Read wanga 1 ABARUCHI 13 Bible Online

1 ABARUCHI 13 - wanga bible

1 ABARUCHI 13

¹OMWAMI Nyasaye yalachilisia omulakusi okhurula Yuda, okhutsia Betseli mana niyolayo ebise bia Yeroboamu yali nasinjiile hashimalilo shiemisango.

²Omulakusi oyo nalaama eshimalilo shiemisango eshio naboola ari, “Eshimalilo shiemisango, eshimalilo eshiemisango, OMWAMI Nyasaye aboola khwiwe ari, ‘Omwana alibulwa mubeinzu ya Daudi, oulilangwa eliira mbu Yosia. Alisinzila khwiwe abesaaliisi boosi abasambanga obubane khwiwe nibakhola emisango, khandi alisamba amakumba kabandu khwiwe.’ ”

³Omulakusi oyo natsiililila okhuboola ari, “Shino nishio eshilimanyisia mbu, amakhuwa kano karulile khu OMWAMI Nyasaye, eshimalilo shiemisango shino shilasiabukhamwo, nalio likoshe lilikhwo lino lilasalaasibwa.”

⁴Ne olwomuruchi Yeroboamu yahulila amakhuwa ako, yanyiila omukhonokwe niyebaala khumulakusi oyo naboola ari, “Tiile omundu oyo!” Ne mubwangu tsana obwo omukhono kwomuruchi nikutong'a nikukololoshile kurio, nalanyala okhukufumba okhukukalusia tawe.

⁵Eshimalilo shiemisango eshio, nishisiabukhamwo, nalio likoshe lialikhwo nilisalaana hasi shinga lwomulakusi yali narumbuule muliira elia OMWAMI Nyasaye.

⁶Omuruchi naboolela omulakusi oyo ari, “Chama osabe khu OMWAMI Nyasayewo, omusaaye omukhono kwanje kukalushe habwene.” Kho omulakusi oyo namusabila khu OMWAMI Nyasaye, mana omukhonokwe nikukalukha habwene shinga olwa kwabetsanga khale.

⁷Omuruchi oyo naboolela omulakusi oyo ari, “Chenda khutsie ninawe ingo, oliekhwo eshiokhulia, nasi ndalakhuhelesia eshihaanwa.”

⁸Omulakusi oyo nakalusia ari, “Kata niwakhambelesia inusu yemianduchio, shindakhanyala okhutsia ninawe noho okhulia eshiokhulia noho okhunywakhwo amaatsi ninawe tawe.

⁹OMWAMI Nyasaye yandachilisiye mbu, ndalaliakhwo, noho okhunywa eshindu shiosi shiosi kata okhukalukha ingo nindikhoonyelanga injila ndala yanditsilekhwo tawe.”

¹⁰Kho shiyakalukhayo niyekhoonyelanga injila ndala eyo ta, nebutswa yekhoonyela injila yindi.

¹¹Khubise ebio, omulakusi undi omukofu yamenyanga Betseli, owabasianibe betsa, ne nibamuboolela amakhuwa koosi akomulakusi undi oyo, yali nakholile inyanga eyo. Abasiani abo khandi baboolela saabwe akomulakusi oyo yali nabooleele omuruchi.

¹²Samwana oyo nabareeba ari, “Omulakusi oyo atsiliile khunjila shiina?” Abasianibe abo nibamwibaalila injila yomulakusi oyo yali nalondeelekhwo.

¹³Kho naboolela abasianibe ari, “Muurecheshele isishili.” Ne olwa bali nibamalile okhurechekha isishili, yaniinakhwo

¹⁴mana nachaaka okhuloonda khumulakusi oyo inyuma. Yanyoola omulakusi oyo niyekhaale hasi womusaala kwomuruba, ne namureeba ari, “Niwe omulakusi owa OMWAMI Nyasaye ourulile Yuda noho?” Omulakusi oyo namukalusia ari, “Nisie.”

¹⁵Omulakusi omukofu oyo namuboolela ari, “Chenda khutsie ingo, oliekhwo eshiokhulia.”

¹⁶Omulakusi okhurula Yuda oyo namukalusia ari, “Shienyala okhukalukha mbu enzie ninawe, noho okhuliakhwo eshiokhulia kata okhunywa amaatsi koosi ninawe habundu hano tawe.

¹⁷OMWAMI Nyasaye yandachilisiye naboola ari, ‘Shiolaliakhwo eshiokhulia shiosi noho okhunywakhwo amaatsi kata okhukalushila khunjila yawitsilekhwo tawe.’ ”

¹⁸Omulakusi omukofu oyo okhurula Betseli namuboolela ari, “Siesi endi omulakusi shinga iwe, ne khulwa okhulachilisia okhwa OMWAMI Nyasaye, omumalaika yambooleele mbu, ekhuyile ingo wanje, ekhulinde obulayi.” Nebutswa omulakusi omukofu oyo yali nabeeyanga butswa.

¹⁹Kho omulakusi wokhurula Yuda oyo nakalukha ninaye mana nalia ebiokhulia khandi nanywa amaatsi munzu mwomulakusi omukofu oyo.

²⁰Olwa bali nibashiikhaale bario, likhuwa elia OMWAMI Nyasaye nilitsila omulakusi omukofu oyo.

²¹Omulakusi omukofu oyo niyayula obutinyu naboolela omulakusi wokhurula Yuda ari, “OMWAMI Nyasaye aboola mbu, shichila shiolondile lilakolie nende okhuhulila akakhulachilisiiye ta,

²²nebutswa okalushe ninasi mana nolia eshiokhulia khandi nonywa amaatsi habundu aha yakhukania okhulia kata okhunywa. Khulwa okhubela ako, oleerwa, ne omubilikwo shikulayabilwa mung'ani yabeinzu yenywe tawe.”

²³Nibakhamala okhulia, nende okhunywa, omulakusi omukofu oyo nakasilia omulakusi wa Yuda oyo isishili.

²⁴Ne lwomulakusi wa Yuda oyo yali nali khunjila natsitsanga, yakaana nende italanyi mana niyimwiira, omubilikwe nikutong'a khunjila ne isishiliye nende italanyi nibisinjila halubeka womubilikwe okwo.

²⁵Abandu bandi babiraho, ne nibalola omubilikwe nikuli khumuhanda, nayo italanyi niyisinjiileho halubeka wakwo. Batsia mwitookho Betseli womulakusi omukofu oyo yali niyamenya mana nibababoolela amakhuwa ako.

²⁶Olwa omulakusi omukofu oyo yahulilakhwo amakhuwa ako, yaboola ari, “Oyo nomulakusi owakhaya okhulonda lilako elia OMWAMI Nyasaye! Kho OMWAMI Nyasaye arumile italanyi okhumuseera nende okhumwiira shinga olwa OMWAMI Nyasaye yali niyasuubisia mbu alakhola.”

²⁷Mana naboolela abasianibe ari, “Mungasilie isishili ndikhalekhwo.” Nabo nibakhola bario.

²⁸Mana narula natsia, ne nanyoola omubili kwomulakusi oyo nikuli hasi khumuhanda, nayo isishili nende italanyi nibisinjiile halubeka wakwo. Italanyi eyo shiyali niyiliile omubili okwo noho okhwira isishili eyo tawe.

²⁹Kho omulakusi omukofu oyo, nabuusia omubili okwo, nakukonia khusishili nakukalusia mwitookho lia Betseli khulwa okhumwikhuula nende okhumuyabila.

³⁰Yayabila omubili okwo mung'ani yabeinzuye, mana nibamwikhuula nibaboola bari “Oo! Omusiani wefwe, omusiani wefwe!”

³¹Niyakhamuyabila, omulakusi oyo yaboolela abasianibe ari, “Olwa efwa, muyabile mung'ani yomulakusi uno ayabilwemwo yino. Mure amakumba kanje halubekawe.

³²Amakhuwa aka yalakula khulwa okhulaka okhwa OMWAMI Nyasaye, okhufukula eshimalilo shiemisango eshili mwitookho lia Betseli nende habundu undi hosi ahokhwinamila mumataala ka Samaria, toto mwene kalikholekha.”

³³Omuruchi Yeroboamu shiyalekha ebikholebie biobumayanu ta, nebutswa yatsiililila okhwahula abesaaliisi okhurula mutsinzu etsilali tsiobwisaaliisi ta, okhukhalabana khubimalilo biemisango bia yali niyombakha. Yaahulanga omundu yesi yesi namukhola omwisaaliisi.

³⁴Obwonooni buno bwareera obusasishi khubeinzuye nende okhwakamia oburuchibwe.