Read wanga 1 ABARUCHI 12 Bible Online

1 ABARUCHI 12 - wanga bible

1 ABARUCHI 12

¹Rehoboamu natsia Shekemu, shichila Abaisiraeli boosi bali nibakhung'anileyo okhumwahula ye okhuba omuruchi.

²Olwa Yeroboamu omusiani wa Nebati owali niyelukha okhutsia Misiri okhurula khumuruchi Solomoni yahulilakhwo amakhuwa ako, yakalukha okhurula Misiri.

³Abandu belubeka lwemasaba lwa Isiraeli nibaruma okhulanga Yeroboamu, mana boosi nibatsia khu Rehoboamu nibamuboolela bari,

⁴“Papawo Solomoni yakhurukanga nobululu muno khandi yali niyakhurakhwo likokolo liokhukhola emilimo emisiro. Noba nokhwanguyilia likokolo elo, ne nokhola obulamu bwefwe okhuba obwangu, khulaba abasumbabo abahulili.”

⁵Rehoboamu nababoolela ari, “Mukalushe hano olunyuma lwetsinyanga tsitaru mana ndalamuhelesia likalusio.” Kho nibarulaho nibatsia.

⁶Omuruchi Rehoboamu natsia okhureeba abandu abakhulundu abalinji khale abebaali bomuruchi Solomoni. Nabareeba ari, “Nilikalusio shiina elia munzibaalila okhuhelesia abandu bano?”

⁷Nabo nibamukalusia bari, “Noba niwenya okhukhalabanila abandu bano obulayi, obakalusie likalusio lilayi khukabakhureebile ako, nabo balakhukhalabanila khandi balaba abahulili khwiwe.”

⁸Nebutswa Rehoboamu yaloba amebaalo akabakhulundu abo bali nibamuboolele, ne natsia okhureeba ababuukha abali abolubakalwe khandi abali nibamukhalabanilanga.

⁹Yabareeba ari, “Nishiina eshia munzibaalila? Khukalusie khurie abandu bano, ababoolanga mbu, ‘Wanguyie likokolo lia papawo yara khwifwe?’ ”

¹⁰Nibamukalusia bari, “Obakalusie ori, ‘Olwala lwanje olutiiti nolukhomefu muno okhushila eshishienje shiapapa wanje’ ”

¹¹Obaboolele ori, “Papa wanje yamurakhwo likokolo lisiro, nasi ndalalikhola okhuba lisiro muno. Yamunywekhanga nende olusaala, nasi ndalamukhupa neindabushi yilikhwo amahwa!”

¹²Olunyuma lwetsinyanga tsitaru, Yeroboamu nende abandu boosi bakalukha khumuruchi Rehoboamu, shinga olwa yali nababoolele.

¹³Omuruchi Rehoboamu naloba okhulonda amebaalo kabakhulundu, ne nakalusia abandu abo likalusio mubululu,

¹⁴shinga ababuukha baashie bali nibamwibaaliile. Yaboola ari, “Papa wanje yamurakhwo likokolo. Nasi ndalalimeeta okhuba lisiiro muno. Yamunywekhanga nolusaala, nasi ndalamukhupa nende indabushi yilikhwo amahwa!”

¹⁵Khwali okhwenya okhwa OMWAMI Nyasaye khulwa okhuusia aka yali niyaboolela Yeroboamu omusiani wa Nebati okhubirila mumulakusi Ahiya weshialo shia Shilo. Kano niko akachila omuruchi nakhaya okhurecheresia akabandu baboola.

¹⁶Olwa Abaisiraeli boosi balola mbu, omuruchi shianyala okhubarecheresia ta, bakalusia omuruchi nomwoyo omukhongo nibaboola bari, “Ifwe khuli nomukabo shiina mu Daudi, nende abeinzuye? Nobulaame shina obwakhuli ninabo mumusiani wa Yese? Inywe Abaisiraeli! Chende khukalushe ingo wefwe! Iwe Rehoboamu ruka abeinzuyo beene!” Mana Abaisiraeli nibakhola induli,

¹⁷nibalekha Rehoboamu okhuruka Abaisiraeli abali nibamenya mumatookho ka Yuda.

¹⁸Omuruchi Rehoboamu naruma Adoniramu owali omusinjilili wabakholi bemilimo chiokhulunyibwa, mbu atsie okhusinjilila Abaisiraeli, nabo nibamulasa namachina nafwa. Olwa kano kekholekha, Rehoboamu yanina bwangu khwikaarilie, ne niyelukha natsia Yerusalemu.

¹⁹Khulweshio, okhurula olwo abandu betsimbia tsiemasaba nibaba abakhayi khuboluyia lwomuruchi Daudi, mana bashili bario okhuula olwa leelo.

²⁰Olwa Abaisiraeli boosi bahulilakhwo mbu, Yeroboamu yali nacheleele okhurula Misiri, baruma nibamulanga mumukhung'ano mana nibamukhola omuruchi wa Isiraeli. Aboluyia lwa Yuda nibo abatong'a abahulili khubolwibulo lwa Daudi.

²¹Olwa Rehoboamu yoola mu Yerusalemu, yakhung'asia halala abelihe abalulu ebikhumila eshikhumi namakhumi munane (180,000) abomuluyia lwa Yuda nende Benjamini. Yenyanga okhutsia okhulwana mbu, akalusie oburuchibwe khutsimbia tsiemasaba.

²²Nebutswa Nyasaye naboolela omulakusi Shemayia

²³okhuboolela Rehoboamu nende abandu boosi abetsimbia tsia Yuda nende Benjamini ari,

²⁴“Mulalwane abaana benywe beene Abaisiraeli tawe. Kalushe ingo wenywe mwesi. Akekholeeshe kali khulwa okhwenya khwanje.” Mana boosi nibahulila lilako elia OMWAMI Nyasaye, ne nibenyokha.

²⁵Omuruchi Rehoboamu niyombakha olukoba mwitaala lia Shekemu, mushialo shieshikulu shia Efuraimu mana namenyakhoyo khulwa tsinyanga tsinditi. Narulaho, ne niyombakha olukoba mwitaala lia Penueli.

²⁶Yeroboamu napaara mumwoyokwe ari, “Bulano oburuchi bunyala okhukalukha khubeinzu ya Daudi.

²⁷Abandu bano nibaba nibatsia okhumala emisango muhekalu eya OMWAMI Nyasaye eyili Yerusalemu, banyala okhuchaaka okhuba abahulili khumuruchi Rehoboamu wa Yuda, mana banzire isie.”

²⁸Nareebelesia abandu okhumuchetsiyia, ne nakaasia ebifwanani bibili biebimoosi okhurula khutsahabu. Naboolela abandu ari, “Mwakhatikulukha nimutsia Yerusalemu khulwa oluhono olurambi. Inywe Isiraeli, abanyasaye benywe mbabano, abamurusia mushialo shia Misiri.”

²⁹Yara shilala khubimoosi bieitsahabu ebio mwitookho lia Betseli, nashio eshindi nashira mwitookho lia Dani.

³⁰Kho abandu nibonoona, khulwa okhutsia Betseli nende Dani okhwinamila ebifwanani ebio.

³¹Yeroboamu khandi nakaasia habundu hokhwinamila khubutenje bwebikulu, khandi niyahula abesaaliisi abalali bomuluyia lwa Lawi tawe.

³²Yeroboamu nachachisia abandu okhukhola lisabo khunyanga yekhumi nakharano yomumwesi kwamunane, shinga lisabo elo likholungwa mu Yuda. Nahaana emisango khubimoosi bieitsahabu ebio khushimalilo shiemisango eshili Betseli, khandi nara Betseli abesaaliisi abakhalabananga habundu hokhwinamila aha yali niyakaasia yaho.

³³Khunyanga yekhumi nakharano yomumwesi kwamunane, yomwene yali neyaahula, yatsia Betseli mana nahaana omusango khushimalilo shiemisango khulwa okhukhola lisabo lia yali niyachachisia khulwa abandu ba Isiraeli. Omwene yaniina natsia khushimalilo shiemisango okhusamba obubane.