Read wanga 1 ABARUCHI 10 Bible Online

1 ABARUCHI 10 - wanga bible

1 ABARUCHI 10

¹Omuruchi mukhasi wa Sheba yahulila ifuma ya Solomoni, ne natsia Yerusalemu okhumuteema khulwa okhumureeba amareebo amatinyu.

²Yetsa Yerusalemu nali nomukanda omukhongo kwabandube, nende tsingamia nitsichinjile amafura keshing'ari, namachina kobukusi obukhongo nende itsahabu inyinji. Olwa yabukaana nende Solomoni, yareeba Solomoni amareebo koosi aka yali ninako mumwoyokwe.

³Naye Solomoni nakalusia amareebo ako koosi. Liabulaho kata elala eliali litinyu noho eliamukhaya okhwinoosia tawe.

⁴Omuruchi wa Sheba oyo, namanya obuchesi bwa Solomoni khandi nalola inzu yomuruchi ya Solomoni yali niyeyumbashila.

⁵Nalola ebiokhulia ebiareerwa khumesa, tsinzu tsiabakhongobe, obuloosie obulayi bwabakhongobe nende ebifwalo biabwe bioluyali biabefwalanga, abakhalabani abamuutendanga ebise biamasabo nende emisango chia yahaananga mu Ihekalu. Amakhuwa kano kamumala amaani khandi nachenya.

⁶Naboolela omuruchi Solomoni ari, “Aka ndahulila nendi mushialo shianje okhulondana khubikholebio nende obuchesibwo nakahabwene!

⁷Nebutswa shindakhasuubiile amakhuwa ako ta, okhuula olwa nditsile, nendola netsimoni tsianje omwene. Kata akandaboolelwa shikalikhwo kata inusu tawe, obuchesibwo nende obuyindabwo nebinji okhushila akandaboolelwa.

⁸Abandubo bali neikhabi! Abakhalabanibo, abasinjilanga imbeliwo buli lwosi okhuhulila akobuchesibwo bali neikhabi!

⁹OMWAMI Nyasayewo yetsoomibwe! Alolosiiye obusaangafu bwali ninabwo khwiwe khulwa okhukhukhola iwe omuruchi wa Isiraeli. Akhukholile okhuba omuruchi wabwe kho mbu olinde amalako nende obukhalachi bwahabwene, okhuba obuheelibwe khu Isiraeli nobweinziayo.”

¹⁰Mana nahelesia omuruchi Solomoni ebihaanwa ebia yali namureerere, biali ebinji okhushila itsahabu tsikilo ebikhumila bine (4,000) nende amafura keshing'ari nende amachina akobukusi. Amafura ako kali amanji okhushila akomuruchi Solomoni yali niyanyoolakhwo mubulamubwe.

¹¹Tsimeli tsiomuruchi Hiramu tsiareera itsahabu okhurula Ofiri, khandi tsiareera tsimbao tsiemisaala chiemisandali eminji nende amachina kobukusi.

¹²Omuruchi Solomoni niyekhoonyela tsimbao etsio okhumbakha tsisiilo muhekalu, Inzuye, nende okhukaasia obukhana nende litungu khulwa abembi. Tsimbao etsio tsiali tsindayi muno okhushila etsindi tsiosi etsiareerwa Muisiraeli khandi etsindi shitsialikhwo shinga etsio Muisiraeli tawe.

¹³Omuruchi Solomoni nahelesia omuruchi mukhasi wa Sheba oyo, biosi ebia yali niyekombile khandi nasabile, okhumeeta khubihaanwa bindi bia Solomoni yachama butswa okhumuhelesia nomwoyo omulekhule. Mana omuruchi wa Sheba oyo nende abalindibe nibenyokha nibakalukha mushialo shiabwe shia Sheba.

¹⁴Buli khumuyika omuruchi Solomoni yareererungwa itsahabu yihela tsikilo ebikhumila amakhumi kabili nabitaru (23,000),

¹⁵okhumeeta khubushuru bwayarungungwa nabandu abobukhala, inganga yanyoolungwa mubukhala nende ebiabaruchi ba Arabia nende abakafuna ba Isiraeli barunganga.

¹⁶Solomoni nakaasia ebikhumba ebikhongo ebikhumi bibili (200). Buli shilala eshiahomelwakhwo itsahabu hambi tsikilo musafu.

¹⁷Yakaasia khandi ebikhumba bindi ebitiiti ebikhumi bitaru (300), nabihomelakhwo khu buli shilala itsahabu hambi tsikilo tsibili. Mana omuruchi nara ebikhumba ebio biosi munzu ikhongo ya yalanga mbu, inzu eya Omutsuru kwa Lebanoni.

¹⁸Yakaasia khandi eshifumbi eshikhongo shioburuchi. Elubeka ndala yashinafunikha nameno keinzofu, ne elubeka undi, nashifunikha neitsahabu inzeleleshe.

¹⁹Eshifumbi eshio shialikhwo ebininilo bisasaba, eshitonye shiashio shiemukongo shiarebwakhwo omurwe kweshimoosi. Shialikhwo aha onyala okhuyeshiakhwo amakhono tsimbeka tsiosi.

²⁰Ebifwanani ekhumi nabibili biali nibiasinjisibwa khubuninilo bisasaba ebio. Eshifwanani shilala khubuli khundulo webininilo ebio. Ne eshifumbi shioburuchi eshio shifwana shirio, shishiali nishiakasibwakhwo muburuchi bundi bwosi bwosi tawe.

²¹Ebikombe biomuruchi Solomoni biosi biali nibiakasibwa okhurula khutsahabu, khandi ebindu biokhwikhoonyela munzu eya Mumutsuru kwa Lebanoni biosi biali nibieranywa khutsahabu inzeleleshe. Eshindu shiosi shiosi shishiakasibwakhwo okhurula khufetsa ta, shichila mutsinyanga tsiomuruchi Solomoni, ifetsa shiyabukulwa okhuba eshindu shiobukusi tawe.

²²Solomoni yali netsimeeli tsinyinji etsia Tarishishi khunyanza etsiachendelenga halala nende etsiomuruchi Hiramu. Buli olunyuma lwemiyika chitaru, tsimeeli tsia Solomoni tsiachelelanga, nitsireera itsahabu, ifetsa, ameno ketsinzofu, amashene nende tsinguche okhurula Tarishishi.

²³Omuruchi Solomoni yali omuyinda khandi omuchesi okhushila abaruchi bandi boosi.

²⁴Abandu beshialo shiosi bekombanga okhwitsa okhuhulila obuchesi bwa Nyasaye yali niyamuhelesia.

²⁵Buli khumuyika buli mundu yamureeraranga obushuru bwebindu biakasibwa khufetsa nende itsahabu, nebifwalo bieikanzu, ebimanulwa, amafura keshing'ari, tsisishili nende tsipuri.

²⁶Solomoni yakaasia amakaari kelihe eshikhumila nebikhumi bine (1,400) nende tsifarasi tsielihe ebikhumila ekhumi nabibili (12,000). Yabikha tsindala khutsio Yerusalemu natsio etsindi mumatookho kandi akahukhane.

²⁷Mutsinyanga tsioburuchibwe ifetsa yali inyinji muno Yerusalemu shinga amachina, khandi emisaala chiemisiita chiali eminji shinga emikhuyu echili mushialo shiebikulu bia Yuda.

²⁸Abakhongo bomuruchi basinjililanga obukuli bwetsisishili okhurula Musiri[3] nende Kilikia

²⁹nende amakaari karulanga Misiri. Bakusinjia tsisishili nende amakaari ako khubaruchi ba Abahiti nende ba Asiria. Babakusinjia amakaari tsifetsa ebikhumila bisasaba (600) ne buli isishili bakusinjia tsifetsa eshikhumi nende amakhumi karano (150).