Read wanga 2 SAMWELI 9 Bible Online

2 SAMWELI 9 - wanga bible

2 SAMWELI 9

¹Inyanga yindi Daudi yareeba ari, “Alikhwoho owasikala munzu ya Saulo, owenyala okhukholela akeshisa khulwa Yonatsani noho?”

²Ne yaliho omukhalabani undi wa Saulo owalangwa mbu, Ziba. Bamulanga nibamuboolela mbu, atsie alole Daudi. Mana Daudi namureeba ari, “Niwe Ziba?” Naye nakalusia ari, “Omwami, nisie omukhalabaniwo.”

³Mana omuruchi namureeba ari, “Shialikhwoho omundu owasikala munzu ya Saulo owenyala okhukholela akeshisa shinga olwa ndasuubisia Nyasaye mbu, ndakhakhole ta?” Naye Ziba namukalusia ari, “Aliho omusiani wa Yonatsani mulala owasikala, naye nomulema.”

⁴Omuruchi namureeba ari, “Ali heena?” Naye Ziba nakalusia ari, “Ali mungo mwa Makiri omusiani wa Amieli mulukongo lwa Lodebari.”

⁵Kho omuruchi Daudi narumana mbu, omusiani oyo alangwe.

⁶Olwa Mefiboshetsi omusiani wa Yonatsani, khandi nali omwitsukhulu wa Saulo yetsa, yenama okhuula hasi khulwa okhuhaana oluyali khumuruchi. Mana Daudi namulanga ari, “Mefiboshetsi,” naye nakalusia ari, “Endiwo, omwami.”

⁷Daudi namuboolela ari, “Shiolaria ta, ndalakhukholela akeshisa khulwa papawo Yonatsani. Ndalakhukalusilia omukunda kwali kwa kuukawo Saulo kwosi, khandi okhumeetakhwo, olaliitsanga ninasi buli lwosi.”

⁸Mefiboshetsi niyenama hasi khandi naboola ari, “Isie endi shiina mbu, ukholele kano, isie ouli butswa shinga imbwa ifwile?”

⁹Mana omuruchi nalanga Ziba, omukhalabani wa Saulo namuboolela ari, “Embelesiye omwitsukhulu womwamiwo ebindu biosi ebiali bia Saulo nende abeinzuye.

¹⁰Ne iwe nende abaanabo nende abakhalabanibo, mulamulimilanga mumukunda okwo nimumureerera ebia muchesamwo, kho mbu anyoole eshiokhulia. Nebutswa Mefiboshetsi mwene khulalitsanga ninaye buli lwosi.” (Naye Ziba yali nabasiani ekhumi nababili.)

¹¹Mana Ziba nakalusia ari, “Omwami, ndalakhola koosi aka undachilisiye okhukhola.” Kho Mefiboshetsi yalitsanga ebiokhulia nende Daudi shinga ouli mulala khubasianibe.

¹²Naye Mefiboshetsi yali nomwana omusiani owalangwa mbu Mika. Mana abomunzu ya Ziba nibaba abakhalabani ba Mefiboshetsi.

¹³Kho Mefiboshetsi owali niyalema ebilenje biosi namenya Yerusalemu naliitsanga ebiokhulia halala nende omuruchi.