Read wanga 1 ABARUCHI 14 Bible Online

1 ABARUCHI 14 - wanga bible

1 ABARUCHI 14

¹Munyanga etsio, omusiani womuruchi Yeroboamu oulangwa mbu, Abiya yatiilwa nobulwale.

²Yeroboamu naboolela omukhasiwe ari, “Wifwolofie, ofwane lukano, kho mbu omundu yesi yesi aleshe okhukhumanyilisia tawe. Mana otsie Shilo, khumulakusi Ahiya, owaboola mbu, ndiliba omuruchi wa Isiraeli.

³Omuyilile emikaate ekhumi, mandasi nende ichupa niyitsulemwo obuushi. Omureebe aketsa okhwikholekha khumwana wefwe uno, naye alakhuboolela.”

⁴Kho omukhasi oyo nakhola shinga lwomuruchi Yeroboamu yamuboolele. Natsia Shilo munzu ya Ahiya. Naye Ahiya shiyali ounyala okhulola ta, shichila yali niyakofula muno.

⁵Naye OMWAMI Nyasaye naboolela Ahiya ari, “Omukhasi wa Yeroboamu yetsanga okhukhureeba okhulondokhana nomwanawe omusiani, okhuba nomulwale muno, nawe omuboolele amakhuwa kekhuboolela. Olwa yoola, alefwolofia niyekhola okhuba omukhasi undi oulali ye tawe.”

⁶Ne olwa Ahiya yahulila omukhasi oyo niyetsanga nali mubwinjililo, yaboola ari, “Yinjila mukari. Emanyile mbu oli omukhasi wa Yeroboamu. Eshichila niwifwolofia niwikhola okhuba omundu undi nishiina? Ndenya okhukhuboolela amakhuwa amabi.

⁷Tsia oboolele omuruchi Yeroboamu mbu, kano niko aka OMWAMI Nyasaye wa Isiraeli aboola ari, ‘Ndakhwahula okhurula mubandu bandi, ne nekhukhola okhuba omuruchi wabandu banje Abaisiraeli.

⁸Ndanuula abolwibulo lwa Daudi oburuchi nekhuhelesia iwe. Nebutswa shioli shinga omukhalabani wanje Daudi, owali omuhulili, owalonda amalako kanje khandi owakhola akandafuchililanga konyene tawe.

⁹Okholile obwonooni obukhongo okhushila abaruchi bakhuranjilila iwe okhuruka. Okhayile okhumbulila khandi obuusiiye liruma lianje khulwa okhwiranya ebifwanani nende abanyasaye okhurula khubibia khulwa okhubiinamila.

¹⁰Khulwa okhubela kano, ndalareera amasila khuburuchibwo khandi ndaleera abolwibulolwo abeshisaatsa, abatiiti nende abokhongo. Ndalarusiaho abeinzuyo, balamululwa boosi pe, nibahwa shinga amasingo.

¹¹Omundu yesi khubeinzuyo oufwila mwitookho, alalibwa netsimbwa, naye yesi yesi oufwila elwanyi welitookho alalibwa netsingosia. Isie OMWAMI Nyasaye emalile okhuboola.’ ”

¹²Ahiya yatsiililila okhuboolela omukhasi oyo ari, “Bulano kalukha ingowo. Ne olwa witsa okhuba niwinjilanga mwitaala omwanawo omusiani alafwa.

¹³Abandu ba Isiraeli boosi balamwikhuula, ne balamuyabila. Niye oulaba yenyene khubeinzu ya Yeroboamu oulayabilwa munjila indayi, shichila niye yenyene owa OMWAMI Nyasaye wa Isiraeli achamisiibwe ninaye.

¹⁴OMWAMI Nyasaye atsia okhuraho omuruchi undi mu Isiraeli, oulamalaho oburuchi bwa Yeroboamu.

¹⁵OMWAMI Nyasaye alahelesia Isiraeli eshinyasio, khandi lihanga lia Isiraeli lilatechela shinga likata mumwalo. Alarusia abandu ba Isiraeli mushialo eshilayi shino eshia yahelesia abakuuka babwe, khandi alabasalaasia okhuula khumwalo kwa Yufurate, shichila babuusiiye lirumalie khulwa okhukaasia ebifwanani biomunyasaye mukhasi Ashera.

¹⁶OMWAMI Nyasaye alalekha okhulinda Isiraeli shichila Yeroboamu yonoona khandi nachila abandu ba Isiraeli nibonoona.”

¹⁷Omukhasi wa Yeroboamu oyo nasinjila nachaaka okhutsia nakalukha Tiriza. Ne olwa yenjila butswa mungomwe, omusianiwe oyo nafwa.

¹⁸Abandu ba Isiraeli, nibamwikhuula mana nibamuyabila, shinga OMWAMI Nyasaye yali naboolile okhubirila mumulakusi Ahiya.

¹⁹Amakhuwa kandi koosi akomuruchi Yeroboamu yakhola, amahe ka yalwana nende shinga olwa yarukanga kahandikwa mushitabu shia Amakhuwa kobulamu bwakhale bwa Abaruchi ba Isiraeli.

²⁰Yeroboamu yaruka khulwemiyika amakhumi kabili nachibili. Yafwa mana nayabilwa, naye omusianiwe mbu, Nadabu nakalukha mushilenjeshie okhuba omuruchi.

²¹Rehoboamu omusiani wa Solomoni yali nali nemiyika amakhumi kane nende mulala olwa yakholwa omuruchi wa Yuda. Ne naruka khulwemiyika ekhumi namusafu mu Yerusalemu, litookho elia OMWAMI Nyasaye yali niyaahula okhurula mungongo tsindi tsia Isiraeli, okhuba habundu ha balamwinamilangaho. Nyinamwana Rehoboamu yali Naama okhurula Amoni.

²²Abandu ba Yuda bakholela OMWAMI Nyasaye obwonooni khandi nibameeta okhubuusia lirumalie khubo okhushilakhwo shinga olwa abakuuka babwe bakhola.

²³Bombakha habundu hokhwinamila abanyasaye bobubeeyi, khandi nibasinjisia tsisiilo tsiamachina nende ebifwanani bia Ashera okhwinamila khubikulu nende hasi wemisaala chiebinikha ebikhongo.

²⁴Ne akali amabi okhushila akandi koosi, baliho abasaatsa nende abakhasi abakholanga obutamba habundu hokhwinamila ebifwanani. Abandu ba Yuda bakhola obumayanu bulala tsana bwabandu ba OMWAMI Nyasaye yali niyaloonda okhurula mushialo olwa Abaisiraeli bali nibenjilangamwo.

²⁵Mumuyika kwakharano kwomuruchi Rehoboamu, omuruchi Shishaki wa Misiri yaseera litookho lia Yerusalemu.

²⁶Shishaki nayaaya ebindu biosi biobukusi ebiali muhekalu nende munzu yomuruchi halala nebikhumba bieitsahabu biomuruchi Solomoni yali niyeranya.

²⁷Omuruchi Rehoboamu yeranya ebikhumba biomukasa khulwa okhukalusiaho ebiali nibiyaayilwe, mana nabira hasi wobulindi bwabakhongo babelihe balindanga hamuliango weinzu yomuruchi.

²⁸Buli lwomuruchi yatsitsanga mu Ihekalu eya OMWAMI Nyasaye, abalindi abo bachinganga ebikhumba ebio mana olunyuma babikalusia khandi mushisika eshialindwa obutinyu.

²⁹Amakhuwa koosi komuruchi Rehoboamu yakhola kahandikwa mushitabu shiamakhuwa kobulamu bwakhale bwabaruchi ba Yuda.

³⁰Mutsinyanga etsio, Rehoboamu nende Yeroboamu balwananga abeene khubeene buli lwosi.

³¹Rehoboamu yafwa mana nayabilwa mung'ani tsioburuchi mwitookho lia Daudi, naye Abiya omusianiwe nakalukha mushilenjeshie okhuba omuruchi.