuruchi Daudi nashinanga narukaruka imbeli ewa OMWAMI Nyasaye, ne namuchaaya mumwoyokwe.

¹⁷Bareera lisanduku elo ne nibalirenjekha habundu walio mwiheema lia Daudi yali nasimiishe. Mana Daudi nakholelaho OMWAMI Nyasaye emisango emisambe nende echiokhureera omulembe.

¹⁸Ne olwa yali namalile okhukhola emisango echio, yalaamila abandu yaho tsikhabi muliira lia OMWAMI Nyasaye mwene mahe.

¹⁹Mana nabakabila ebiokhulia boosi. Yahelesia buli omundu mu Isiraeli, omusaatsa nomukhasi omukaate nende eshitonye eshieinyama isambe nende tsinzabibu tsinyumu. Mana abandu boosi nibarulaho nibakalukha nango wabwe.

²⁰Olunyumakhwo, olwa Daudi yakalukha nangowe okhushiesia abeinzuye, Mikali omukhaana wa Saulo yetsa okhumwakaanila naboola ari, “Iwe omuruchi wa Isiraeli wihelesiye omwene oluyali inyanga yino, wibakaale shieshiyingwa imbeli wabakholi beshikhaana babakhoongobo!”

²¹Naye Daudi namukalusia ari, “Eshinilenje okhuhelesia OMWAMI Nyasaye oluyali owanzaula mushilenje shia papawo nende abeinzuye, niyakhola omwimilisi wa abandube ba Isiraeli. Ne ndalatsiililila okhushina khulwa okhuhelesia OMWAMI Nyasaye oluyali.

²²Khandi ndalatsiililila okhwiyima oluyali kata khandi okhushilakhwo yaho. Imbeliwo enyala okhulolekha eshiyingwa, nebutswa imbeli wabakhaana abo endi owoluyali.”

²³Mikali tsana oyo shiyayebulakhwo omwana tawe.