Read wanga 2 SAMWELI 7 Bible Online

2 SAMWELI 7 - wanga bible

2 SAMWELI 7

¹Mana omuruchi Daudi namenya munzuye yoburuchi, ne OMWAMI Nyasaye namulinda okhurula khubasukube boosi.

²Mana omuruchi Daudi naboolela omulakusi Natsani ari, “Lola! Isie emenyanga munzu yomboshilwa emisaala chiemisiita, nalio lisanduku lieindakano ya Nyasaye limenyanga mwiheema.”

³Natsani namukalusia ari, “Tsia okhole koosi aka opaaranga, shichila OMWAMI Nyasaye ali ninawe.”

⁴Nebutswa eshilo shiene eshio, OMWAMI Nyasaye yaboolela Natsani ari,

⁵“Tsia oboolele Daudi omukhalabani wanje ori, isie OMWAMI Nyasaye emboola endi, ‘Shioli niwe oukhoyile okhunyumbashila inzu yemenyamwo tawe.’

⁶Okhurula khunyanga yandahonokosia Abaisiraeli okhurula Misiri okhuula olwa leelo, eshili okhumenyakhwo munzu. Habula buli habundu enjendanga nendi mwiheema.

⁷Habundu hoosi aha ndatsitsanga nendi nende Abaisiraeli, eshili okhureebakhwo omwimilisi wandaahula mbu, mbushiina nolanyumbashila inzu okhurula khumisaala chiemisiita tawe.

⁸Khulweshio boolela omukhalabani wanje Daudi mbu, isie OMWAMI Nyasaye omwene mahe emboola mbu, ndakhurusia mukhwaya amakondi, nekhukhola okhuba omuruchi wabandu banje ba Isiraeli.

⁹Embetsanga ninawe habundu hoosi aha otsia, khandi erusinjiaho abasukubo boosi imbeliwo. Ndalakhukhola iwe okhumanyikha muno shinga abandu bokhushialo abakhongo muno.

¹⁰Ndamala okhwahulila abandu banje ba Isiraeli habundu, aha bakhamenye mumulembe. Abandu abamayanu shibalibanyasiakhwo shinga olwa babanyasia olwambeli tawe.

¹¹Kata shinga olwa babanyasinjia okhurula mutsinyanga tsia ndaahulila abandu banje ba Isiraeli abayaasi tawe. Khandi ndalakhulinda okhurula khubasukubo boosi. Khandi isie OMWAMI Nyasaye ekhusuubisia mbu, ndakhakhuhelesie abetsukhulu abanji muno.

¹²Olwa tsinyangatsio tsiakhabe nitsihwele, ne nofwa, noyabilwa halala nabakuukabo, ndakhakhole mulala khubasianibo okhuba omuruchi, khandi ndakharalisie lihangalie.

¹³Ye niye oulinyumbashila inzu, nasi ndakharalisie lihangalie ebisoni nebisoni.

¹⁴Ndakhabe samwana, naye yakhabe omwana wanje. Nakhola obumayanu ndakhamuhelesie eshinyasio shinga olwa samwana omwana ahelesinjia omwanawe eshinyasio.

¹⁵Nebutswa shindakhaleshe okhumuheela, shinga olwa ndalekha okhuheela Saulo, owa ndarusiaho kho mbu iwe obe omuruchi tawe.

¹⁶Olwibulolwo lulatsiililila okhubaho obushia nobushia, nabwo oburuchibwo bularalisibwa inziayo.”

¹⁷Natsani yaboolela Daudi amakhuwa koosi shinga olwa Nyasaye yali namumanyiyie mwilolelo.

¹⁸Mana omuruchi Daudi niyenjila mwiheema litakatifu elia OMWAMI Nyasaye, niyekhala hasi ne nasaaya naboola ari, “Iwe OMWAMI Nyasaye, shiengwanile okhukholelwa akomalile okhukholela ta, kata abeinzu yanje shibakwanile tawe.

¹⁹Ne kata kario OMWAMI Nyasaye, kano kashili butswa amaleemu mumonitsio mbu, khandi osuubisiye abolwibulo lwanje aka balinyoola mutsinyanga tsitsanga. OMWAMI Nyasaye, mana nolwa okholelanga abandu noho?

²⁰Kho elindi nelilena eliandakhakhuboolela iwe OMWAMI Nyasaye? Okhuba umanyile isie omukhalabaniwo.

²¹Khulwokhwenyakhwo nende okhuchamakhwo mbu, kekholeshe kario, okholile amakhuwa amakhongo kano khulwa okhunzechesia.

²²Khulweshio niwe omukhongo muno OMWAMI Nyasaye, abulaho oundi shinga iwe, shinga olwa khwahulila namarwi kefwe okhurula khale, abulaho Nyasaye undi, nalali iwe tawe.

²³Libulaho lihanga lindi khushialo elili shinga Isiraeli, lihanga lia wanunula omwene okhurula Misiri khulwa okhubakhola abandubo. Amakhuwa amakhongo khandi kokhuhuchisia ka wabakholela kachila eliiralio liamanyikha khushialo shiosi. Walonda abamahanga nende abanyasaye babwe nabo abandubo nibenjila, abandu aba wahonia okhurula Misiri okhuba abobo.

²⁴Wamala okhuralisia abandubo ba Isiraeli okhuba abandubo beene khulwa inziayo, khandi iwe OMWAMI Nyasaye wamala okhuba Nyasaye wabwe.

²⁵“Ne khulweshio OMWAMI Nyasaye, ohesie khulwa inziayo koosi akawasuubisia khwisie nende abolwibulo lwanje, mana okhole aka waboola mbu, wakhakhole.

²⁶Eliiralio liakhabe lioluyali buli lwosi khandi abandu bakhaboolenje mbu, ‘OMWAMI Nyasaye mwene mahe niye Nyasaye wa Isiraeli.’ Khandi wakharalisie abeinzu yanje obushia nobushia.

²⁷Iwe OMWAMI Nyasaye mwene mahe, Nyasaye wa Isiraeli, isie endi neitswoni okhukhusaaya iwe, shichila ufwimbuliile isie omukhalabaniwo amakhuwa kano koosi, khandi niumboolela mbu, wakhakhole abetsukhulu banje okhuba abaruchi.

²⁸“Ne bulano OMWAMI Nyasaye, niwe Nyasaye, khandi olindanga obusuubisiebwo, ne omalile okhumbelesia isie omukhalabaniwo obusuubisie bwokhuhuchisia buno.

²⁹Ekhusaaya mbu, ohelesie abetsukhulu banje tsikhabi kho mbu, batsiililile okhunyoola amalayi inziayo. Iwe OMWAMI Nyasaye osuubisiye ako, ne tsikhabitsio etsio tsilabetsanga khubetsukhulu banje obushia nobushia.”