Read wanga 1 ABARUCHI 1 Bible Online

1 ABARUCHI 1 - wanga bible

1 ABARUCHI 1

¹Omuruchi Daudi yali namalile okhukofula muno, ne kata abakhalabanibe nibamufimbangakhwo omurungeti, omubilikwe shikwatundumanga tawe.

²Abakhongobe nibamuboolela bari, “Omwami woluyali, chama khukhukhaabile omukhaana amenye ninawe nakhulinda. Aleyalisinjia hambi ninawe mana akhukhola okhutunduma.”

³Nibakhabilisia mu Isiraeli mwosi nende mu Shunemu omukhaana owelikondo lilayi, nibanyoola omukhaana weliira mbu, Abishagi mana nibamureera khumuruchi.

⁴Omukhaana oyo yali owelikondo lilayi muno, mana nalinda omuruchi obulayi nebutswa, omuruchi shiyakonakhwo ninaye tawe.

⁵Mutsinyanga etsio, Adoniya omusiani wa Daudi nende Hagitsi yachaaka okhwifumia mbu niye owitsa okhuba omuruchi. Niyekasilia omwene amakaari ketsifarasi, nabandu bachendela khutsifarasi nende abandu amakhumi karano abamukooba nibamwimiliile.

⁶Naye Daudi shiyali niyamuhalabilakhwo namureeba mbu akholanga orio mbushiina tawe. Adoniya yali owelikondo lilayi muno ne niye owalonda Abusalomu mukhwibulwa.

⁷Adoniya narecheresania nende Yoabu omwana wa Zeruya nende omwisaaliisi Abiatsari, nabo nibamulondakhwo okhumukhoonya.

⁸Nebutswa omwisaaliisi Zadoki, Beneya omusiani wa Yehoyiada, omulakusi Natsani, Shimeyi, Reyi nende abalindi ba Daudi shibaloonda khu Adoniya tawe.

⁹Inyanga yindi Adoniya yakhola omusango niyeera amakondi, tsisurusi nende ebimoosi bianera halwanda lwa Zoheletsi[1] oluli hambi nende isebele ya Enirogeli. Yalanga abasiani babwe bandi nende abakhongo bomuruchi Daudi abarula Yuda okhwitsa mwisabo liomusangokwe,

¹⁰nebutswa shiyalanga omusiani wabwe Solomoni, kata omulakusi Natsani kata Beneyia noho omulindi womuruchi Daudi tawe.

¹¹Natsani natsia nareeba Batsisheba nyinamwana Solomoni ari, “Shiohuliulekhwo mbu Adoniya omwana wa Hagitsi omwene yeyahuule omuruchi? Ne omuruchi Daudi shiamanyilekhwo eshindu khuko tawe!

¹²Noba niwenya okhuhonokosia obulamubwo nende bwomusianiwo Solomoni, ekhuchetsiya mbu,

¹³otsie bwangu khumuruchi Daudi mana omureebe ori, ‘Omwami wanje, shiwayetsuba niusuubisia mbu, omusiani wanje Solomoni niye oulikalukha mushilenjeshio okhuba omuruchi? Kakhali karie mbu, Adoniya yekholile omuruchi?’ ”

¹⁴Khandi Natsani nameeta okhuboola ari, “Shinga olaba noshiboolanga nomuruchi Daudi, ndalenjilamwo nendinyisia likhuwa elo.”

¹⁵Kho Batsisheba natsia okhuboolela omuruchi nali mushikoroshie shiokhwiyalisia. Omuruchi yali niyakofula muno, naye Abishagi omukhaana okhurula Shunemu, niye owali namukhalabanilanga.

¹⁶Batsisheba niyenama imbeli womuruchi naye omuruchi namureeba ari, “Wenyanga shiina?”

¹⁷Batsisheba nakalusia ari, “Omwami, wasuubisia niwitsuba muliira elia OMWAMI Nyasaye mbu, omusiani wanje Solomoni niye oulaba omuruchi olunyumalwo?

¹⁸Nebutswa Adoniya wiyemeshe okhuba omuruchi, nawe shiomanyile tawe.

¹⁹Akholile omusango kwa tsisurusi tsinyinji, amakondi nende ebimoosi ebinulu; khandi alanjile abasianibo boosi, Abiatsari nende Yoabu omuseesia wabelihebo mwisabo elo; nebutswa shialanjilekhwo Solomoni omusianiwo tawe.

²⁰Omwami, abandu boosi ba Isiraeli bakhulindiliile iwe obaboolele mbu, niwiina owitsa okhuba omuruchi olunyumalwo.

²¹Nolaboola ta, bwangu bwene lwofwa, isie nende omusiani wanje Solomoni khuba khulakholwa shinga abakhobi.”

²²Batsisheba yali nashiboolanga, lwomulakusi Natsani yoola niyenjilamwo.

²³Omundu undi naboolela omuruchi mbu yetsile aliho, kho Natsani niyenjila womuruchi yali, ne namwinamila

²⁴mana nareeba omuruchi ari, “Omwami, waboolile mbu ‘Adoniya akalushe mushilenjeshio okhuba omuruchi?’

²⁵Inyanga yino atsiile nakhola omusango niyeera tsisurusi tsinyinji, amakondi nende ebimoosi ebianera. Alanjile abasianibo boosi, Yoabu omuseesia owa abelihebo nende omwisaaliisi Abiatsari; ne bulano buno balitsanga ninaye nibarumbula obutinyu bari, ‘Omuruchi Adoniya, Oyindile!’

²⁶Nebutswa, shiyananjilekhwo isie kata omwisaaliisi Zadoki kata Beneyia noho Solomoni tawe.

²⁷Omwami, niwe owalaka kano koosi, ne nalaboolelakhwo kata abakhongobo mbu niwiina oulikalukha mushilenjeshio okhuba omuruchi ta?”

²⁸Omuruchi Daudi naboola ari, “Langa Batsisheba yetse muno.” Mana Batsisheba niyetsa nasinjila imbeliwe.

²⁹Ne naboolela Batsisheba ari, “Ekhusuubisia muliira elia OMWAMI Nyasaye, owahonokosiye okhurula mumatinyu kanje koosi,

³⁰mbu inyanga yino ndaloosia obusuubisie bwa ndakhusuubisia muliira elia OMWAMI Nyasaye wa Isiraeli mbu omusianiwo Solomoni niye owakhabe omuruchi olunyuma lwanje.”

³¹Batsisheba niyenama hasi ne naboola ari, “Omwami wanje omuruchi akhoya yayindila inziayo!”

³²Mana omuruchi Daudi narumana mbu, balanje omwisaaliisi Zadoki, omulakusi Natsani nende Beneyia omusiani wa Yehoyada. Olwa betsa nibenjilamwo,

³³omuruchi yababoolela ari, “Bukule abakhongo banje, omusiani wanje Solomoni nali khupuri yanje yeene, mana mumukoobe nimukholomokha khusebele ya Gihoni,

³⁴ewa omwisaaliisi Zadoki nende omulakusi Natsani balamutsushililakhwo amafura nibamwahula okhuba omuruchi wa Isiraeli. Ne mukhupe olwika obutinyu nimwayula obutinyu nimuboola muri, ‘Omuruchi Solomoni, oyindile!’

³⁵Mana muchelele ninaye hano, aha yetsa okhwikhala khushifumbi shianje shioburuchi. Alaba omuruchi olunyuma lwanje, okhuba niye owa ndaahula okhuba omuruchi wa Isiraeli nende Yuda.”

³⁶Benayia omusiani wa Yehoyiada nakalusia omuruchi ari, “Kabe kario! OMWAMI Nyasaye, ouli Nyasaye womwami wanje, akhole kabe shinga omuruchi aboolile.

³⁷OMWAMI Nyasaye buli lwosi yakhulindilenje, ne esaba mbu bulano alinde Solomoni. OMWAMI Nyasaye akhoya yalinda Solomoni, oburuchibwe bwaba obwamaani okhushilakhwo kata obubwo.”

³⁸Kho omwisaaliisi Zadoki, omulakusi Natsani, Beneyia omusiani wa Yehoyiada, nende abalindi ba Daudi babili Kheretsi nende Peletsi, nibakholomokha nibekhasia Solomoni khupuri yomuruchi, ne nibamukooba okhutsia Gihoni.

³⁹Omwisaaliisi Zadoki nabukula olwika lulimwo amafura okhurula mwiheema litakatifu mana natsushilila Solomoni namwahula. Mana nibakhupa olwika obutinyu, ne abandu boosi nibayula obutinyu nibaboola bari, “Omuruchi Solomoni oyindile inziayo!”

⁴⁰Abandu boosi nibamulondakhwo nibayulanga obutinyu nibekhoya nibakhupa amalele, nibakhola oluyoka olukhongo olwakhola eshialo okhurenga.

⁴¹Olwa Adoniya nende abachenibe bali nibamalilisinjia okhulia, bahulila oluyoka. Ne olwa Yoabu yahulila oluyoka lwolwika yareeba ari, “Mbushiina obuyoka nibuli mwitookho?”

⁴²Olwa yali nashiboolanga, Yonatsani omusiani womwisaaliisi Abiatsari niyolaho. Adoniya namulanga namuboolela ari, “Yinjila, omundu woluyali shinga iwe, okhuula obe noreeranga amakhuwa amalayi.”

⁴³Yonatsani namukalusia ari, “Shikali kario kata nahatuutu ta! Omwami wefwe omuruchi Daudi aloboole Solomoni okhuba omuruchi.

⁴⁴Omuruchi Daudi umurumile halala nende omwisaaliisi Zadoki, omulakusi Natsani, Beneya omusiani wa Yehoyiada, Kheretsi nende Peletsi; bamuniiniye khupuri yomuruchi,

⁴⁵ne omwisaaliisi Zadoki nende omulakusi Natsani bamutsushiliilekhwo amafura nibamwahula okhuba omuruchi nibali khusebele ya Gihoni. Barulileho nibatsia mwitookho lia Yerusalemu nibamulahanga obutinyu mana abandu boosi bakholanga olukhu olwo nibamulaha. Olwo nilwo oluyoka lwohulilanga olwo.

⁴⁶Solomoni niye bulano omuruchi.

⁴⁷Khandi abakhongo bomuruchi Daudi betsile okhukhupila omuruchi wefwe Daudi orio, nibaboola bari, ‘OMWAMI Nyasaye akhoya yakhola oluyali lwa Solomoni okhuba olukhongo okhushila olulwo khandi oburuchibwe okhuba obukhongo okhushila obubwo!’ Naye omuruchi amwinamiile niyeyalisiiye khushitalishie

⁴⁸naboola ari, ‘OMWAMI Nyasaye, Nyasaye wa Isiraeli, yetsoomibwe. Niye ounyaliile isie okhulolakhwo inyanga yino omuruchi owitsa okhukalukha mushilenje shianje.’ ”

⁴⁹Mana abacheni ba Adoniya nibatiilwa noburi muno, nibasinjila boosi, mana nibarulaho nibatsia.

⁵⁰Khandi Adoniya yesi natiilwa noburi muno khulwa Solomoni, ne niyelukha natsia khwiheema litakatifu, nalitiila khutsikona tsine tsieshimalilo shiemisango khulwa okhuteema okhwihonokosia.

⁵¹Omundu undi natsia naboolela Solomoni ari, “Adoniya ali noburi muno khwiwe, ne utiilile khutsikona tsine tsieshimalilo shiemisango. Yenyanga omusuubisie mbu, shiolamwiira tawe.”

⁵²Solomoni nakalusia ari, “Adoniya naba nali omuholo khwisie, liswi kata elala elili khumuwekwe shililatiilwakhwo ta, ne nalaba omuholo ta, aba aleerwa.”

⁵³Mana omuruchi Solomoni nalaka mbu, Adoniya alaangwe okhurula khushimalilo shiemisango. Adoniya niyetsa imbeli womuruchi, ne niyenamia obwenibwe hasi khulwa okhumuhelesia oluyali. Mana omuruchi namuboolela ari, “Tsia ingowo.”