Read wanga 1 ABARUCHI 11 Bible Online

1 ABARUCHI 11 - wanga bible

1 ABARUCHI 11

¹Solomoni yaheela abakhasi abanji abokhurula mubialo biamahanga kandi. Okhumeeta khumukhaana womuruchi wa Misiri, yateshia abakhasi Abahiti, nende abandi okhurula Moabu, Amoni, Edomu nende Sidoni.

²Yabateshia kata olwa OMWAMI Nyasaye yali niyalachilisia obutinyu Abaisiraeli mbu, baleshe okhuteshianiakhwo nende abandu abo; shichila bakhakhola Abaisiraeli okhwinamila abanyasaye bandi.

³Solomoni yateshia abakhasi ebikhumi musafu (700) boosi bali abakhaana babaruchi, khandi yali nende abakhasi ababikha ebikhumi bitaru (300). Bamukhola okhurula khu MWAMI Nyasaye.

⁴Ne okhuula khutsinyanga tsia yakofulilakhwo, bali nibamala okhumukhola okhwinamila abanyasaye bandi. Solomoni shiyali omwisiikwa khu OMWAMI Nyasaye, shinga Daudi, samwana tawe.

⁵Yenamila Asitarite, omunyasaye mukhasi wa Sidoni, nende Meleki omunyasaye oweshisinyo wa Amoni.

⁶Yonoonela OMWAMI Nyasaye khandi shiyali omuruchi watoto khu OMWAMI, shinga Daudi, samwana tawe.

⁷Yombakha khushikulu ebukwe wa Yerusalemu habundu ahokhwinamila Kemoshi, omunyasaye weshisinyo wa Moabu nende habundu hokhwinamila Moleki omunyasaye weshisinyo wa Amoni.

⁸Yombakha ebimalilo biemisango ebinji ebiabakhasibe bomubialo ebicheni basambilangakhwo obubane nende okhuhaanilaho emisango khubanyasaye babwe.

⁹OMWAMI Nyasaye nasinyishila Solomoni shichila, omwoyokwe kwali nukurulile khu MWAMI Nyasaye wa Isiraeli; owali namuloleshele okhandi khabili.

¹⁰Ne kata OMWAMI Nyasaye niyali niyakaania Solomoni okhwinamila abanyasaye bandi, Solomoni shiyalinda lilako lia OMWAMI Nyasaye elo tawe.

¹¹Kho OMWAMI Nyasaye namuboolela ari, “Okhuba shiolindile indakano yanje nende amalako kanje, ka ndakhulachilisia ta, ekhusuubisia mbu, ndalakhunuula oburuchibwo nehelesia mulala khubasumbabo.

¹²Nebutswa khulwa okhubeela papawo Daudi, shindalakhunuula noshiliho mwoyo tawe. Ndilinuula okhurula khumusianiwo.

¹³Nebutswa shindilibukula oburuchi bwosi okhurula khuye ta, ndilimuleshela oluyia lulala khulwa okhubeela Daudi omukhalabani wanje nende litookho lia Yerusalemu lia ndaahula.”

¹⁴Mana OMWAMI Nyasaye nakhola Hadadi Omuedomu womuluyia lwoburuchi lwa Edomu okhuba omusuku wa Solomoni.

¹⁵Olundi olwa Daudi yali nalwananga nende Abaedomu, Yoabu, omuseesia wabelihe lia Daudi, owali natsile okhuyabila abafu, yeera abasaatsa boosi mu Edomu.

¹⁶Yoabu nende Abaisiraeli boosi bamenya Edomu khulwemiesi chisasaba, okhuula olwa bali nibamalile okhwira abasaatsa boosi mu Edomu.

¹⁷Nebutswa Hadadi, owali nashili omusiani omutiiti yelukha natsia Misiri, yatsia nabakhongo bandi ba Edomu abali abakhalabani basamwana.

¹⁸Bachaaka okhutsia nibarula Midiani niboola Parani; ewa abasaatsa bandi beyunga okhutsia ninabo. Mana nibatsia Misiri, ne nibatsia khumuruchi, owamala nahelesia Hadadi omukunda, inzu nende ebiokhulia.

¹⁹Hadadi naba omwitsa omulayi womuruchi; naye omuruchi namubashila mulamunyene, omukhaana wabwe Tahipene, omukhasi womuruchi.

²⁰Omukhaana wabwe Tahipene oyo, niyebulila Hadadi omwana omusiani, nibamukulikha mbu Genubatsi, owa Tahipene yakhusilia munzu yomuruchi. Genubatsi yamenyanga halala nabaana bomuruchi wa Misiri.

²¹Olwa Hadadi yali nashimenyile Misiri yahulila mbu, Daudi yali niyafwa khandi Yoabu omuseesia owa belihe yesi yali niyafwa. Kho naboolela omuruchi wa Misiri ari, “Lekha, engalushe mushialo shianje.”

²²Omuruchi wa Misiri oyo namureeba ari, “Nishiina eshichila niwenya okhukalukha mushialoshio shiene?” Naye Hadadi namuboolela ari, “Chama butswa enzie!”

²³Nyasaye khandi nakhola Rezoni omusiani wa Eliada okhuba omusuku wa Solomoni. Rezoni yali niyelukha okhurula khumwamiwe, omuruchi Hadadezeri weshialo shia Zoba.

²⁴Yali nakhung'asiye abandu ne niyekholile omwimilisi womukanda kwabakhayi bamalako, olwa Daudi yasasia abelihe lia Zoba. Abakhayi abo batsia Damasiko wa bamenya khandi nibabukula litookho elo.

²⁵Rezoni yali omusuku wa Isiraeli oluhoono olwa Solomoni yali nashiliho mwoyo, okhumeeta khumatinyu ka Hadadi yakhola. Kho Rezoni naruka nali mu Aramu, ne yali omululu khubaisiraeli.

²⁶Omusaatsa undi owali omusuku womuruchi Solomoni yali mulala khubakhongobe mbu, Yeroboamu omusiani wa Nebati okhurula Zereda mushialo shia Efuraimu. Nyinamwana Yeroboamu yali omukhasi omulekhwa oulangwa mbu Zeruya.

²⁷Kano niko amakhuwa kelihe elio. Solomoni yombakha litookho lia Milo, ne niyekala eshibanga shielitookho lia Daudi, samwana.

²⁸Naye Yeroboamu yali owamani, ne olwa Solomoni yalola shinga olwa yakholanga emilimochie obulayi, yamwahula okhusinjilila abakholi bemilimo echio boosi abomushialo shietsimbia tsia Manase nende Efuraimu.

²⁹Inyanga yindi olwa Yeroboamu yali nachendanga khunjila narula Yerusalemu, yabukaana nali yenyene khunjila nomulakusi Ahiya.

³⁰Ahiya nafwalula inguboye imbia, eya yali niyefwalile mana nachirandulamwo ebitonye ekhumi nabibili;

³¹ne naboolela Yeroboamu ari, “Wibukulile ebitonye ekhumi shichila OMWAMI Nyasaye wa Isiraeli akhuboolela iwe ari, ‘Ndalarusia oburuchi khu Solomoni, ne ndalakhukaba tsimbia ekhumi.

³²Solomoni alatong'a noluyia lulala khulwa okhubeela omukhalabani wanje Daudi, nende khandi khulwa litookho lianje Yerusalemu, elili litookho lia ndaahule okhuba elianje omwene, okhurula mushialo shiosi eshia Isiraeli.

³³Ndalakhola endio shichila Solomoni yakhayile okhumbulila khandi yenamilanga abanyasaye bandi abacheni, nibo Asitarite omunyasaye mukhasi wa Sidoni, nende Moleki omunyasaye wa Amoni. Solomoni yakhayile okhumbulila; yakholile amabi, khandi shiyalindile amalako kanje nende amalachilisio shinga Daudi, papawe yakholanga tawe.

³⁴Nebutswa shindilarusia oburuchi bwosi khu Solomoni tawe, khandi ndalamulekha abeho omuruchi olwa aba nashiliho mwoyo. Ndalakhola endio khulwa okhubeela omukhalabani wanje Daudi, owa ndaahula khandi nalinda amalako nende amalachilisio kanje.

³⁵Ndalabukula oburuchi okhurula mubunyali bwomusianiwe, ne ndalakhuhelesia tsimbia ekhumi.

³⁶Ndalaleshela omusiani wa Solomoni oluyia lulala, kho mbu buli lwosi embetsenje nende abetsukhulu bomukhalabani wanje Daudi okhuruka Yerusalemu, litookho liandaahula okhuba habundu hokhunzinamila.

³⁷Iwe Yeroboamu, ndalakhukhola okhuba omuruchi wa Isiraeli, nawe olaruka eshialo shiosi eshia wenya.

³⁸Noba niumbulila nomwoyo kwosi, nolonda amalako kanje, ne niunjamisia, khulwa okhukhola akekhulaka shinga omukhalabani wanje Daudi yakhola, ndalabetsanga ninawe buli lwosi. Ndalakhukhola okhuba omuruchi wa Isiraeli khandi abetsukhulubo balaruka olunyumalwo, shinga olwa ndakholela Daudi.

³⁹Ndalahelesia abetsukhulu ba Daudi eshinyasio khulwa okhubeela obwonooni bwa Solomoni, nebutswa shindalabahelesia eshinyasio buli lwosi tawe.’ ”

⁴⁰Mana Solomoni nateema okhwira Yeroboamu, nebutswa Yeroboamu yelukha natsia khumuruchi Shishaki wa Misiri, mana namenyayo okhuula olwa Solomoni yafwa.

⁴¹Amakhuwa koosi aka Solomoni yakhola, emilimochie nende obuchesibwe, koosi kahandikwa mushitabu shia Akebikhole bia Solomoni.

⁴²Solomoni yali omuruchi mu Yerusalemu nali omuruchi wa Isiraeli khulwemiyika amakhumi kane.

⁴³Yafwa mana nayabilwa mwitookho lia Daudi, naye omusianiwe mbu, Yeroboamu nakalukha mushilenjeshie okhuba omuruchi.